തിരുവനന്തപുരം: ഇഫ്താര് വിരുന്നിന് വിദ്യാഭ്യാസ വകുപ്പിന്റെ കീഴിലുള്ള സ്ഥാപനങ്ങളില് നിന്ന് പണം സ്വീകരിച്ചതായി വിദ്യാഭ്യാസ മന്ത്രി പി.കെ അബ്ദുറബ്ബ്. ഇതില് അപാകത പറ്റിയെന്നും വിരുന്നിന്റെ പണം താന് വഹിക്കുമെന്നും മന്ത്രി പത്രസമ്മേളനത്തില് പറഞ്ഞു.
ജൂലൈ10ന് ശാസ്ത്ര സാങ്കതേിക മ്യൂസിയത്തില് മന്ത്രി നടത്തിയ ഇഫ്താര്വിരുന്നിന് വിദ്യാഭ്യാസവകുപ്പിന് കീഴിലെ വിവിധ സ്ഥാപനങ്ങളില്നിന്ന് ഫണ്ട് പിരിച്ചെന്നായിരുന്നു ആക്ഷേപം. ഇഫ്താര് വിരുന്ന് നടത്തിപ്പുമായി ബന്ധപ്പെട്ട് ശാസ്ത്ര സാങ്കതേിക മ്യൂസിയം ഡയറക്ടര് അരുണ് ജെറാള്ഡ്പ്രകാശ് പുറത്തിറക്കിയ കത്തുകളാണ് തെളിവായി ചൂണ്ടിക്കാട്ടിയിരുന്നത്.
വിവിധ വിദ്യാഭ്യാസ സ്ഥാപനങ്ങളില്നിന്ന് പിരിച്ചെടുത്ത 2.3 ലക്ഷം രൂപ നല്കിയതാവട്ടെ മുസ്ലിം ലീഗുമായി അടുത്ത ബന്ധമുള്ള കൊല്ലത്തെ ഒരു ഹോട്ടല് ആന്ഡ് കാറ്ററിങ് സ്ഥാപനത്തിനാണ്. ജൂലൈ 10ന് വൈകീട്ട് 6.30ന് വിദ്യാഭ്യാസമന്ത്രി വിദ്യാഭ്യാസ വകുപ്പിലെ ഉന്നത ഉദ്യോഗസ്ഥരുടെ യോഗം ചേര്ന്നിരുന്നുവെന്നും ഇതിന്റെ ചെലവിലേക്ക് വിവിധ സ്ഥാപനങ്ങള് 46,200 രൂപ വീതം നല്കണമെന്നുമായിരുന്നു കത്ത്.
സെന്റര് ഫോര് കണ്ടിന്യൂയിങ് എജുക്കേഷന്, കേരള സ്റ്റേറ്റ് ഓപ്പണ് സ്കൂള്, എല്.ബി.എസ് സെന്റര് ഫോര് സയന്സ് ആന്ഡ് ടെക്നോളജി, സിആപ്റ്റ്, സാക്ഷരതാ മിഷന് എന്നീ സ്ഥാപനങ്ങള്ക്കാണ് കത്ത് നല്കിയത്. മന്ത്രിയുടെ ഇഫ്താര് പാര്ട്ടി നടന്ന ദിവസം വകുപ്പ്തല യോഗങ്ങളൊന്നും നടന്നിട്ടില്ലെന്നും തീയതി തെറ്റിയതാകാമെന്നും കരുതി ശാസ്ത്ര സാങ്കതേിക മ്യൂസിയം ഡയറക്ടറെ വിവിധ സ്ഥാപന മേധാവികള് ബന്ധപ്പെട്ടപ്പോഴാണ് വിരുന്നിന്റെ ചെലവിനാണ് തുക ശേഖരിക്കുന്നതെന്ന വിവരം ലഭിച്ചത്.
