18. ദിവ്യാസ്തരണസംപന്നഹേമസിംഹാസനസ്ഥിതാഃ – ദിവ്യ വിശുദ്ധമായ പാവനമായ ഉത്കൃഷ്ടമായ, ആസ്തരണ- മേല് വിരിപ്പുകൊണ്ട്, സംപന്ന- സമ്പന്നമായ, ഐശ്വര്യപൂര്ണമായ, ശ്രേഷ്ഠമായ, ഹേമ- സ്വര്ണനിര്മ്മിതമായ, സിംഹാസന- സിംഹാസനത്തില് (സിംഹാസനം രാജാവിനിരിക്കാനുള്ള ആസനം, രാജപദവി സൂചിപ്പിക്കാനായി മൃഗങ്ങളുടെ രാജാവായ സിംഹം താങ്ങുന്ന മട്ടില് പണിയുന്നതെന്നതിനാല് ഈ പേര്) സ്ഥിതാ- ഇരിക്കുന്നവള്.
ദിവ്യമായ ആസ്തരണംകൊണ്ട് സമ്പന്നമായ ഹേമസിംഹാസനത്തില് സ്ഥിതിചെയ്യുന്നവള്. ഈ നാമം മഹദേവിയുടെ രാജരാജേശ്വരീരൂപത്തെ ആവിഷ്ക്കരിക്കാന് ശ്രമിക്കുന്നു. ത്രിമൂര്ത്തികളും ഇന്ദ്രാദിദേവകളും ഋഷിമാരും അസുരശ്രേഷ്ഠരും ശക്തി ദേവിമാരും യക്ഷ ഗന്ധര്വനാഗശ്രേഷ്ഠരും മറ്റും നിറഞ്ഞ ആസ്ഥാനമണ്ഡപത്തില് ദേവി എഴുന്നള്ളിയിരിക്കുന്നു.
ലോകസാമ്രാജ്യത്തിന്റെ ചക്രവര്ത്തിനിയുടെ പദവിക്കു ചേര്ന്ന സിംഹാസനത്തിലാണ് ദേവി ഇരിക്കുന്നത്. സിംഹവിഗ്രഹങ്ങള് താങ്ങായുള്ള ആ സിംഹാസനം സുവര്ണ നിര്മ്മിതമാണ്. അതിന്റെ ഇരിപ്പിടം ദിവ്യമായ മേല്വിരിപ്പുകൊണ്ട് ഐശ്വര്യമുള്ളതാക്കി തീര്ത്തിരിക്കുന്നു.
മൂകാംബികാക്ഷേത്രത്തിലെ സര്വ്വാലങ്കാര പൂജയ്ക്ക് ഈ ദൃശ്യം പ്രതീകാത്മകമായി അവതരിപ്പിച്ചുകാണാം. അലങ്കാര വിഗ്രഹം അണിയിച്ചൊരുക്കി പൂജിക്കാന് തുടങ്ങുമ്പോള് മേല്വിവരിച്ച എല്ലാ ശക്തികളും ദേവകളും എല്ലാം അവിടെ സന്നിഹിതരാകുമെന്നു സങ്കല്പം.
ഏകാഗ്രമായ ഭക്തിയോടെ ദേവിയുടെ ഈ നാമത്തിന്റെ അര്ത്ഥം ഉള്ക്കൊണ്ടു ധ്യാനിച്ചാല് ദേവിയുടെ സിംഹാസനേശ്വരി രൂപം മനസ്സില് തെളിയും.
19. സിന്ദൂരാരുണസൗന്ദര്യശ്രീവിരാജിത വിഗ്രഹാഃ – സിന്ദൂര- സിന്ദൂരത്തിന്റെ; അരുണ-അരുണ വര്ണ്ണവും (അരുണം ഇളം ചുവപ്പ്, ഉദയസൂര്യന്റെ നിറം); സൗന്ദര്യശ്രീ- സൗന്ദര്യത്തിന്റെ ഐശ്വര്യംകൊണ്ട്; വിരാജിത- ശോഭിക്കുന്ന; വിഗ്രഹാ- ശരീരമുള്ളവള്.
സിന്ദുരത്തിന്റെ അരുണവര്ണ്ണവും സൗന്ദര്യത്തിന്റെ ഐശ്വര്യവും കൊണ്ടു ശോഭിക്കുന്ന ശരീരമുള്ളവള്. ദേവിയുടെ ശരീരം സ്വാഭാവികമായി അരുണവര്ണ്ണമുള്ളതാണ്. ഭക്തര് അര്പ്പിക്കുന്ന സിന്ദൂരം കൂടെ അണിഞ്ഞപ്പോള് കൂടുതല് അരുണമായി അരുണാവര്ണ്ണത്തില് ദേവിയെ ധ്യാനിക്കുകയോ ദര്ശിക്കുകയോ ചെയ്യുന്നവര്ക്ക് സര്വാര്ത്ഥസിദ്ധി ഉണ്ടാകുമെന്നു വിശ്വാസം.
… തുടരും
