അഹമ്മാദാബാദ്: വീട്ടമ്മയായ 30കാരിയെ ലൈംഗികാതിക്രമം ചെറുത്തതിന് ആസിഡ് ഒഴിച്ച് കൊലപ്പെടുത്തി. ഉമര്വാദയിലാണ് യുവതിയെ കൊലപ്പെടുത്തുകയും അവരുടെ രണ്ടു മക്കളെ ഗുരുതരമായി പരിക്കേല്പ്പിക്കുകയും ചെയ്ത കുറ്റത്തിന് മൂന്നുപേര് പോലീസ് പിടിയിലായത്.
അസ്ലാം ഷെയ്കും രണ്ട് സുഹൃത്തുക്കളുമാണ് കഴിഞ്ഞ രാത്രി വീട്ടമ്മയെയും കുടുംബത്തെയും ആസിഡ് ഉപയോഗിച്ച് ആക്രമിച്ചതെന്ന് പോലീസ് അസിസ്റ്റന്റ് കമ്മീഷണര് നരേഷ് കന്സരിയ അറിയിച്ചു. കൊയ്ലി ഖാദി പ്രദേശത്തെ വീട്ടമ്മയുടെ വസതിയിലെത്തിയാണ് ഇവര് ആക്രമണം നടത്തിയത്.
ആക്രമണത്തിന് ഇരയായ ഹേമു റാത്തോഡിന്റെ മരണം സര്ക്കാര് ആശുപത്രിയില് വച്ചാണ് സംഭവിച്ചത്. ഇവരുടെ മക്കളായ രാജ് (19), പ്രേം (9) എന്നിവര്ക്കാണ് ഗുരുതരമായി പൊള്ളലേറ്റത്. അസ്ലം ഷെയ്കിനെ കൂടാതെ കൂട്ടാളികളായ രാജാ വിമല്നാരായണ് ശേഖര്, സര്ഫ്രസ് ഷെയ്ക് എന്നിവരാണ് പിടിയിലായതെന്ന് കന്സരിയ പറഞ്ഞു.
യുവതിയുടെ ഭര്ത്താവ് രാമു റാത്തോഡ് (30), അമ്മായിയമ്മ കൗസല്യ റാത്തോഡ് (48) എന്നിവര്ക്കും ആക്രമണത്തില് നിസ്സാര പരിക്കുകളുണ്ട്. ഏതാനും നാളുകളായി അസ്ലമും കൂട്ടാളികളും തന്റെ ഭാര്യയുടെ പുറകെ നടന്നിരുന്നതായി റാത്തോഡ് പോലീസിന് മൊഴി നല്കിയിട്ടുണ്ട്.
പിതാവായ സലിം ഷെയ്കിനോട് പരാതി പറഞ്ഞതില് പ്രകോപിതനായാണ് അസ്ലം തന്റെ ഭാര്യയെ ആക്രമിച്ചതെന്നും അയാള് വ്യക്തമാക്കിയിട്ടുണ്ട്. ഐപിസി 302ാം വകുപ്പ് പ്രകാരം ഇവര്ക്കെതിരെ കൊലക്കുറ്റത്തിന് കേസെടുത്തിട്ടുണ്ട്.
