ഹൈദരാബാദ്: ശ്രീലങ്കക്കെതിരായ ഏകദിന പരമ്പര സ്വന്തമാക്കാന് ടീം ഇന്ത്യ ഇന്ന് ഇറങ്ങുന്നു. അഞ്ച് മത്സരങ്ങളുടെ പരമ്പരയിലെ ആദ്യ രണ്ടെണ്ണത്തിലും മികച്ച വിജയം നേടിയ ഇന്ത്യ മൂന്നാം അങ്കത്തിനാണ് ഇന്ന് കച്ചമുറുക്കുന്നത്. ഇന്നും കൂടി ജയിച്ചാല് പരമ്പര ഇന്ത്യക്ക് സ്വന്തം.
ആദ്യ കളിയില് 169 റണ്സിന്റെയും രണ്ടാം മത്സരത്തില് ആറ് വിക്കറ്റിന്റെയും തകര്പ്പന് വിജയമാണ് ടീം ഇന്ത്യ ശ്രീലങ്കക്കെതിരെ സ്വന്തമാക്കിയത്.
ബാറ്റിംഗ് നിര തകര്പ്പന് ഫോമിലേക്ക് തിരിച്ചെത്തിയതിനാല് ഇന്നും ഇന്ത്യക്ക് തന്നെയാണ് മുന്തൂക്കം. ഓപ്പണര് ധവാന്, രഹാനെ, ക്യാപ്റ്റന് വിരാട് കോഹ്ലി, സുരേഷ് റെയ്ന, കഴിഞ്ഞ മത്സരത്തില് തന്റെ ആദ്യ ഏകദിന സെഞ്ചുറി നേടിയ അമ്പാട്ടി റായിഡു എന്നിവരടങ്ങുന്ന ബാറ്റിംഗ്നിര തകര്പ്പന് ഫോമിലാണെന്ന് കഴിഞ്ഞ മത്സരങ്ങള് വ്യക്തമാക്കിക്കഴിഞ്ഞു. ബൗളിംഗ്നിരയും മികച്ച പ്രകടനമാണ് നടത്തുന്നത്. ഉമേഷ് യാദവും ഇഷാന്ത് ശര്മ്മയും ഉള്പ്പെട്ട പേസര്മാരും അശ്വിനും രവീന്ദ്രജഡേജയും അക്ഷര് പട്ടേലും ഉള്പ്പെട്ട സ്പിന്നര്മാരും ഉജ്ജ്വലമായാണ് ബൗള് ചെയ്തിരുന്നത്.
അതേസമയം ലങ്കന് മുന്നിര ബാറ്റ്സ്മാന്മാര് മികച്ച ഫോമിലേക്ക് ഇനിയും ഉയര്ന്നിട്ടില്ല. ദില്ഷന്, ജയവര്ദ്ധനെ, കുശല് പെരേര, ഉപുല് തരംഗ, എന്നിവരുടെ മോശം ഫോമാണ് ലങ്കന് ടീമിനെ കുഴക്കുന്നത്. എന്നാല് സംഗക്കാരയും ക്യാപ്റ്റന് ആഞ്ചലോ മാത്യൂസും കഴിഞ്ഞ മത്സരത്തില് ഫോമിലേക്ക് തിരിച്ചെത്തിയതിന്റെ ലക്ഷണം കാണിച്ചതോടെ ഇന്ന് വിജയം സ്വന്തമാക്കി പരമ്പരയില് തിരിച്ചുവരവ് നടത്താമെന്ന കണക്കുകൂട്ടലിലാണ്.
ബൗളര്മാരും അവസരത്തിനൊത്തുയരാത്തതാണ് അവരെ ബുദ്ധിമുട്ടിലാക്കുന്ന മറ്റൊരു കാര്യം. ധമ്മിക പ്രസാദും ലഹിരു ഗമാഗെയും തീസര പെരേരയും റണ്ദിവെയും പ്രസന്നയും റണ്സ് വിട്ടുകൊടുക്കുന്നതില് ധാരാളിത്തം കാണിക്കുകയും ചെയ്യുന്നുണ്ട്. എന്തായാലും പരമ്പര സ്വന്തമാക്കാന് ഇന്ത്യയും തിരിച്ചുവരവിനായി ശ്രീലങ്കയും കൊമ്പുകോര്ക്കുമ്പോള് മികച്ചൊരു ഏകദിന മത്സരമായിരിക്കും ഇന്ന് അരങ്ങേറുക എന്ന് തീര്ച്ചയാണ്.
