വാരാണസി: ദ്വിദിന സന്ദര്ശനത്തിനായി പ്രധാനമന്ത്രി നരേന്ദ്രമോദി തന്റെ ലോക്സഭാ മണ്ഡലം കൂടിയായ വാരാണസിയിലെത്തി. പ്രധാനമന്ത്രി പദത്തിലെത്തിയ ശേഷം ഇതാദ്യമായാണ് മോദി വാരാണസിയിലെത്തുന്നത്.
പുണ്യനഗരിയിലെ പ്രധാനമന്ത്രിയുടെ ദ്വിദിന സന്ദര്ശനത്തിന്റെ ഭാഗമായി
ജയ്പുര ഗ്രാമവാസികള് പ്രത്യേക പൂജകള് നടത്തി. മോദി ജയ്പുരഗ്രാമവും സന്ദര്ശിക്കുന്നുണ്ട്. ഗ്രാമവാസികളെ ശാക്തീകരിക്കുന്നതിന് കേന്ദ്രസര്ക്കാര് പ്രഖ്യാപിച്ച സന്സദ് ആദര്ശ് ഗ്രാമയോജനയുടെ ഭാഗമായി ജയ്പുര ഗ്രാമത്തെ വാരാണസിയിലെ ലോക്സഭാംഗം എന്ന നിലയില് ദത്തെടുക്കുന്നതായി മോദി ചടങ്ങില് പ്രഖ്യാപിക്കും.
നെയ്ത്തുകാര്ക്കു വേണ്ടി നിര്മിക്കുന്ന വ്യാപാരസമുച്ചയ കേന്ദ്രത്തിന് പ്രധാനമന്ത്രി തറക്കല്ലിടും. നെയ്ത്തുകാരെ പുനരുദ്ധരിക്കുന്ന പദ്ധതിയുടെ ഭാഗമാണിത്. വാരാണസിയില് നിരവധി പരിപാടികളില് പ്രധാനമന്ത്രി പങ്കെടുക്കുന്നുണ്ട്. മാത്രമല്ല വാരാണസിയുടെ സമഗ്രവികസനം ലക്ഷ്യമിട്ട് പ്രത്യേക ഉത്തരവാദിത്വങ്ങള് നിര്വഹിക്കപ്പെടുമെന്നും പ്രധാനമന്ത്രി ജനങ്ങള്ക്ക് ഉറപ്പു നല്കിയിട്ടുണ്ട്.
