ന്യൂദല്ഹി: ഭീകരവാദ സംഘടനയായ ഇന്ത്യന് മുജാഹിദ്ദീനുമായി ചേര്ന്ന് രാജ്യത്തെമ്പാടും ഭീകരാക്രമണം സംഘടിപ്പിക്കാന് അല്ഖ്വയ്ദ ശ്രമിക്കുന്നതായി രഹസ്യാന്വേഷണ ഏജന്സികള് മുന്നറിയിപ്പ് നല്കി. അല്ഖ്വയ്ദയും ഇന്ത്യന് മുജാഹിദ്ദീനുമായി നടത്തിയ രഹസ്യസംഭാഷണങ്ങളുടെ ശബ്ദരേഖ പിടിച്ചെടുത്തതോടെയാണ് ഭീകരാക്രമണ നീക്കത്തിനെതിരെ ഇന്ത്യന് രഹസ്യാന്വേഷണ വിഭാഗം മുന്നറിയിപ്പ് നല്കിയത്.
ഭീകരാക്രമണം ഒപ്പം വിദേശികളെ ബന്ദിയാക്കുകയും ചെയ്യാനാണ് പദ്ധതി. മാത്രമല്ല സിറിയയിലും ഇറാഖിലും അരങ്ങേറുന്നതു പോലെ നിരന്തരം ഭീകരാക്രമണം സംഘടിപ്പിക്കാനും ഈ ഭീകരസംഘടനകള് പദ്ധതി ആവിഷ്കരിച്ചിട്ടുണ്ട്. ഇന്ത്യന് മുജാഹിദ്ദീനില് പ്രവര്ത്തിക്കുന്ന ചെറുപ്പക്കാര്ക്ക് അല്ഖ്വയ്ദ പാക്കിസ്ഥാനിലും അഫ്ഗാനിസ്ഥാനിലും വച്ച് പരിശീലനം നല്കിയതായും ഇവരെ ഉപയോഗിച്ച് കനത്ത ഭീകരാക്രമണത്തിന് ശ്രമിക്കുകയാണെന്നും രഹസ്യാന്വേഷണ വിഭാഗം റിപ്പോര്ട്ട് ചെയ്തിട്ടുണ്ട്.
ദക്ഷിണേഷ്യ കേന്ദ്രമാക്കി ഇന്ത്യന് ഉപഭൂഖണ്ഡത്തെ ആക്രമിക്കുമെന്ന് അല്ഖ്വയ്ദ കഴിഞ്ഞ ആഴ്ച മുന്നറിയിപ്പ് നല്കിയിരുന്നു. ഈ ഇസ്ലാമിക ഭീകരസംഘടനകളുടെ പരസ്പരം സഹകരണം അവ്യക്തവും അതിവേഗത്തിലുമുള്ളതിനാല് ഭീകരാക്രമണം സംബന്ധിച്ച വ്യക്തമായ തെളിവ് പുറത്തുവിടാന് ബുദ്ധിമുട്ടുണ്ടെന്ന് രഹസ്യാന്വേഷണ ഏജന്സികള് പറയുന്നു. എന്നാല് ലഭ്യമായ തെളിവുകള് അല്ഖ്വയ്ദാ-ഇന്ത്യന് മുജാഹിദ്ദീന് ബന്ധത്തെ സാധൂകരിക്കുന്നു. മാത്രമല്ല പ്രഷര് കുക്കര് ബോംബ് പോലുള്ളവ ഉപയോഗിച്ച് പ്രാദേശിക പട്ടണങ്ങളില് സ്ഫോടനം നടത്താന് തക്കവണ്ണമുള്ള സംവിധാനം അവര്ക്കുണ്ടെന്നും ഏജന്സികള് വ്യക്തമാക്കി.
ലോകത്തിലെ ഏറ്റവും വലിയ ജനാധിപത്യരാഷ്ട്രമായ ഇന്ത്യയില് ഇത്തരത്തിലൊരു ഭീകരാക്രമണം നടന്നാല് അത് ദൂരവ്യാപക പ്രത്യാഘാതങ്ങളുണ്ടാക്കുമെന്നും ഐബി മുന്നറിയിപ്പില് വ്യക്തമാക്കുന്നു. അയല്രാജ്യങ്ങളായ പാക്കിസ്ഥാന്, അഫ്ഗാനിസ്ഥാന് എന്നിവിടങ്ങളില് നിരന്തരം നടക്കുന്ന സംഘര്ഷങ്ങള് ഇവിടെയും വ്യാപിപ്പിക്കാനാണ് ഭീകരവാദികളുടെ ലക്ഷ്യം.
അല്ഖ്വയ്ദയും ഐഎസ്ഐഎസും പ്രാദേശിക തീവ്രവാദ സംഘടനകളുമായി ചേര്ന്ന് അഫ്ഗാനിസ്ഥാനില് നടത്തുന്നതു പോലുള്ള അട്ടിമറിക്ക് സാധ്യത ഉണ്ടെന്നും ദേശീയ അന്വേഷണ ഏജന്സി തലവന് ശരത് കുമാര് പറഞ്ഞു.
