ഇംഫാല്: മണിപ്പൂരില് പട്ടാളത്തിനുള്ള പ്രത്യേക അധികാരം എടുത്തുകളയണമെന്നാവശ്യപ്പെട്ട് ഇറോം ചാനു ശര്മിള നടത്തുന്ന നിരാഹാര സമരം 15-ാം വര്ഷത്തിലെത്തി.
1958ല് ഭാരത പാര്ലമെന്റ് നടപ്പിലാക്കിയതാണ് സായുധ സേന പ്രത്യേക അധികാര നിയമം (അഫ്സ്പ). ഇതനുസരിച്ച് സൈന്യത്തിന് ആരെ എപ്പോള് വേണമെങ്കിലും അറസ്റ്റു ചെയ്യാനും കേസെടുക്കാതെ ഒഴിവാക്കാനുമുള്ള അമിതാധികാരമുണ്ട്. എന്നാല് 2000 നവംബര് രണ്ടിന് ഇംഫാല് എയര്പോര്ട്ടിനു സമീപം മൗലോം പ്രദേശത്ത് ബസ്സ് കാത്തിരുന്ന 10 പേരെ ആസ്സാം റൈഫിളില് ഉള്പ്പെടുന്ന സൈനികര് വെടിവെച്ചു കൊന്നിരുന്നു.
ഇതിനെ തുടര്ന്ന് സംസ്ഥാനത്തെ അഫ്സ്പ നിര്ത്തലാക്കണം എന്നാവശ്യപ്പെട്ട് നവംബര് അഞ്ചിനാണ് ഇറോം ശര്മിള നിരാഹാര സമരം ആരംഭിച്ചത്. ഇതുകൂടാതെ ജസ്റ്റ് പീസ് ഫൗണ്ടേഷന്, ഹ്യൂമണ് റൈറ്റ്സ് അലേര്ട് തുടങ്ങിയ സംഘടനകളും ഇത് നിര്ത്തലാക്കണമെന്നാവശ്യപ്പെട്ട് സമരരംഗത്തുണ്ട്.
മണിപ്പൂരിനൊപ്പം വടക്ക് കിഴക്കന് സംസ്ഥാനമായ ജമ്മുകശ്മീരിലും അഫ്സ്പ നിയമത്തിന് നിരോധനം ഏര്പ്പെടുത്തണമെന്നും ഈ സംഘടനകള് ആവശ്യപ്പെടുന്നുണ്ട്. അതേസമയം പ്രധാനമന്ത്രി നരേന്ദ്രമോദി സര്ക്കാര് വിവാദമായ ഈ പട്ടാള അധികാര നിയമം എടുത്തുകളയുമെന്നാണ് പ്രതീക്ഷിക്കുന്നതെന്നും ഇറോം ചാനു ശര്മിള പറഞ്ഞു.
സര്ക്കാര് വിരുദ്ധ പ്രവര്ത്തകയായാണ് ജനങ്ങള് പലപ്പോഴും തന്നെ കാണുന്നത്. എന്നാല് ഭാരതത്തിന്റെ ഏകതക്കു വേണ്ടിയാണ് താന് എന്നും നിലകൊള്ളുന്നത്. എന്നാല് കേന്ദ്ര സര്ക്കാര് സംസ്ഥാനത്ത് നടപ്പിലാക്കിയ അഫ്സ്പ നിര്ത്തലാക്കിയില്ലെങ്കില് മണിപ്പൂര് സ്വമേധയാ ഭാരതത്തില് നിന്നും വിഭജിക്കപ്പെടുമെന്നും ശര്മിള കൂട്ടിച്ചേര്ത്തു.
