ന്യൂദല്ഹി: കേന്ദ്രമന്ത്രിസഭയിലെ ആദ്യപുനഃസംഘടന ഉടന് ഉണ്ടായേക്കും. പാര്ലമെന്റിന്റെ ശീതകാല സമ്മേളനത്തിനു മുമ്പ് പുനഃസംഘടന നടക്കും. ധനകാര്യ-പ്രതിരോധ വകുപ്പുകള് കൈകാര്യം ചെയ്യുന്ന അരുണ് ജെയ്റ്റ്ലിയുടെ ജോലി ഭാരം കുറയ്ക്കുന്നതിനായി പുതിയ പ്രതിരോധമന്ത്രി ഉണ്ടാകുമെന്ന് ഉറപ്പായിട്ടുണ്ട്. ഗോവാ മുഖ്യമന്ത്രി മനോഹര് പരീഖറാണ് പുതിയ പ്രതിരോധമന്ത്രിയെന്നാണ് പ്രധാനമന്ത്രിയുടെ ഓഫീസില് നിന്നും ലഭിക്കുന്ന സൂചനകള്.
വിദേശയാത്രയ്ക്കായി പ്രധാനമന്ത്രി ഞായറാഴ്ച യാത്രതിരിക്കും. ഉടന് നിയമസഭാ തെരഞ്ഞെടുപ്പ് നടക്കുന്ന ഝാര്ഖണ്ഡില് നിന്നും രണ്ടുപേരെക്കൂടി കേന്ദ്രമന്ത്രിസഭയിലെടുത്തേക്കും. ക്ഷണപ്രകാരം ദല്ഹിയിലെത്തിയ മനോഹര് പരീഖര് പ്രധാനമന്ത്രിയുമായും ബിജെപി അദ്ധ്യക്ഷന് അമിത്ഷായുമായും കൂടിക്കാഴ്ചകള് നടത്തിയ സാഹചര്യത്തിലാണ് ഗോവ മുഖ്യമന്ത്രി കേന്ദ്രമന്ത്രിസഭയിലേക്ക് എത്തുന്ന വാര്ത്തകള് സജീവമായത്. ഇരു നേതാക്കളുമായി നടത്തിയ കൂടിക്കാഴ്ചയുടെ വിശദാംശങ്ങള് നല്കാനാവില്ലെന്ന് മനോഹര് പരീഖര് ഇതുസംബന്ധിച്ച ചോദ്യങ്ങള്ക്ക് മാധ്യമങ്ങളോട് മറുപടി നല്കി.
ഗോവയിലെ ബിജെപി നേതൃത്വവും മനോഹര് പരീഖര് കേന്ദ്രമന്ത്രിസഭയിലേക്കെന്ന സൂചനകള് വ്യക്തമാക്കി. പ്രധാനമന്ത്രി പോലെ ഉന്നതനായ വ്യക്തി മന്ത്രിസഭയിലേക്ക് ക്ഷണിച്ചാല് വേണ്ടെന്ന് പറയാന് മനോഹര് പരീഖര്ക്ക് ആവില്ലെന്ന് ഗോവയിലെ ബിജെപി നേതാവ് വില്ഫ്രഡ് മെസ്ക്വിറ്റ പറഞ്ഞു. അങ്ങനെയെങ്കില് ഗോവയിലും മന്ത്രിസഭാ പുനഃസംഘടനയുണ്ടാകും.
