കോട്ടയം: അസംഘടിതമേഖലയില് കാര്യമായ വേരോട്ടം സിഐടിയുവിന് നടത്താന് കഴിഞ്ഞില്ലെന്ന് വിമര്ശനം. കോട്ടയത്ത് നടക്കുന്ന സംസ്ഥാന കൗണ്സിലില് അവതരിപ്പിച്ച പ്രവര്ത്തന റിപ്പോര്ട്ടിലാണ് ഈ സ്വയംവിമര്ശനമുള്ളത്. അസംഘ ടിതമേഖല പ്രത്യേകിച്ച് ഐടി മേഖലയില് സംഘടനാ പ്രവര്ത്തനം സിഐടിയുവിന് ഇല്ലെന്നും ഐടി കേന്ദ്രങ്ങളായ ടെക്നോപാര്ക്കിലും ഇന്ഫോപാര്ക്കിലും യൂണിയന് രൂപീകരിക്കണമെന്ന പ്രവര്ത്തന പദ്ധതിയും സംസ്ഥാന ജനറല്സെക്രട്ടറി എളമരം കരീം അവതരിപ്പിച്ച റിപ്പോര്ട്ടിലുണ്ട്.ആഗ്രഹിക്കുന്ന തരത്തില് ഐടിമേഖലയില് കടന്നുകയറി സംഘടനാ പ്രവര്ത്തനം നടത്താന് സിഐടിയുവിന് സാധിച്ചിട്ടില്ലെന്ന് സംസ്ഥാനസെക്രട്ടറി കെ.ചന്ദ്രന്പിള്ള പിന്നീട് നടത്തിയ പത്രസമ്മേളനത്തില് സമ്മതിക്കുകയും ചെയ്തു.
സംഘടനാ പ്രവര്ത്തനത്തിലും സംവിധാനത്തിലും വീഴ്ച സംഭവിച്ചിട്ടുണ്ടെന്നും പൊതുസ്വകാര്യ മേഖലകളില് സിഐടിയുവിന്റെ സ്വാധീനം കുറയുകയാണെന്നും റിപ്പോര്ട്ട് സമ്മതിക്കുന്നു. അംഗത്വത്തില് കാര്യമായ വര്ധനവുണ്ടാക്കാന് കഴിഞ്ഞിട്ടില്ലെന്നും പ്രവര്ത്തന റിപ്പോര്ട്ട് പറയുന്നു. സിഐടിയു സംഘടിപ്പിക്കുന്ന പൊതുപരിപാടികളില് തൊഴിലാളികളുടെ പങ്കാളിത്തം വളരെ കുറയുന്നത് ജില്ലാ കമ്മറ്റികളുടെ കുറ്റകരമായ അനാസ്ഥയായിട്ടാണ് നേതൃത്വം കാണുന്നത്. സംസ്ഥാന ജനറല് കൗണ്സിലിന്റെ ഭാഗമായി കോട്ടയം തിരുനക്കര മൈതാനിയില് നടന്ന പൊതുസമ്മേളനത്തില് നേതൃത്വം കണക്കുകൂട്ടിയ നിലയില് തൊഴിലാളികള് പങ്കെടുക്കാതിരുന്നതും ജനറല് കൗണ്സിലില് ഉന്നയിക്കപ്പെടുകയുണ്ടായി. സിഐടിയുവിന്റെ സ്ഥാപകദിനം പോലും വേണ്ടത്ര നിലയില് കൊണ്ടാടുന്നതില് ജില്ലാ കമ്മറ്റികള് പരാജയമാണെന്നും റിപ്പോര്ട്ടില് പരാമര്ശിക്കുന്നുണ്ട്.
മിന്നല് പണിമുടക്കുപോലുള്ള സമരങ്ങളെ സിഐടിയു പ്രോത്സാഹിപ്പിക്കുന്നില്ലെന്നും നിരുത്സാഹപ്പെടുത്തുമെന്നും ഇതു സംബന്ധിച്ച റിപ്പോര്ട്ടിലെ പരാമര്ശങ്ങളോട് പ്രതികരിക്കവേ കെ.ചന്ദ്രന് പിള്ള പറഞ്ഞു. മൂന്നുദിവസത്തെ ജനറല് കൗണ്സില് ഇന്ന് സമാപിക്കും.
