മമതാരൂപോളഹംബുദ്ധിഃ കൃതജ്ഞതഃ കാമമോഹിതഃ
നാനാമൂര്ത്തിധരോ ധീരോ ഭിന്നദേവസ്വരൂപധൃകുതഃ
752. കാമമോഹിതഃ – കാമംകൊണ്ടു മോഹിച്ചവന്. ഭഗവാനു കാമങ്ങളില്ല. കാമം ആഗ്രഹമാണ്. ഭഗവാന് ആഗ്രഹിക്കപ്പെടേണ്ടതായി ഒന്നുമില്ല. എങ്കിലും അവതാരകഥകളില് പ്രത്യേകിച്ച് കൃഷ്ണാവതാരത്തില്, ഭക്ഷണത്തിലും പാനീയത്തിലും കന്നുകാലികളിലും സ്ത്രീകളിലുമൊക്കെ കാമമുള്ളവനായി ഭഗവാന് അഭിനയിക്കുന്നുണ്ട്. കാമമോഹിതനാണെന്ന മോഹം നമുക്കുണ്ടാക്കി നമ്മെ മോഹിപ്പിക്കുന്നവന് എന്നു വ്യാഖ്യാനിക്കാം.
753. നാനാമൂര്ത്തിധരഃ – പല രൂപങ്ങള് സ്വീകരിച്ചവന് ലോകാരംഭത്തില് ഭഗവാന് ബ്രഹ്മാവ്, വിഷ്ണു, ശ്രീപരമേശ്വരന് എന്ന മൂന്നുമൂര്ത്തികളായി. അവരില് ബ്രഹ്മമൂര്ത്തി സൃഷ്ടിയുടെയും വിഷ്ണുമൂര്ത്തി സംരക്ഷയുടെയും ശിവമൂര്ത്തി സംഹാരത്തിന്റെയും അധികാരം ഏറ്റെടുത്തു. ഈ മൂര്ത്തികളുടെ നിരന്തരമായ പ്രവര്ത്തനമാണു പ്രപഞ്ചപ്രവര്ത്തനം. പ്രപഞ്ചത്തിന്റെ പ്രവര്ത്തനത്തിന് അധര്മ്മികള് തടസ്സമുണ്ടാക്കിയപ്പോള് രക്ഷയുടെ ചുമതലക്കാരനായ വിഷ്ണുഭഗവാന് മാത്സ്യം, കൂര്മ്മം, വരാഹം തുടങ്ങി അനേകമനേകം രൂപങ്ങള് ധര്മ്മസംസ്ഥാപനത്തിനായി സ്വീകരിക്കേണ്ടിവന്നു. ലോകങ്ങളും ലോകങ്ങളിലുള്ള സ്ഥാവര ജംഗമങ്ങളായ വസ്തുക്കളും ജീവികളുമെല്ലാം ഭഗവാന്റെ മൂര്ത്തികളാണെന്നും പറയാം.
754. ധീരഃ – ധീരന്. ധീരന് എന്ന പദത്തിന് ധൈര്യമുള്ളവന്, സ്ഥിരതയുള്ളവന്, ധിഷണയുള്ളവന്, ബലവാന്, വിദ്വാന് എന്നീ അര്ത്ഥങ്ങളുണ്ട്. ഇതെല്ലാം ഗുരുവായൂരപ്പനു ചേരുന്ന അര്ത്ഥങ്ങളാണ്. ഉദാഹരണങ്ങള്കൊണ്ട് സ്ഥാപിക്കേണ്ടതില്ല. ഉപാസക പക്ഷത്തില് തന്റെ ഭക്തര്ക്ക് ധൈര്യവും സ്ഥൈര്യവും ധിഷണയും ബലവും ജ്ഞാനവും കൊടുത്തനുഗ്രഹിക്കുന്നവന് എന്ന വ്യാഖ്യാനം മെച്ചം.
755. ഭിന്നദേവസ്വരൂപധൃക് – വേറെ വേറെ ദേവന്മാരുടെ സ്വരൂപം ധരിച്ചവന്. ഏകവും അദ്വൈതവുമായ പരബ്രഹ്മമാണു ഭഗവാന്. നിര്ഗുണവും നിരാകാരവും നിര്വികാരവുമായ ബ്രഹ്മത്തില് സൃഷ്ടിക്കാനുള്ള ആഗ്രഹം ഉണ്ടായപ്പോള് ത്രിമൂര്ത്തികളുണ്ടായി. ത്രിമൂര്ത്തികള് ഓരോരുത്തരും ത്രിഗുണങ്ങളില് ഓരോന്നിന്റെ മൂര്ത്തികളാണെന്നു പറയാം. ബ്രഹ്മാവ് രജോഗുണമൂര്ത്തിയും വിഷ്ണുസത്ത്വഗുണമൂര്ത്തിയും ശിവന് തമോഗുണമൂര്ത്തിയുമായി. പ്രപഞ്ചം രൂപപ്പെട്ടപ്പോള് നിരവധി ശക്തികള് ഉണ്ടായി. പ്രപഞ്ചശക്തികള് എന്ന് അവയെ വിളിക്കാം. വെളിച്ചവും ഇരുട്ടും തീയും കാറ്റും വെള്ളവും കടലുംപോലെ അനന്തവൈവിധ്യമുള്ള പ്രപഞ്ചശക്തികളെ നിയന്ത്രിക്കാനായി ത്രിമൂര്ത്തികള്ക്ക് നിരവധി ദേവന്മാരെ സൃഷ്ടിക്കേണ്ടിവന്നു. ഗുരുവായൂരപ്പന് തന്നെ വിവിധ ദേവന്മാരായി രൂപം സ്വീകരിച്ചു. അങ്ങനെ ഭഗവാന് സ്വീകരിച്ച ദേവസ്വരൂപങ്ങളില് ചിലത് തുടര്ന്നുള്ള നാമങ്ങളില് കാണാം.
ഡോ. ബി.സി.ബാലകൃഷ്ണന്
(തുടരും)
