ചങ്ങനാശേരി: ചങ്ങനാശേരി: സര്‍ഗക്ഷേത്ര കലാ സാംസ്‌കാരികകേന്ദ്രത്തിന്റെ ആഭിമുഖ്യത്തില്‍ ആറു ദിവസം നീണ്ടുനില്‍ക്കുന്ന കേരള സംഗീത നാടക അക്കാദമി ദക്ഷിണമേഖല അമച്വര്‍ നാടകോത്സവത്തിന്റെ ഉദ്ഘാടനം ചെത്തിപ്പുഴ ക്രിസ്തുജ്യോതി ഓഡിറ്റോറിയത്തിലെ ആലുംമൂടന്‍ നാടകവേദിയില്‍ തിരക്കഥാകൃത്ത് ജോണ്‍ പോള്‍ നിര്‍വഹിച്ചു. ഉപജീവനമാര്‍ഗമായല്ലാതെ, തൊഴിലായിട്ടല്ലാതെ വൈകാരികമായ ആഭിമുഖ്യംകൊണ്ട് നാടകവഴിയില്‍ സ്വന്തം ജീവിതം സമര്‍പ്പിക്കുന്ന കലാകാരന്മാരുടെ കൂട്ടായ്‌മയാണ് അമച്വര്‍ നാടകവേദികളെന്ന് ജോണ്‍ പോള്‍ പ്രസ്താവിച്ചു. അമച്വര്‍ നാടകപ്രസ്ഥാനത്തിന് നാടകകലയില്‍ ഏതു പരീക്ഷണവും നടത്താം. നാടകത്തിന്റെ ഏതു ജനുസിലും കൈവയ്‌ക്കാം. മറ്റു കലാമാധ്യമങ്ങളുടെ തള്ളിക്കയറ്റത്തില്‍ ക്ഷയോന്മുഖമായി അന്യം നിന്നുപോകുമായിരുന്ന അവസ്ഥയില്‍നിന്നും നാടകകലയെ കൈപിടിച്ചുയര്‍ത്തുന്ന ദൗത്യമാണ് കേരള സംഗീതനാടക അക്കാദമി നിര്‍വഹിക്കുന്നതെന്നും അദ്ദേഹം പ്രസ്താവിച്ചു. സി. എഫ്. തോമസ് എം.എല്‍.എ അദ്ധ്യക്ഷത വഹിച്ചു. സാഹിത്യ നാടകനിരൂപകന്‍ പ്രഫ. എം. തോമസ് മാത്യു മുഖ്യാതിഥിയായി പങ്കെടുത്ത ചടങ്ങില്‍ കേരള സംഗീതനാടക അക്കാദമി സെക്രട്ടറി ഡോ. പി. വി. കൃഷ്ണന്‍നായര്‍ ആമുഖപ്രഭാഷണവും സര്‍ഗക്ഷേത്ര രക്ഷാധികാരി ഫാ. പോള്‍ താമരശേരി സി.എം.ഐ അനുഗ്രഹപ്രഭാഷണവും നടത്തി. നാടക ചലച്ചിത്ര പ്രതിഭ ആലുംമൂടനെയും നാടക നടന്‍ ജോസ് ചെത്തിപ്പുഴയെയും അനുസ്മരിച്ചു സ്മരണാഞ്ജലി അര്‍പ്പിച്ചു. മുഖ്യാതിഥി സിനി ആര്‍ട്ടിസ്റ്റ് കലാഭവന്‍ പ്രജോദും കണ്‍വീനര്‍ ജിജി കോട്ടപ്പുറവും ആശംസകള്‍ അര്‍പ്പിച്ചു. സര്‍ഗക്ഷേത്ര ഡയറക്ടര്‍ ഫാ. അലക്‌സ് പ്രായിക്കളം സ്വാഗതവും സംഘാടകസമിതി ചെയര്‍മാന്‍ ജോസഫ് സി. ജെ. കൃതജ്ഞതയും പ്രകാശിപ്പിച്ചു.
തുടര്‍ന്ന് നാടകമത്സരത്തിലെ പ്രഥമനാടകം കൊച്ചി അതീതി സ്‌കൂള്‍ ഓഫ് പെര്‍ഫോമന്‍സിന്റെ അനന്തരം അവള്‍ അരങ്ങേറി.
