മൂവാറ്റുപുഴ: പാറമടയ്ക്ക് സമീപം ഒതുക്കിയിട്ടിരുന്ന ടിപ്പര് ലോറി സ്റ്റാര്ട്ട് ചെയ്ത അയല്സംസ്ഥാന തൊഴിലാളിയും വണ്ടിയുമടക്കം പാറമടയിലെ വെള്ളക്കെട്ടില് വീണു. മണിക്കൂറുകള്ക്ക് ശേഷം ഫയര്ഫോഴ്സിന്റെയും നാട്ടുകാരുടേയും സഹായത്തോടെ നൂറ് അടിയോളം താഴ്ചയില് മുങ്ങിപ്പോയ ലോറി പൊക്കിയെടുത്തു.
തൊഴിലാളിയെ കണ്ടെത്താന് കഴിഞ്ഞില്ല. കല്ക്കട്ട സ്വദേശി സെയ്തുള് (23) ആണ് വെള്ളത്തില് വീണത്. ഇന്നലെ ഉച്ചയ്ക്ക് 3മണിയോടെ മൂവാറ്റുപുഴ പായിപ്ര മാന്നാറിക്ക് സമീപമുള്ള പാറമടയിലണ് അപകടം. പാറമടയില് നിന്നും കല്ലൂകള് കയറ്റി പോകുന്ന ടിപ്പര് ലോറി ഉച്ചയൂണിനായി ഡ്രൈവര് ബിജു പാറമടയ്ക്ക് സമീപം പാര്ക്ക് ചെയ്തശേഷം ഊണ് കഴിക്കാന് പോയി. ഈ സമയം വാഹനത്തില് കയറിയ പാറമടയിലെ ഹെല്പ്പര് തൊഴിലാളിയായ സെയ്തുള് വണ്ടി സ്റ്റാര്ട്ട് ചെയ്യാന് ശ്രമിച്ചതോടെ നിയന്ത്രണം വിട്ട ലോറി വെള്ളത്തിലേക്ക് പതിക്കുകയായിരുന്നു. ക്യാബിനകത്ത് പെട്ടുപോയ സെയ്തുള് പുറത്ത് ചാടി വാഹനത്തിന്റെ ക്യാബിന്റെ മുകളില് പിടിച്ച് കൈ പൊക്കിയെങ്കിലും രക്ഷിക്കാന് ആരും സമീപത്തുണ്ടായിരുന്നില്ല. വാഹനം വെള്ളത്തില് നൂറടിയോളം താഴ്ചയിലേക്ക് പോയതിനാല് അടിയന്തര രക്ഷാപ്രവര്ത്തനം ചെയ്യാന് ഓടികൂടിയവര്ക്ക് കഴിഞ്ഞില്ല. ഇതോടെ സംഭവ സ്ഥലത്ത് ആയിരക്കണക്കിന് ആളുകളും തടിച്ചു കൂടി.
വിവരം അറിയിച്ചതിനെ തുടര്ന്ന് മൂവാറ്റുപുഴയില് നിന്ന് ഫയര്ഫോഴ്സ് സംഘവും മുങ്ങല്വിദഗ്ധരും സ്ഥലത്തെത്തി. ലോറി ഉയര്ത്താനും സെയ്തുളിനെ കണ്ടെത്താനുള്ള ശ്രമം ആരംഭിച്ചെങ്കിലും തൊഴിലാളിയെ കണ്ടെത്താനിയില്ല. വെള്ളത്തില് മുങ്ങി കണ്ടെത്തിയ ലോറി ക്രെയിന്റേയും ജെസിബിയുടേയും സഹായത്തോടെ മൂന്ന് മണിക്കൂര് പരിശ്രമത്തെ തുടര്ന്ന് ഉയര്ത്തിയ ശേഷം കരയ്ക്കെത്തിച്ചു. ഇതിന് ശേഷം 6.15ഓടെ ഫയര്ഫോഴ്സിന്റെ മുങ്ങല് വിദഗ്ധ സംഘമായ സ്ക്യൂബ ടീം സെയ്തുളിന് വേണ്ടി തെരച്ചില് നടത്തിയെങ്കിലും ഇരുട്ടായതിനാല് വൈകീട്ട് 7.30ഓടെ അവസാനിപ്പിക്കുകയാണ് ചെയ്തത്. തെരച്ചില് ഇന്ന് രാവിലെ 7മണിയോടെ ആരംഭിക്കും. ആലുവയില് നിന്ന് രണ്ടംഗ മുങ്ങല് സംഘവും സ്ഥലത്തെത്തും. മൂവാറ്റുപുഴ ഫയര്ഫോഴ്സിന്റെ സ്ക്യൂബ ടീമിന്റെ നേതൃത്വത്തിലാണ് പരിശോധന നടക്കുന്നത്. ജില്ലയിലെ വിവിധ ഫയര്സ്റ്റേഷനുകളില് നിന്നുമുള്ള സംഘമാണ് ഇവിടെ എത്തിച്ചേര്ന്നിരുന്നത്. മൂവാറ്റുപുഴ ആര്ടിഒ പി.എന്. സന്തോഷ് സ്ഥലത്തെത്തി രക്ഷാപ്രവര്ത്തനങ്ങള്ക്ക് നേതൃത്വം നല്കി. മൂവാറ്റുപുഴ സിഐ വിശാല് ജോണ്സണ്, എസ്ഐ ഗോപകുമാര്, എഎസ്ഐമാര് അടക്കം വന് പോലീസ് സംഘവും സ്ഥലത്തെത്തിയിരുന്നു.
