കോട്ടയം: എന്‍എസ്എസ് ശതാബ്ദി ആഘോഷിക്കുന്ന ഈ വര്‍ഷം സംഘടനാ പ്രവര്‍ത്തനം കരയോഗതലത്തില്‍ ശക്തിപ്പെടുത്തുമെന്ന് എന്‍എസ്എസ് ഡയറക്ടര്‍ ബോര്‍ഡംഗവും യൂണിയന്‍ പ്രസിഡന്റുമായ ഹരികുമാര്‍ കോയിക്കല്‍ പറഞ്ഞു. ചങ്ങനാശേരി താലൂക്ക് എന്‍എസ്എസ് യൂണിയന്‍ നടത്തിയ കരയോഗ നേതൃസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. യോഗത്തില്‍ യൂണിയന്‍ ഔദ്യോഗിക വെബ്‌സൈറ്റിന്റെയും വിവാഹബ്യൂറോയുടെയും ഉദ്ഘാടനം അദ്ദേഹം നിര്‍വ്വഹിച്ചു. താലൂക്കിലെ മുഴുവന്‍ കരയോഗങ്ങളിലും എന്‍എസ്എസ് ശതാബ്ദി മേളകള്‍ സംഘടിപ്പിക്കുവാന്‍ യോഗം തീരുമാനിച്ചു.
യൂണിയന്‍ വൈസ് പ്രസഡന്റ് വി.ജി. ഭാസ്‌കരന്‍ നായര്‍ അദ്ധ്യക്ഷത വഹിച്ചു. യൂണിയന്‍ സെക്രട്ടറി എം.എന്‍. രാധാകൃഷ്ണന്‍ നായര്‍, യൂണിയന്‍ പഞ്ചായത്ത് കമ്മറ്റി പ്രസിഡന്റ് അഡ്വ. പുരുഷോത്തമന്‍ നായര്‍, യൂണിയന്‍ അഡീഷണല്‍ ഇന്‍സ്‌പെക്ടര്‍ എം.എസ്. രതീഷ്‌കുമാര്‍ എന്നിവര്‍ സംസാരിച്ചു.
വിവാഹപൂര്‍വ്വ
കൗണ്‍സിലിംഗ്
ചങ്ങനാശേരി: ചങ്ങനാശേരി താലൂക്ക് എന്‍എസ്എസ് യൂണിയന്‍ ഹ്യൂമന്‍ റിസോഴ്‌സസ് സെന്ററിന്റെ ആഭിമുഖ്യത്തില്‍ സംഘടിപ്പിക്കുന്ന ദ്വിദിന വിവാഹ പൂര്‍വ്വ കൗണ്‍സിലിംഗ് 17, 18 തീയതികളില്‍ പെരുന്ന യൂണിയന്‍ ഓഡിറ്റോറിയത്തില്‍ നടക്കും. 17ന് രാവിലെ 9.30ന് എന്‍എസ്എസ് ഡയറക്ടര്‍ ബോര്‍ഡ് മെമ്പറും താലൂക്ക് യൂണിയന്‍ പ്രസിഡന്റുമായ ഹരികുമാര്‍ കോയിക്കല്‍ പരിപാടി ഉദ്ഘാടനം ചെയ്യും. യൂണിയന്‍ വൈസ് പ്രസിഡന്റ് വി.ജി. ഭാസ്‌കരന്‍ നായര്‍ അദ്ധ്യക്ഷത വഹിക്കും. 18ന് വൈകിട്ട് 4.30ന് നടക്കുന്ന സമാപനയോഗത്തില്‍ എന്‍എസ്എസ് ഹ്യൂമന്‍ റിസോഴ്‌സസ് ഡിപ്പാര്‍ട്ട്‌മെന്റ് സെക്രട്ടറി കെ.ആര്‍. രാജന്‍ സര്‍ട്ടിഫിക്കറ്റ് വിതരണം നിര്‍വ്വഹിക്കും. പേര് രജിസ്റ്റര്‍ ചെയ്തവര്‍ കൃത്യസമയത്തുതന്നെ എത്തിച്ചേരണമെന്ന് യൂണിയന്‍ സെക്രട്ടറി എം.എന്‍. രാധാകൃഷ്ണന്‍ നായര്‍ അറിയിച്ചു.
