മാഡ്രിഡ്: യുവേഫ ചാമ്പ്യന്സ് ലീഗിന്റെ ക്വാര്ട്ടര് ഫൈനലില് കരുത്തരായ ബാഴ്സലോണെ കെട്ടുകെട്ടിച്ച അത്ലറ്റികോ മാഡ്രിഡ് ലാ ലിഗയിലും കിരീടം ലക്ഷ്യമിട്ട് കുതിക്കുന്നു. ഇന്നലെ പുലര്ച്ചെ അവസാനിച്ച ലീഗിലെ 33-ാം മത്സരത്തില് മറുപടിയില്ലാത്ത രണ്ട് ഗോളുകള്ക്ക് ഗറ്റാഫെയെ അത്ലറ്റികോ കീഴടക്കി.
40-ാം മിനിറ്റില് ഡീഗോ ഗോഡിനും എണ്പത്തി നാലാം മിനിറ്റില് സൂപ്പര്താരം ഡീഗോ കോസ്റ്റയുമാണ് അത്ലറ്റികോ മാഡ്രിഡിന്റെ ഗോളുകള് നേടിയത്. മത്സരത്തില് ഡീഗോ കോസ്റ്റ ഒരു പെനാല്റ്റി നഷ്ടപ്പെടുത്തുകയും ചെയ്തു. 64-ാം മിനിറ്റിലാണ് കോസ്റ്റ പെനാല്റ്റി നഷ്ടപ്പെടുത്തിയത്. മിറാന്ഡയെ ബോക്സിനുള്ളില് ചവിട്ടി വീഴ്ത്തിയതിനാണ് പെനാല്റ്റി ലഭിച്ചത്. ഈ ഫൗളിന് ഗറ്റാഫെയുടെ ഏഞ്ചല് ലാഫിറ്റക്ക് ചുവപ്പ് കാര്ഡും ലഭിച്ചു. പിന്നീട് പത്തുപേരുമായാണ് ഗറ്റാഫെ കളിച്ചത്. എന്നാല് മത്സരത്തിനിടെ ഡീഗോ കോസ്റ്റ്ക്ക് പരിക്കേറ്റത് അത്ലറ്റികോക്ക് വന് തിരിച്ചടിയായി.
തുടക്കം മുതല് എതിര് പോസ്റ്റ് ലക്ഷ്യം വെച്ച് അത്ലറ്റികോ താരങ്ങള് നിരവധി മുന്നേറ്റങ്ങളാണ് നടത്തിയത്. തുടര്ച്ചയായ മുന്നേറ്റങ്ങള്ക്കൊടുവില് 40-ാം മിനിറ്റില് അവര് ലീഡ് നേടുകയും ചെയ്തു. ജുവാന്ഫ്രാന്സിന്റെ ക്രോസ് നല്ലൊരു ഹെഡ്ഡറിലൂടെയാണ് ഗോഡിന് ഗറ്റാഫെ വല കുലുക്കിയത്. പിന്നീട് 84-ാം മിനിറ്റില് കോസ്റ്റയിലൂടെ അത്ലറ്റികോ ലീഡ് ഉയര്ത്തി. അഡ്രിയാന്റെ പാസില് നിന്നാണ് കോസ്റ്റ വല കുലുക്കിയത്.
തൊട്ടുപിന്നാലെയാണ് കോസ്റ്റക്ക് പരിക്കേറ്റത്. ഗോള് നേടാനുള്ള ശ്രമത്തിനിടെ പോസ്റ്റിലിടിച്ച കോസ്റ്റയുടെ കാലിനാണ് പരിക്കേറ്റത്. ഗ്രൗണ്ടില് വീണു കിടന്ന താരത്തെ സ്ട്രെക്ചറിലാണ് പുറത്തേക്ക് കൊണ്ടു പോയത്. പരുക്ക് ഗുരുതരമാണെങ്കില് ചാമ്പ്യന്സ് ലീഗ് സെമി ബെര്ത്ത് ഉറപ്പിച്ച അത്ലറ്റികോക്ക് കോസ്റ്റയുടെ അഭാവം തിരിച്ചടിയാകും. ഏപ്രില് 22നാണ് അത്ലറ്റികൊ മാഡ്രിഡും ചെല്സിയുമായുള്ള ആദ്യപാദ സെമി ഫൈനല്.
ജയത്തോടെ അത്ലറ്റികൊയ്ക്ക് 82 പോയിന്റായി. 79 പോയിന്റുള്ള റയല് മാഡ്രിഡാണ് ലീഗില് രണ്ടാം സ്ഥാനത്ത്. 78പോയിന്റുമായി നിലവിലെ ചാമ്പ്യന്മാരായ ബാഴ്സ മൂന്നാമതാണ്.
മറ്റൊരു മത്സരത്തില് സെവിയ മറുപടിയില്ലാത്ത രണ്ട് ഗോളുകള്ക്ക് റയല് ബെറ്റിസിനെ പരാജയപ്പെടുത്തി. 27-ാം മിനിറ്റില് ബെറ്റിസിന്റെ പെരസ് ലോപ്പസ് ചുവപ്പുകാര്ഡ് കണ്ട് പുറത്തുപോയ ശേഷം 10 പേരുമായി കളിച്ച ബെറ്റിസിനെ ഗമീറോയുടെ ഇരട്ട ഗോളുകള്ക്കാണ് സെവിയ കീഴടക്കിയത്. മറ്റ് മത്സരങ്ങളില് വലന്സിയ ഒന്നിനെതിരെ രണ്ട് ഗോളുകള്ക്ക് എല്ഷയെ പരാജയപ്പെടുത്തിയപ്പോള് എസ്പാനിയോള്-റയോ വയ്യക്കാനോ പോരാട്ടം 2-2ന് സമനിലയില് കലാശിച്ചു.
