സില്ഹട്ട്: ട്വന്റി 20 ലോകകപ്പിന്റെ അവസാന യോഗ്യതാ മത്സരത്തില് സിംബാബ്വേ സൂപ്പര് ടെന്നില് പ്രവേശിക്കാതെ പുറത്തായി. ഇന്നലെ നടന്ന ഗ്രൂപ്പ് ബിയിലെ ആദ്യ മത്സരത്തില് യുഎഇയെ അഞ്ച് വിക്കറ്റ് പരാജയപ്പെടുത്തി സൂപ്പര് ടെന് പ്രവേശന സാധ്യത നിലനിര്ത്തിയെങ്കിലും രണ്ടാം മത്സരത്തില് നെതര്ലാന്റ്സ് അയര്ലന്റിനെതിരെ അത്ഭുതവിജയം നേടിയതോടെയാണ് സിംബാബ്വെക്ക് പുറത്തേക്കുള്ള വഴിതുറന്നത്. ഒരു മത്സരം പോലും ജയിക്കാന് കഴിയാതെയാണ് യുഎഇയുടെ മടക്കവും.
ആദ്യം ബാറ്റ് ചെയ്ത യുഎഇ ഉയര്ത്തിയ 117 റണ്സ് വിജയലക്ഷ്യം 13.4 ഓവറില് അഞ്ചു വിക്കറ്റ് നഷ്ടത്തില് സിംബാബ്വേ മറികടന്നു. 21 പന്തില് പുറത്താകാതെ 53 റണ്സെടുത്ത ചിഗുംബുരയാണ് സിംബാബ്വേയുടെ വിജയശില്പി. ആറ് ഫോറുകളും മൂന്ന് കൂറ്റന് സിക്സറുകളും ചിഗുംബുരയുടെ ഇന്നിംഗ്സിന് കരുത്തു പകര്ന്നു. 14 പന്തില് 22 റണ്സെടുത്ത ടിമിസെന് മറൂമ ചിഗുംബുരയ്ക്ക് മികച്ച പിന്തുണ നല്കി. ഇരുവരും ചേര്ന്ന് ആറാംവിക്കറ്റില് 53 റണ്സിന്റെ അപരാജിത കൂട്ടുകെട്ട് പടുത്തുയര്ത്തി. സിബാന്ഡ 16ഉം ബ്രണ്ടന് ടെയ്ലര് 15ഉം റണ്സെടുത്തു. യുഎഇക്കുവേണ്ടി മഞ്ജുള ഗുരുഗെ 18 റണ്സ് വഴങ്ങി രണ്ടു വിക്കറ്റ് വീഴ്ത്തി. ചിഗുംബുരയാണ് മാന് ഓഫ് ദ മാച്ച്.
നേരത്തേ ടോസ് നഷ്ടപ്പെട്ട് ബാറ്റിംഗിനിറങ്ങിയ യുഎഇയ്ക്ക് എട്ടു റണ്സ് ചേര്ക്കുന്നതിനിടെ ഓപ്പണര്മാരെ നഷ്ടമായി. മൂന്നാം വിക്കറ്റില് ഖുറാം ഖാനും സ്വപ്നില് പാട്ടീലും ചേര്ന്ന് നേടിയ 58 റണ്സിന്റെ കൂട്ടുകെട്ടാണ് വന് തകര്ച്ചയില് നിന്ന് ടീമിനെ കരകയറ്റിയത്. 30 റണ്സെടുത്ത സ്വപ്നില് പാട്ടീലാണ് യുഎഇ നിരയിലെ ടോപ് സ്കോറര്. ഖുറാം ഖാന് 25 റണ്സെടുത്തു. വാലറ്റത്ത് 15 പന്തുകളില് നിന്ന് രണ്ടു സിക്സറുകളും ഒരു ഫോറുമായി 21 റണ്സെടുത്ത കമ്രാന് ഷസാദ് നടത്തിയ മിന്നല് പ്രകടനമാണ് സ്കോര് നൂറുകടത്തിയത്. സിംബാബ്വേക്ക് വേണ്ടി സീന് വില്ല്യംസ് നാമൂന്നു വിക്കറ്റ് വീഴത്തി.
