ലണ്ടന്: യൂറോപ്പ ലീഗ് ഫുട്ബോളിന്റെ ആദ്യപാദ പ്രീ ക്വാര്ട്ടര് ഫൈനലില് ടോട്ടനം, നാപ്പോളി, സെവിയ തുടങ്ങിയ പ്രമുഖര് പരാജയപ്പെട്ടപ്പോള് വലന്സിയ, റയല് ബെറ്റിസ്, എഫ്സി പോര്ട്ടോ തുടങ്ങിയവര് വിജയം സ്വന്തമാക്കി.
സ്വന്തം തട്ടകത്തില് ടോട്ടനം ബെനിഫിക്കയോടാണ് ദയനീയ തോല്വി ഏറ്റുവാങ്ങിയത്. ഒന്നിനെതിരെ മൂന്ന് ഗോളുകള്ക്കായിരുന്നു ബെനഫിക്ക പ്രീമിയര് ലീഗ് ടീമിനെ തകര്ത്തുവിട്ടത്. പന്ത് കൂടുതല് സമയം കൈവശംവച്ചെങ്കിലും ഷൂട്ടിംഗിലെ പിഴവാണ് ടോട്ടനത്തിന് തിരിച്ചടിയായത്. തുടക്കത്തില് ഇരുടീമുകളും ചില മികച്ച മുന്നേറ്റങ്ങള് നടത്തിയെങ്കിലും ആദ്യം ലക്ഷ്യം കണ്ടത് ബെനഫിക്കയാണ്. 29-ാം മിനിറ്റില് റൂബന് അമോറിം നല്കിയ പാസ് സ്വീകരിച്ച് റോഡ്രിഗോ ഇടംകാലുകൊണ്ട് പായിച്ച ഷോട്ടാണ് ടോട്ടനം വലയില് പതിച്ചത്. പിന്നീട് ആദ്യപകുതിയില് ലീഡ് ഉയര്ത്താന് ബെനഫിക്കക്കോ സമനില ഗോള് നേടാന് ടോട്ടനത്തിനോ കഴിഞ്ഞില്ല. മത്സരത്തിന്റെ 58-ാം മിനിറ്റിലാണ് മത്സരത്തിലെ രണ്ടാം ഗോള് പിറന്നത്. ബെനഫിക്കയുടെ റൂബന് അമോറിം നല്കിയ ക്രോസ് നല്ലൊരു ഹെഡ്ഡറിലൂടെ ലൂയിസാവോയാണ് ടോട്ടനം വലയിലെത്തിച്ചത്. പിന്നീട് 64-ാം മിനിറ്റില് ടോട്ടനം ഫ്രീകിക്കിലൂടെ ഒരു ഗോള് മടക്കി. ക്രിസ്റ്റ്യന് എറിക്സണ് എടുത്ത ഫ്രീകിക്ക് ബെനഫിക്ക പ്രതിരോധമതിലിന് മുകളിലൂടെ വളഞ്ഞിറങ്ങി വലയില് പതിക്കുകയായിരുന്നു. 83-ാം മിനിറ്റില് ലൂയിസാവോയിലൂടെ ബെനഫിക്ക മൂന്നാമതും ടോട്ടനം വലകുലുക്കിയതോടെ അവരുടെ ഗോള്പട്ടിക പൂര്ത്തിയായി. തകര്പ്പന് വിജയത്തോടെ ബെനഫിക്ക ക്വാര്ട്ടര് ഫൈനല് ഏറെക്കുറെ ഉറപ്പാക്കിയിരിക്കുകയാണ്. മറിച്ച് സംഭവിക്കണമെങ്കില് ടോട്ടനത്തിന് 20ന് നടക്കുന്ന രണ്ടാം പാദപോരാട്ടത്തില് മറുപടിയില്ലാത്ത നാല് ഗോളുകള്ക്കെങ്കിലും വിജയിക്കണം.
സ്പാനിഷ് ക്ലബുകള് ഏറ്റുമുട്ടിയ മത്സരത്തില് റയല് ബെറ്റിസ് എവേ മത്സരത്തില് മറുപടിയില്ലാത്ത രണ്ട് ഗോളുകള്ക്ക് സെവിയയെ തകര്ത്ത് ക്വാര്ട്ടര് പ്രതീക്ഷ സജീവമാക്കി. 15-ാം മിനിറ്റില് ബാപ്റ്റിസ്റ്റോയും 77-ാം മിനിറ്റില് സെവില്ല ലോപ്പസുമാണ് ബെറ്റിസിന്റെ ഗോളുകള് നേടിയത്. രണ്ടാം പാദത്തില് മറുപടിയില്ലാത്ത മൂന്ന് ഗോളുകള്ക്ക് ബെറ്റിസിനെ പരാജയപ്പെടുത്തിയാലേ സെവിയക്ക് അവസാന എട്ടില് ഇടംപിടിക്കാന് കഴിയൂ.
മറ്റൊരു മത്സരത്തില് ലിയോണ് ഒന്നിനെതിരെ നാല് ഗോളുകള്ക്ക് വിക്ടോറിയ പ്ലസനെ കീഴടക്കിയപ്പോള് ഇറ്റാലിയന് ക്ലബുകള് തമ്മിലുള്ള പോരാട്ടം സമനിലയില് കലാശിച്ചു. ജുവന്റസും ഫിയോറന്റീനയും തമ്മില് നടന്ന മത്സരമാണ് 1-1ന് സമനിലയില് പിരിഞ്ഞത്. ജുവന്റസിന് വേണ്ടി വിദാലും ഫിയോറന്റീനക്ക് വേണ്ടി ഗോമസും ഗോള് നേടി.
മറ്റൊരു മത്സരത്തില് എഫ്സി പോര്ട്ടോയാണ് സീരി എ ടീമായ നാപ്പോളിയെ 1-0ന് പരാജയപ്പെടുത്തിയത്. സ്വന്തം ഗ്രൗണ്ടില് നടന്ന പോരാട്ടത്തില് ജാക്സണ് മാര്ട്ടിനസാണ് പോര്ട്ടോയുടെ വിജയഗോള് നേടിയത്.
മറ്റ് മത്സരങ്ങളില് വലന്സിയ 3-0ന് ലുഡോഗൊരറ്റ്സ് റാസ്ഗാര്ഡിനെയും അല്കമാര് 1-0ന് അന്ഷി മകാചകാലയെയും പരാജയപ്പെടുത്തിയപ്പോള് ബാസല്-റെഡ് ബുള് പോരാട്ടം ഗോള്രഹിത സമനിലയില് കലാശിച്ചു.
