മ്യൂണിക്ക്: നിലവിലെ ചാമ്പ്യന്മാരായ ബയേണ് മ്യൂണിക്കിനെ സമനിലയില് തളച്ചിട്ടും ആഴ്സണല് ചാമ്പ്യന്സ്ലീഗ് ഫുട്ബോളില് നിന്ന് പുറത്തായി. ആദ്യ പാദത്തില് നേടിയ 2-0ന്റെ വിജയമാണ് ബയേണിനെ ക്വാര്ട്ടറിലേക്ക് നയിച്ചത്. അലയന്സ് അരീനയില് നടന്ന രണ്ടാംപാദം 1-1ന് സമനിലയില് കലാശിച്ചു. ഇതോടെ ഇരുപാദങ്ങളിലുമായി 3-1ന്റെ വിജയത്തോടെയാണ് ജര്മ്മന് ടാങ്കുകള് അവസാന എട്ടില് ഇടംപിടിച്ചത്. മറ്റൊരു മത്സരത്തില് ഇറ്റാലിയന് ക്ലബ് എസി മിലാനെ ഒന്നിനെതിരെ നാല് ഗോളുകള്ക്ക് തകര്ത്ത് സ്പാനിഷ് കരുത്തരായ അത്ലറ്റികോ മാഡ്രിഡും ക്വാര്ട്ടറില് പ്രവേശിച്ചു. ആദ്യപാദത്തില് 1-0ന് വിജയിച്ച അത്ലറ്റികോ ഇരുപാദങ്ങളിലുമായി 5-1ന്റെ വിജയമാണ് കരസ്ഥമാക്കിയത്.
ജര്മ്മനിയിലെ അലയന്സ് അരീനയില് ആഴ്സണലിനെതിരെ നടന്ന പോരാട്ടത്തില് ആധിപത്യം ബയേണിനുതന്നെയായിരുന്നു. മത്സരത്തിന്റെ മൂന്നാം മിനിറ്റില് ബോക്സിന് പുറത്തുനിന്ന് ബാസ്റ്റിന് ഷ്വയ്ന്സ്റ്റീഗര് ഉതിര്ത്ത ലോംഗ്റേഞ്ച് ഷോട്ട് നേരെ ആഴ്സണല് ഗോളിയുടെ കയ്യിലേക്കായിരുന്നു. 18-ാം മിനിറ്റില് ഷ്വയ്ന്സ്റ്റീഗറുടെ മറ്റൊരു ഷോട്ടും വിഫലമായി. തൊട്ടടുത്ത മിനിറ്റില് ഇടതുവിംഗില്ക്കൂടി കയറി ഫ്രാങ്ക് റിബറി നല്കിയ ക്രോസ് നിലം തൊടുംമുന്നേ അര്ജന് റോബന് വലയിലേക്ക് തിരിച്ചുവിട്ടത് ക്രോസ് ബാറിന് മുകളിലൂടെ പറന്നു. 31-ാം മിനിറ്റിലാണ് ആഴ്സണലിന് ആദ്യ സുവര്ണാവസരം കൈവന്നത്. മെസ്യൂട്ട് ഓസിലിന്റെ ക്രോസ് ഒളിവര് ഗിറൗഡ് ഉജ്ജ്വലമായ ഹെഡ്ഡറിലൂടെ വലയിലേക്ക് തിരിച്ചുവിട്ടെങ്കിലും ബയേണ് ഗോളി മാനുവല് ന്യുയര് മുഴുനീളെ ഡൈവിംഗിലൂടെ പന്ത് കയ്യിലൊതുക്കി. തുടര്ന്നും ഇരുടീമുകളും മികച്ച ചില മുന്നേറ്റങ്ങളുമായി എതിര് ഗോള്മുഖത്തേക്ക് റെയ്ഡ് നടത്തിയെങ്കിലും ആദ്യപകുതിയില് ഗോള് പിറന്നില്ല.
രണ്ടാം പകുതി ആരംഭിച്ചത് ആഴ്സണല് മെസ്യൂട്ട് ഓസിലിനെ പിന്വലിച്ച് തോമസ് റോസിക്കിയെ കളത്തിലിറക്കിക്കൊണ്ടായിരുന്നു. പിന്തുടയിലെ ഞരമ്പിനേറ്റ പരിക്കിനെ തുടര്ന്നാണ് ആഴ്സണ് വെംഗര് ഓസിലിനെ പിന്വലിച്ചത്. പരിക്കേറ്റതോടെ ഓസിലിന് ഏതാനും ആഴ്ചകള് കളത്തില് നിന്ന് വിട്ടുനില്ക്കേണ്ടിവരും. 54-ാം മിനിറ്റില് ബയേണിന്റെ മരിയോ മാന്സുകിച്ചിന്റെ ഒരു ഹെഡ്ഡറും ലക്ഷ്യത്തിലെത്തിയില്ല. തൊട്ടടുത്ത മിനിറ്റില് ബയേണ് ലീഡ് നേടി. ഫ്രാങ്ക് റിബറി നല്കിയ പാസില് നിന്ന് ബാസ്റ്റിന് ഷ്വയ്ന്സ്റ്റീഗറാണ് ആഴ്സണല് വലയില് പന്തെത്തിച്ചത്. എന്നാല് രണ്ട് മിനിറ്റിനുശേഷം ആഴ്സണല് സമനില പിടിച്ചു. പന്തുമായി ബോക്സിനുള്ളില് പ്രവേശിച്ച ശേഷം ഏറെക്കുറെ അസാധ്യമായ ആംഗിളില് നിന്ന് ലൂക്കാസ് പൊഡോള്സ്കി ഇടംകാലുകൊണ്ട് പായിച്ച കനത്ത അടിയാണ് ബയേണ് വലയില് കയറിയത്. പിന്നീട് അവസാന മിനിറ്റില് ബയേണിന് ഒരു പെനാല്റ്റി ലഭിച്ചെങ്കിലും തോമസ് മുള്ളര് എടുത്ത കിക്ക് ആഴ്സണല് ഗോളി രക്ഷപ്പെടുത്തിയതോടെ സ്വന്തം മണ്ണില് വിജയമെന്ന അവരുടെ സ്വപ്നം പൊലിഞ്ഞു.
മാഡ്രിഡില് നടന്ന മറ്റൊരു മത്സരത്തില് സൂപ്പര്താരം ഡീഗോ കോസ്റ്റയുടെ ഇരട്ടഗോളുകളുടെ കരുത്തിലാണ് അത്ലറ്റികോ മാഡ്രിഡ് എസി മിലാനെ തകര്ത്തുവിട്ടത്. മൂന്നാം മിനിറ്റിലും 85-ാം മിനിറ്റിലും ഗോള് നേടിയ ഡീഗോ കോസ്റ്റക്ക് പുറമെ 40-ാം മിനിറ്റില് ടുറാനും 70-ാം മിനിറ്റില് റൗള് ഗാര്ഷ്യയും അത്ലറ്റികോക്ക് വേണ്ടി ഗോളുകള് നേടി. 27-ാം മിനിറ്റില് മുന് ലോക ഫുട്ബോളര് കാകയാണ് എസി മിലാന്റെ ആശ്വാസഗോള് നേടിയത്.
