ആന്റ്വിഗ: വെസ്റ്റിന്ഡീസിനെതിരായ ഏകദിന പരമ്പര ഇംഗ്ലണ്ട് സ്വന്തമാക്കി. മൂന്ന് മത്സരങ്ങളുടെ പരമ്പര 2-1നാണ് ഇംഗ്ലണ്ട് നേടിയത്. മൂന്നാം ഏകദിനത്തില് ഇംഗ്ലണ്ട് 25 റണ്സിന് വിജയിച്ചു. ആദ്യ ഏകദിനം വിന്ഡീസും രണ്ടാമത്തേത് ഇംഗ്ലണ്ടും വിജയിച്ചിരുന്നു. ആദ്യം ബാറ്റ് ചെയ്ത ഇംഗ്ലണ്ട് 107 റണ്സെടുത്ത ജോ റൂട്ടിന്റെയും 99 റണ്സെടുത്ത ബട്ട്ലറുടെയും 55 റണ്സെടുത്ത മൊയീന് അലിയുടെയും മികച്ച ബാറ്റിംഗിന്റെ കരുത്തില് 50 ഓവറില് 6 വിക്കറ്റ് നഷ്ടത്തില് 303 റണ്സെടുത്തു. മറുപടി ബാറ്റിംഗിനിറങ്ങിയ വിന്ഡീസ് 47.4 ഓവറില് 278 റണ്സിന് ഓള് ഔട്ടായി. 128 റണ്സ് നേടിയ രാംദിന് മാത്രമാണ് വിന്ഡീസ് നിരയില് മികച്ച പ്രകടനം നടത്തിയത്. ഇംഗ്ലണ്ട് താരം ജോ റൂട്ടാണ് മത്സരത്തിലെയും പരമ്പരയിലെയും താരം.
ടോസ് നേടിയ വിന്ഡീസ് ഇംഗ്ലണ്ടിനെ ബാറ്റിംഗിനയക്കുകയായിരുന്നു. എന്നാല് 37 റണ്സെടുക്കുന്നതിനിടെ ലംപിനെയും (20), സ്റ്റോക്ക്സിനെയും (0) നഷ്ടപ്പെട്ട ഇംഗ്ലണ്ടിനെ മൂന്നാം വിക്കറ്റില് മൊയീന് അലിക്കൊപ്പം ചേര്ന്ന ജോ റൂട്ടാണ് വന് തകര്ച്ചയില് നിന്ന് കരകയറ്റിയത്. എന്നാല് സ്കോര് 115-ല് എത്തിയപ്പോള് അര്ദ്ധസെഞ്ച്വറിയുമായി മുന്നേറുകയായിരുന്ന അലിയെ മില്ലര് സ്വന്തം പന്തില് പിടികൂടി. ഒരു റണ്സ് കൂടി സ്കോര്ബോര്ഡില് കയറിയപ്പോഴേക്കും നാലാം വിക്കറ്റും ഇംഗ്ലണ്ടിന് നഷ്ടമായി. ഒരു റണ്സെടുത്ത മോര്ഗനെ നരേയ്ന് ബൗള്ഡാക്കി. എന്നാല് അഞ്ചാം വിക്കറ്റില് റൂട്ടിനൊപ്പം ബട്ട്ലര് ഒത്തുചേര്ന്നതോടെ വിന്ഡീസ് ബൗളിംഗിന്റെ മുനയൊടിഞ്ഞു. ഇരുവരും ചേര്ന്ന് 175 റണ്സാണ് കൂട്ടിച്ചേര്ത്തത്. ഒടുവില് സ്കോര് 291-ല് എത്തിയപ്പോള് 122 പന്തുകളില് 7 ബൗണ്ടറികളോടെ 107 റണ്സെടുത്ത റൂട്ടിനെ ഡ്വെയ്ന് ബ്രാവോയുടെ പന്തില് ഡാരന് ബ്രാവോ പിടികൂടിയതോടെ ഈ കൂട്ടുകെട്ട് പിരിഞ്ഞു. സ്കോര് 300-ല് എത്തിയപ്പോള് സെഞ്ച്വറിക്ക് ഒരു റണ് അകലെവച്ച് ബട്ട്ലറെ രാംപാല് സ്വന്തം പന്തില് പിടികൂടി. 84 പന്തില് 7 ഫോറും നാല് സിക്സറുമുള്പ്പെട്ടതായിരുന്നു ബട്ട്ലറുടെ ഇന്നിംഗ്സ്. വിന്ഡീസിന് വേണ്ടി ഡ്വെയ്ന് ബ്രാവോ മൂന്ന് വിക്കറ്റുകള് വീഴ്ത്തി. 304 റണ്സെന്ന കൂറ്റന് വിജയലക്ഷ്യത്തെ പിന്തുടര്ന്ന് മറുപടി ബാറ്റിംഗിനിറങ്ങിയ വെസ്റ്റിന്ഡീസിന് തുടക്കത്തിലേ തിരിച്ചടി നേരിട്ടു. സ്കോര്ബോര്ഡില് പത്ത് റണ്സ് മാത്രമുള്ളപ്പോള് ഓപ്പണര്മാരായ പവലിനെയും സ്മിത്തിനെയും നഷ്ടമായി. പിന്നീട് സ്കോര് 42-ല് നില്ക്കേ ഡാരന് ബ്രാവോയും 43-ല് നില്ക്കേ സിമണ്സും മടങ്ങിയതോടെ വിന്ഡീസ് നാലിന് 43 എന്ന നിലയിലായി. പിന്നീട് രാംദിന് ഒറ്റക്ക് വിന്ഡീസിനെ ചുമലിലേറ്റുകയായിരുന്നു. എന്നാല് മറ്റുള്ളവര്ക്കൊന്നും മികച്ച പിന്തുണ നല്കാനായില്ലെന്ന് മാത്രമല്ല കൃത്യമായ ഇടവേളകളില് വിക്കറ്റുകള് നഷ്ടമാകുകയും ചെയ്തു. 109 പന്തുകളില് നിന്ന് 12 ബൗണ്ടറികളും അഞ്ച് സിക്സറുമടക്കം 128 റണ്സെടുത്ത രാംദിന് പത്താമനായി പുറത്താവുകയും ചെയ്തതോടെ വിന്ഡീസ് പരാജയം ഏറ്റുവാങ്ങി. ഇംഗ്ലണ്ടിന് വേണ്ടി ബ്രസ്നന് മൂന്നും ബ്രോഡ് രണ്ടും വിക്കറ്റുകള് വീഴ്ത്തി.
