ഹൈദരാബാദ്: സെലിബ്രിറ്റി ക്രിക്കറ്റ് ലീഗ് കിരീടം കര്ണാടക ബുള്ഡോസേഴ്സിന്. ഫൈനലില് കേരള സ്ട്രൈക്കേഴ്സിനെ തകര്ത്താണ് കര്ണാടക ബുള്ഡോസേഴ്സ് കിരീടം നിലനിര്ത്തിയത്. 36 റണ്സിനായിരുന്നു കര്ണാടക താരങ്ങളുടെ വിജയം.
ആദ്യം ബാറ്റ് ചെയ്ത കര്ണാടക ബുള്ഡോസേഴ്സ് രാജിവീന്റെ വെടിക്കെട്ടു സെഞ്ചുറിയുടെ കരുത്തില് 20 ഓവറില് രണ്ട് വിക്കറ്റ് നഷ്ടത്തില് 211 റണ്സെടുത്തു. 42 പന്തില് 11 ബൗണ്ടറികളും അഞ്ച് സിക്സറുമടക്കം 112 റണ്സെടുത്ത് പുറത്താവാതെ നിന്ന രാജിവിന് 56 റണ്സെടുത്ത ധ്രുവ് മികച്ച പിന്തുണ നല്കി. മറുപടി ബാറ്റിംഗിനിറങ്ങിയ കേരള സ്ട്രൈക്കേഴ്സിന് 20 ഓവറില് 7 വിക്കറ്റ് നഷ്ടത്തില് 175 റണ്സെടുക്കാനേ കഴിഞ്ഞുള്ളൂ.
കൂറ്റന് ലക്ഷ്യത്തെ പിന്തുടര്ന്ന് മറുപടി ബാറ്റിങ്ങിനിറങ്ങിയ കേരളത്തിന് മികച്ച തുടക്കം നല്കാന് ഓപ്പണര്മാര്ക്ക് കഴിഞ്ഞില്ല. 48 പന്തില് നിന്ന് 8 ബൗണ്ടറികളും നാല് സിക്സറുകളുമടക്കം 78 റണ്സെടുത്ത നന്ദകുമാറും 30 റണ്സെടുത്ത സന്തോഷ് സ്ലീബയും മാത്രമാണ് മികച്ച പ്രകടനം നടത്തിയത്.
