ബംഗളൂരു: ഈ വര്ഷത്തെ ഐപിഎല് ലേലത്തില് പങ്കെടുത്ത മലയാളി താരങ്ങളില് ബൗളര്മാരായ പ്രശാന്ത് പരമേശ്വരനും സന്ദീപ് വാര്യര്ക്കും മാത്രമാണ് നേട്ടമുണ്ടാക്കാന് കഴിഞ്ഞത്. ലേലത്തിന്റെ രണ്ടാം ദിവസം കേരള താരം പ്രശാന്ത് പരമേശ്വരനെ സണ്റൈസേഴ്സ് ഹൈദരാബാദ് സ്വന്തമാക്കി. അതേസമയം, മറ്റൊരു താരമായ സന്ദീപ് വാര്യരെ പഴയ ടീമായ ബാഗ്ലൂര് റോയല് ചലഞ്ചേഴ്സ് നിലനിര്ത്തി.
കേരളത്തിന്റെ ഇടംകയ്യന് ഫാസ്റ്റ് ബൗളര് പ്രശാന്ത് പരമേശ്വരനെ 30 ലക്ഷം രൂപക്കാണ് സണ്റൈസേഴ്സ് ഹൈദരാബാദ് സ്വന്തമാക്കിയത്. 10 ലക്ഷം രൂപക്കാണ് സന്ദീപ് വാര്യരെ റോയല് ചലഞ്ചേഴ്സ് ബാംഗ്ലൂര് നിലനിര്ത്തിയത്.
കേരള രഞ്ജി ടീമംഗമായ പ്രശാന്ത് പരമേശ്വരന് നേരത്തെ ഐപിഎല്ലില് കൊച്ചി ടാസ്കേഴ്സിന് വേണ്ടിയാണ് അരങ്ങേറ്റം കുറിച്ചത്. കഴിഞ്ഞ രണ്ട് സീസണിലും ബാംഗ്ലൂര് റോയല് ചലഞ്ചേഴ്സിന് വേണ്ടിയാണ് കളിച്ചത്. ആലപ്പുഴ സ്വദേശിയാണ്.
വലംകയ്യന് ഫാസ്റ്റ് ബൗളറായ സന്ദീപ് വാര്യര് കഴിഞ്ഞ തവണയും ബാംഗ്ലൂര് റോയല് ചലഞ്ചേഴ്സിന് വേണ്ടിയാണ് കളിച്ചത്. കേരളത്തിന് വേണ്ടി മികച്ച പ്രകടനം കാഴ്ച്ച വെച്ചിട്ടുള്ള സന്ദീപ് വാര്യര് ബാംഗ്ലൂരില് നടന്ന എമര്ജിംഗ് ബൗളര്മാര്ക്കുള്ള സീനിയര് സെലക്ഷന് ക്യാമ്പില് പങ്കെടുത്തിട്ടുണ്ട്. തൃശ്ശൂര് സ്വദേശിയാണ്.
നേരത്തെ കേരള താരം സഞ്ജു സാംസണെ പഴയ ടീമായ രാജസ്ഥാന് റോയല്സ് ടീമില് നിലനിര്ത്തിയിരുന്നു.
അതേസമയം ഓപ്പണര് വി.എ. ജഗദീഷ്, റൈഫി വിന്സന്റ് ഗോമസ്, സച്ചിന് ബേബി, പി. പ്രശാന്ത് എന്നിവരെ വാങ്ങാന് ആരുമുണ്ടായില്ല. കര്ണാടകയുടെ മലയാളി ബാറ്റ്സ്മാന് കരുണ് നായരെ 75 ലക്ഷം രൂപക്ക് രാജസസ്ഥാന് റോയല്സ് സ്വന്തമാക്കി.
