തൃപ്പൂണിത്തുറ: ഇന്ത്യന്‍ ഓയില്‍കോര്‍പറേഷന്റെ ഉദയം പേരൂര്‍ ബോടിലിങ്ങ്‌ പ്ലാന്റില്‍ നിന്നുള്ള എല്‍പിജി സിലിണ്ടര്‍ വിതരണം ബുധനാഴ്ച ഉച്ചക്കുശേഷം താല്‍ക്കാലികമായി നിര്‍ത്തി.
ആ പ്രതീക്ഷിതമായുണ്ടായ ഗ്യാസ്‌ വിലവര്‍ദ്ധനവിനെ തുടര്‍ന്നുണ്ടായ അനിശ്ചിതത്വം കാരണം വിതരണ ഏജന്‍സികള്‍ ഐഒസിക്ക്‌ ഓര്‍ഡര്‍ ഫോം നല്‍കാതിരുന്നതിനെതുടര്‍ന്ന്‌ സിലിണ്ടര്‍ കയറ്റിപോകുന്ന ലോറിഡ്രൈവര്‍മാര്‍ക്ക്‌ ഓര്‍ഡര്‍ ബില്ല്‌ അടിച്ച്‌ നല്‍കാന്‍ ഐഒസിക്ക്‌ കഴിയാതിരുന്നതാണ്‌ പുറമെക്കുള്ള സിലിണ്ടര്‍ നീക്കം നിലക്കാനുണ്ടായ പ്രധാന കാരണം.
കഴിഞ്ഞ ഏതാനും ദിവസങ്ങളായി ഐഒസിയുടെ രണ്ട്‌ ബോട്ടിലിങ്ങ്‌ പ്ലാന്റുകള്‍ മാത്രമാണ്‌ പ്രവര്‍ത്തിക്കുന്നത്‌. മൂന്ന്‌ പ്ലാന്റാണ്‌ ഉള്ളത്‌. പാചകവാതക ലോഡ്‌ ആവശ്യാനുസരണം കമ്പനിയില്‍ എത്താതിരുന്നതാണ്‌ ഇതിന്‌ കാരണം. മംഗലാപുരത്തുനിന്നും ഉദയംപേരൂര്‍ പ്ലാന്റിലേക്ക്‌ എല്‍പിജി ലോഡ്‌ കൊണ്ടുവരുന്നുണ്ട്‌.
ബുധനാഴ്ച രാവിലെയുള്ള ആദ്യഷിഫ്റ്റില്‍ രണ്ടു പ്ലാന്റുകളും പ്രവര്‍ത്തിച്ചു. ഉച്ചവരെയായി ഏകദേശം 58 ലോഡ്‌ സിലിണ്ടറുകളാണ്‌ വിതരണത്തിനയച്ചത്‌.
ഇതിനുശേഷം ലോഡ്‌ ചെയ്ത 80 ഓളം ലോറികള്‍ ബില്ല്‌ അടിച്ചു കിട്ടാത്തത്‌ കാരണം ഐഒസിയില്‍ കെട്ടികിടക്കുകയാണ്‌. 160-170 ലോഡ്സിലിണ്ടറുകളാണ്‌ 3 പ്ലാന്റും പ്രവര്‍ത്തിക്കുന്ന ദിവസങ്ങളില്‍ വിതരണത്തിനായി കൊണ്ടുപോകുന്നത്‌ ഒരുലോറിയില്‍ 306 സിലിണ്ടറുകളാണ്‌ സാധാരണയായി കയറ്റുന്നത്‌.
ഐഒസിയിലെ സുരക്ഷാ കാരണങ്ങളാല്‍ 30 ലോഡില്‍ കൂടുതല്‍ സിലിണ്ടറുകള്‍ കമ്പനിക്കകത്ത്‌ പാര്‍ക്ക്‌ ചെയ്യാവുന്നതല്ല. വ്യാഴാഴ്ചയും സിലിണ്ടര്‍ നീക്കം പൂര്‍ണ്ണമായില്ലെങ്കില്‍ ബോട്ടിലിങ്ങ്‌ പ്ലാന്റ്‌ പ്രവര്‍ത്തനം നിര്‍ത്തവെക്കേണ്ടിവരുമെന്നാണ്‌ അറിയുന്നത്‌.
അതെസമയം, ഗ്യാസ്‌ വിലവര്‍ദ്ധനവിനെ തുടര്‍ന്നുണ്ടായ അനിശ്ചിതത്വം തീരാതെ വിതരണ ഏജന്‍സികള്‍ വ്യാഴാഴ്ച മുതല്‍ ഉപഭോക്താക്കള്‍ക്കുള്ള സിലിണ്ടര്‍ വിതരണം നിര്‍ത്തിവെക്കാനും ഇടയുണ്ട്‌. കേന്ദ്രസര്‍ക്കാര്‍ അന്യായമായി ഗ്യാസ്‌ വില അമിതമായി വര്‍ദ്ധിപ്പിച്ചതില്‍ പ്രതിഷേധിച്ച്‌ വിവിധ ഉപഭോക്തൃ സംഘടനകളും, തൊഴിലാളിസംഘടനകളും വിതരണ ഏജന്‍സികള്‍ ഉപരോധിക്കാനും നീക്കമുണ്ട്‌.
