പറവൂര്‍: ആര്‍എസ്‌എസ്‌, ബിജെപി, യുവമോര്‍ച്ച പ്രവര്‍ത്തകര്‍ക്കുനേരെ പറവൂരില്‍ ഡിവൈഎഫ്‌ഐ ആക്രമണം. റോഡില്‍ തടഞ്ഞുനിര്‍ത്തി മാരകായുധങ്ങളുപയോഗിച്ച്‌ ആക്രമിക്കുകയായിരുന്നു. വള്ളുവള്ളി കൊച്ചാല്‍ സെന്റ്‌ ആന്റണീസ്‌ പള്ളിക്ക്‌ സമീപം ഹൈവേ അക്വയര്‍ ചെയ്ത സ്ഥലത്തുവെച്ചായിരുന്നു ആക്രമണം.
ആര്‍എസ്‌എസ്‌ പ്രവര്‍ത്തകരും വള്ളുവള്ളി സ്വദേശികളുമായ പോട്ടശ്ശേരി ചന്ദ്രബോസ്‌ (38), കണക്കശ്ശേരി ശ്രീജിത്ത്‌ (25), മാച്ചേരില്‍ മന്മഥന്‍ (49), മാച്ചേരില്‍ അജിത (45), കുരിയില്‍ പട്ടത്ത്‌ അജീഷ്‌ കുമാര്‍ (25) എന്നിവരെയാണ്‌ ആക്രമിച്ചത്‌. കമ്പിവടി, ഇരുമ്പുകട്ട, വടിവാള്‍ തുടങ്ങിയ മാരകായുധങ്ങളുപയോഗിച്ചാണ്‌ ആക്രമണം നടത്തിയത്‌.
ആര്‍എസ്‌എസ്‌, ബിജെപി, യുവമോര്‍ച്ച പ്രവര്‍ത്തകരെ പരിക്കേല്‍പ്പിച്ച സംഭവത്തില്‍ വള്ളുവള്ളി സ്വദേശികളും ഡിവൈഎഫ്‌ഐ പ്രവര്‍ത്തകരുമായ പ്രിയദര്‍ശന്‍, വിനീഷ്‌, ആന്റോ, നിഥീഷ്‌, ബെന്നി, നില്‍വിന്‍, വിനേഷ്‌, നിബു എന്നിവരുള്‍പ്പെടെ 25പേര്‍ക്കെതിരെ കേസെടുത്തതായി പറവൂര്‍ എസ്‌ഐ പി.ശ്രീകുമാരന്‍ നായര്‍ പറഞ്ഞു. ഡിവൈഎഫ്‌ഐ അക്രമികള്‍ക്കെതിരെ നിയമനടപടി സ്വീകരിക്കണമെന്നാവശ്യപ്പെട്ട്‌ ബിജെപി, ആര്‍എസ്‌എസ്‌ പ്രവര്‍ത്തകര്‍ പ്രകടനവും സമ്മേളനവും നടത്തി. ബിജെപി ജില്ലാ വൈസ്‌ പ്രസിഡന്റ്‌ കെ.പി.രാജന്‍, പറവൂര്‍ മണ്ഡലം പ്രസിഡന്റ്‌ അജി കോട്ടാശ്ശേരി, ബിജെപി കോട്ടുവള്ളി പഞ്ചായത്ത്‌ പ്രസിഡന്റ്‌ രാജു മാടവന എന്നിവര്‍ പ്രസംഗിച്ചു.
