പാലാ: കേരളാ ക്ഷേത്രസംരക്ഷണസമിതിയുടെ ആഭിമുഖ്യത്തില് മൂന്നാമത് രാമായണസത്രത്തിന് കടപ്പാട്ടൂര് മഹാദേവക്ഷേത്രസന്നിധിയില് പ്രൗഢമായ തുടക്കം. വായ്ക്കുരവയുടെയും മംഗളധ്വനികളുടെയും അകമ്പടിയില് ഇന്നലെ 11ന് യോഗക്ഷേമസഭ സംസ്ഥാന പ്രസിഡന്റ് അക്കീരമണ് കാളിദാസഭട്ടതിരി സത്രപരിപാടികള്ക്ക് ഭദ്രദീപം തെളിയിച്ച് ഉദ്ഘാടനം ചെയ്തു. മനുഷ്യമനസിനെ പവിത്രീകരിക്കാന് രാമായണപാരായണം പോലെ മറ്റൊന്നില്ലെന്ന് അദ്ദേഹം പറഞ്ഞു.
സമഗ്രജീവിതദര്ശനത്തിന്റെ അക്ഷയഖനിയാണ് രാമായണം. കുടുംബബന്ധങ്ങളുടെ ഊഷ്മളതയും മഹനീയതയും എല്ലാം രാമായണം സവിസ്തരം പ്രതിപാദിക്കുന്നുണ്ടെന്നും അദ്ദേഹം അഭിപ്രായപ്പെട്ടു. ക്ഷേത്രസംരക്ഷണസമിതി സംസ്ഥാന പ്രസിഡന്റ് സ്വാമി അയ്യപ്പദാസ് അദ്ധ്യക്ഷത വഹിച്ചു. പൂഞ്ഞാര് കാര്ത്തികേയന് തന്ത്രി അനുഗ്രഹപ്രഭാഷണം നടത്തി.
സത്രത്തിനു തുടക്കംകുറിച്ചുനടന്ന പതാക ഉയര്ത്തല് ചടങ്ങ് ക്ഷേത്രം മേല്ശാന്തി നാരായണന് നമ്പൂതിരി നിര്വ്വഹിച്ചു. രാജു പൂഞ്ഞാര്, വിശ്വഹിന്ദു പരിഷത്ത് ജില്ലാ പ്രസിഡന്റ് ഡോ.എന്.കെ.മഹാദേവന്, ഹിന്ദുമഹാസംഗമം ജനറല് കണ്വീനര് ബിജു കൊല്ലപ്പള്ളി, വിവിധ സാമുദായിക സംഘടനാ നേതാക്കളായ ഡി.രാജപ്പന്, പി.എന്.വിജയന്, കെ.എന്.ഭാസ്കരന്, എം.വി.ബാബു, രാധാകൃഷ്ണവാര്യര്, രാജു ചേര്പ്പുങ്കല്, കെ.കെ.ഹരിക്കുട്ടന്, വി.എസ്.സുരേഷ്, വി.എസ്.മണി, ക്ഷേത്രസംരക്ഷണസമിതി താലൂക്ക് സെക്രട്ടറി പി.കെ.അനീഷ്, വി.കെ.രാജു, ക്ഷേത്രസംരക്ഷണസമിതി ജില്ലാ പ്രസിഡന്റ് സി.പി.ഗോപാലകൃഷ്ണന്, സംസ്ഥാന വൈസ് പ്രസിഡന്റ് പി.എന്.ഗോപാലകൃഷ്ണന്, സത്ര ആചാര്യന് നീലംപേരൂര് പുരുഷോത്തമദാസ് എന്നിവര് സംസാരിച്ചു.
