കോട്ടയം: വെന്നിമല ശ്രീരാമ ലക്ഷ്മണ സ്വാമി ക്ഷേത്രത്തിലെ കര്ക്കിടക വാവുബലി തര്പ്പണത്തിന് ഒരുക്കങ്ങള് പൂര്ത്തിയായതായി ഭാരവാഹികള് പത്രസമ്മേളനത്തില് അറിയിച്ചു. കര്ക്കിടക അമാവാസി ദിനമായ 6ന് പുലര്ച്ചെ നാലുമുതല് ശ്രീരാമ തീര്ത്ഥഘട്ടത്തില് പിതൃതര്പ്പണവും അഞ്ചുമുതല് ക്ഷേത്രരദര്ശനവും നടത്താന് കഴിയും. പിതൃതര്പ്പണത്തിനും ക്ഷേത്രദര്ശനത്തിനും വിപുലമായ സൗകര്യങ്ങള് ദേവസ്വം ഒരുക്കിയിട്ടുണ്ട്. ദര്ശനശേഷം ഭക്തജനങ്ങള്ക്ക് അന്നദാനവും ഉണ്ടായിരിക്കും. രാവിലെ 6മുതല് പുതുപ്പള്ളി, പാമ്പാടി എന്നിവിടങ്ങളില് നിന്നും 15 മിനിട്ട് ഇടവിട്ട് കെഎസ്ആര്ടിസി വെന്നിമലയിലേക്ക് സ്പെഷ്യല് സര്വ്വീസ് നടത്തും. സേവാഭാരതി, ക്ഷേത്രസംരക്ഷണസമിതി, മാതൃസമിതി എന്നിവയുടെ നേതൃത്വത്തില് ഭക്തജനങ്ങള്ക്ക് സേവനങ്ങളെത്തിക്കും. വാഹനങ്ങള് പാര്ക്കു ചെയ്യാന് വിപുലമായ സൗകര്യമൊരുക്കിയിട്ടുണ്ട്. നിവേദ്യ പ്രസാദങ്ങളായ അരവണ, അപ്പം, ത്രിമധുരം എന്നിവ ആവശ്യാനുസരണം ഭക്തര്ക്കു ലഭ്യമാക്കും.
വിശ്വഹിന്ദു പരിഷത്ത് ജില്ലാ നേതൃത്വവും ക്ഷേത്രസേവാസമിതിയും ക്രമീകരണങ്ങള്ക്ക് മേല്നോട്ടം വഹിക്കുന്നു. പത്രസമ്മേളനത്തില് സെക്രട്ടറി പ്രദീപ്കുമാര് വിജയാദ്രി, ജോയിന്റ് സെക്രട്ടറി യദുകൃഷ്ണന്, വിഎച്ച്പി ജില്ലാ സേവാപ്രമുഖ് എം.ജി.ശശിധരന് എന്നിവര് പങ്കെടുത്തു.
