കോട്ടയം: ഏറ്റുമാനൂര്, അതിരമ്പുഴമേഖലകളില് കോളറബാധ കണ്ടെത്തിയതിനെ തുടര്ന്ന് രോഗപ്രതിരോധ പ്രവര്ത്തനങ്ങള് സജീവമാക്കിയതായി ജില്ലാ മെഡിക്കല് ഓഫീസര് ഡോ. എന്.എം. ഐഷാബായി അറിയിച്ചു. കോളറ, മറ്റു ജലജന്യരോഗങ്ങള് എന്നിവയുടെ നിയന്ത്രണം ലക്ഷ്യമിട്ട് ജില്ലാ മെഡിക്കല് ഓഫീസ് മാസ് മീഡിയ വിഭാഗത്തിന്റെ ആഭിമുഖ്യത്തില് ഏറ്റുമാനൂര് ക്രിസ്തുരാജ ഓഡിറ്റോറിയത്തില് നടത്തിയ ബോധവത്ക്കരണ സെമിനാറില് മുഖ്യപ്രഭാഷണം നടത്തുകയായിരുന്നു ഡി.എം.ഒ
ബ്ലോക്ക് പഞ്ചായത്ത് പ്രസിഡന്റ് സന്ധ്യാ ബാനര്ജി സെമിനാര് ഉദ്ഘാടനം ചെയ്തു. ഏറ്റുമാനൂര് ഗ്രാമപഞ്ചായത്ത് പ്രസിഡന്റ് ജെയിംസ് പ്ലാക്കിത്തൊട്ടിയില് അധ്യക്ഷത വഹിച്ചു. മാലിന്യനിര്മ്മാര്ജ്ജനം, ജലസ്രോതസുകളുടെ പരിരക്ഷ എന്നിവ ഉറപ്പാക്കിക്കൊണ്ട് മാത്രമേ ജലജന്യരോഗങ്ങളെ ദീര്ഘകാലാടിസ്ഥാനത്തില് തടയാനാകൂ എന്ന് ഡോ. ഐഷാബായി പറഞ്ഞു. ഹോട്ടല് റെയ്ഡുകളും ഭവനസന്ദര്ശനവും ബോധവത്ക്കരണപരിപാടികളും ക്ലോറിനേഷനും നടത്തിയതുവഴി കോളറ നിയന്ത്രണവിധേയമാക്കാന് കഴിഞ്ഞു. ബോധവത്ക്കരണത്തിന്റെ ഭാഗമായുള്ള കൈപ്പുസ്തകം ബ്ലോക്ക് പഞ്ചായത്ത് പ്രസിഡന്റ് ജില്ലാ മെഡിക്കല് ഓഫീസര്ക്ക് നല്കി പ്രകാശനം ചെയ്തു. ജില്ലാ പഞ്ചായത്തംഗം ജോസ്മോന് മുണ്ടയ്ക്കല്, ബ്ലോക്ക് പഞ്ചായത്ത് ആരോഗ്യകാര്യ സ്റ്റാന്റിംഗ് കമ്മിറ്റി ചെയര്പേഴ്സണ് എല്സമ്മ മാത്യു, ഗ്രാമപഞ്ചായത്ത് ആരോഗ്യകാര്യ സ്റ്റാന്റിംഗ് കമ്മിറ്റി ചെയര്മാന് പി. ചന്ദ്രകുമാര് എന്നിവര് സംസാരിച്ചു. എന്.ആര്.എച്ച്.എം ജില്ലാ പ്രോഗ്രാം മാനേജര് ഡോ. എ. നിസാര് വിഷയാവതരണം നടത്തി. ജില്ലാ ആര്.സി.എച്ച് ഓഫീസര് ഡോ. തങ്കമ്മ, മെഡിക്കല് ഓഫീസര് ഡോ. അനൂപ ലൂക്കോസ്, ജില്ലാ മാസ് മീഡിയ ഓഫീസര് കെ. ദേവ്, ഡോ. ലാല് ആന്റണി എന്നിവര് ക്ലാസ് നയിച്ചു.
ഹോട്ടല്, ഹോംസ്റ്റേ, കേറ്ററിംഗ് സര്വീസ്, കൂള്ബാര് ഉടമകള്, ടാക്സി ഡ്രൈവര്മാര്, വിവിധ ക്ലബുകളുടെ ഭാരവാഹികള്, സ്വയംസഹായസംഘങ്ങളുടെയും അംഗന്വാടികളുടെയും പ്രതിനിധികള്, ആശാ വര്ക്കര്മാര് തുടങ്ങിയവര് പങ്കെടുത്തു.
