പാറ്റ്ന: ബീഹാറിലെ മഹാരാജ്ഗഞ്ചിലെ ഉപതെരഞ്ഞെടുപ്പില് ജെഡിയു പരാജയപ്പെട്ടത് എന്ഡിഎയില് ഭിന്നതകളുണ്ടാക്കില്ലെന്ന് മുഖ്യമന്ത്രി നിതീഷ്കുമാര്. മുന്നണി ബന്ധം കൂടുതല് ദൃഢമാണ്. മാത്രമല്ല ഉപതെരഞ്ഞെടുപ്പില് മുന്നണി ഒത്തൊരുമയോടെയാണ് പ്രവര്ത്തിച്ചതെന്നും എന്ഡിഎയില് ഭിന്നതകളുണ്ടെന്ന ആരോപണങ്ങള് നിഷേധിച്ചുകൊണ്ട് അദ്ദേഹം വ്യക്തമാക്കി.
എന്ഡിഎയുടെ പ്രവര്ത്തകര് മഹാരാജ്ഗഞ്ച് ഉപതെരഞ്ഞെടുപ്പില് കഠിനമായി അധ്വാനിച്ചു, ദല്ഹിയില് നിന്നും പാറ്റ്ന വിമാനത്താവളത്തില് തിരിച്ചെത്തിയ നിതീഷ് പറഞ്ഞു. എന്ഡിഎ പ്രവര്ത്തകരില് ഉത്സാഹം കുറവായിരുന്നെന്നും തെരഞ്ഞെടുപ്പു പ്രവര്ത്തനങ്ങളിലുണ്ടായ ആലസ്യം വോട്ടെടുപ്പിനെ ബാധിച്ചെന്നും കഴിഞ്ഞ ദിവസം മഹാരാജ്ഗഞ്ചില് നിന്നും പരാജയപ്പെട്ട ജെഡിയു സ്ഥാനാര്ഥി പി.കെ. ഷാഹി പറഞ്ഞിരുന്നു. നരേന്ദ്രമോദിയോട് ജെഡിയു എതിര്പ്പ് പ്രകടിപ്പിച്ചത് കാരണം ഷാഹിയുടെ വിജയത്തിന് ബിജെപി പ്രവര്ത്തകര് പ്രയത്നിച്ചില്ലെന്നാണ് ഇത് വ്യക്തമാക്കുന്നതെന്ന് ചിലര് വ്യാഖ്യാനിച്ചിരുന്നു.
നിതീഷ്കുമാറാണ് ബീഹാറില് എന്ഡിഎ ചെയര്മാന്. ബിജെപി നേതാവും മന്ത്രിയുമായ നന്ദകിഷോര് യാദവാണ് കണ്വീനര്. മഹാരാജ്ഗഞ്ച് ഉപതെരഞ്ഞെടുപ്പു ഫലം തങ്ങളെ വിഷമിപ്പിക്കുന്നതെല്ലെന്ന് അദ്ദേഹം പറഞ്ഞു. ഈ സീറ്റില് നേരത്തെ ആര്ജെഡിയാണ് വിജയിച്ചിരുന്നത്. ഇപ്പോഴും അവരത് നിലനിര്ത്തി. അതിനെക്കുറിച്ച് കൂടുതല് സന്തോഷിക്കാനായി ഒന്നുമില്ല, അദ്ദേഹം കൂട്ടിച്ചേര്ത്തു.
ജെഡിയു സ്ഥാനാര്ഥിയെ 1.37 ലക്ഷം വോട്ടുകള്ക്ക് തോല്പ്പിച്ചതില് ആര്ജെഡി പ്രസിഡന്റ് ലാലുപ്രസാദ് അമിതസന്തോഷം പ്രകടിപ്പിച്ചപ്പോള് അവര് സന്തോഷിച്ചോട്ടെയെന്നും എന്നാല് അതിന് അധികം ആയുസില്ലെന്നുമാണ് ജെഡിയു നേതാവ് കുമാര് പ്രതികരിച്ചത്. തോറ്റെങ്കിലും ജെഡിയുവിന്റെ വോട്ടിംഗ് ശതമാനം കഴിഞ്ഞ പൊതുതെരഞ്ഞെടുപ്പിനെയും 2010ലെ നിയമസഭാ തെരഞ്ഞെടുപ്പിനെയും അപേക്ഷിച്ച് കൂടിയെന്നും അദ്ദേഹം പറഞ്ഞു.
2009ല് നടന്ന 18 നിയമസഭാ ഉപതെരഞ്ഞെടുപ്പുകളില് ജെഡിയു വിജയിച്ചത് ആകെ അഞ്ചു സീറ്റിലാണ്. എന്നാല് 2010ലെ നിയമസഭാ തെരഞ്ഞെടുപ്പില് ജെഡിയു-ബിജെപി സഖ്യത്തിന് റെക്കോര്ഡ് വിജയമാണ് വോട്ടുചെയ്ത ജനങ്ങള് സമ്മാനിച്ചത്. ആര്ജെഡിയാകട്ടെ കനത്ത പരാജയമാണ് ഏറ്റുവാങ്ങിയത്, അദ്ദേഹം ചൂണ്ടിക്കാട്ടി.
ലോക്സഭാ തെരഞ്ഞെടുപ്പ് അടുക്കവെ മുന്നണിക്കുള്ളില് നിന്നും പാര്ട്ടിക്കുമേല് സമ്മര്ദങ്ങളൊന്നുമില്ലെന്ന് ബിജെപി വ്യക്തമാക്കി. അത് ചിലരുടെ അഭിപ്രായം മാത്രമാണ്. അടുത്ത പാര്ലമെന്റ് തെരഞ്ഞെടുപ്പില് നിന്നും ഗുജറാത്ത് മുഖ്യമന്ത്രി നരേന്ദ്രമോദിയെ അകറ്റിനിര്ത്തണമെന്ന് ഒരു ഘടകകക്ഷിയും നിര്ബന്ധിച്ചിട്ടില്ല. മുന്നണി നിര്ബന്ധ ഘടകമല്ല. മുമ്പ് അധികാരത്തിലിരുന്നപ്പോഴും മുന്നണിയുടെ വിശ്വാസ്യതയും സ്ഥിരതയും തങ്ങള് തെളിയിച്ചതാണ്. മുന്നണിയെ ഒരു മതമായാണ് കരുതുന്നതെന്ന് ബിജെപി ദേശീയ വൈസ് പ്രസിഡന്റ് മുഖ്താര് അബ്ബാസ് നഖ്വി ഗോവയില് മാധ്യമങ്ങളോട് പറഞ്ഞു.
ഗോവയില് ഇന്നാരംഭിക്കുന്ന ദേശീയ നിര്വാഹക സമിതിയോഗത്തിനുള്ള എല്ലാ തയ്യാറെടുപ്പുകളും പൂര്ത്തിയാക്കി. പൊതു മിനിമം പരിപാടിയുടെയും വികസന അജണ്ടകളുടെയും അടിസ്ഥാനത്തില് മുന്നണിയുടെ വിശ്വാസ്യതയും സ്ഥിരതയും മുമ്പ് തങ്ങള് തെളിയിച്ചതാണ്. എന്ഡിഎ മുന്നണി കൂടുതല് ശക്തിപ്പെടുമെന്നും വരുംദിനങ്ങളില് വികസിപ്പിക്കുമെന്നും നഖ്വി പറഞ്ഞു.
മുന്നണി വികസനത്തെക്കുറിച്ച് യഥാകാലം എല്ലാവരെയും അറിയിക്കും. മുന്നണിയിലെ ഒരു ഘടകകക്ഷിയില് നിന്നും മോദിയെ അകറ്റിനിര്ത്താന് യാതൊരു സമ്മര്ദ്ദവുമില്ല. അദ്ദേഹം ഒരിക്കല് കൂടി വ്യക്തമാക്കി.
