കാലടി: കാലടി-മലയാറ്റൂര് റോഡ് വീതി കൂട്ടി പണിയുന്നതിനുള്ള പ്രാരംഭ പ്രവര്ത്തനങ്ങളുടെ ഭാഗമായി പുറമ്പോക്ക് സ്ഥലങ്ങള് എടുക്കുന്നതിന്റെ ഭാഗമായി ടോട്ടല് സ്റ്റേഷന് സര്വ്വേ ആരംഭിച്ചു. മലയാറ്റൂര് പള്ളി പരിസരത്തുനിന്നും ആരംഭിച്ച സര്വ്വേയുടെ പ്രവര്ത്തനോദ്ഘാടനം അഡ്വ. ജോസ് തെറ്റയില് എംഎല്എ നിര്വ്വഹിച്ചു.
മലയാറ്റൂര് ഗ്രാമപഞ്ചായത്ത് പ്രസിഡന്റ് രാധാകൃഷ്ണന് ചെങ്ങാട്ട്, ഫാ. സേവ്യര് തേലക്കാട്ട്, ഫാ. ജോണ് തേയ്ക്കാനത്ത്, ടിനു തറയില്, മിനി സുരേന്ദ്രന്, കെ. കെ. പ്രഭ, തോമസ് ശങ്കുരിക്കല്, എം. എസ്. ദേവരാജ്, ജോബി പറപ്പിള്ളി, ജെയിംസ് കാളാംപറമ്പില്, തോമസ് പറമ്പിള്ളി, പി. സി. സജീവ്, വര്ക്കി കോനൂരാന്, തോമസ് മാടവന, ബിജു ചെറിയത്ത്, ഹാഷിം, ശിവദാസ്, സിന്റോ തുടങ്ങിയവര് പ്രസംഗിച്ചു. മലയാറ്റൂര് കാലടി റോഡില് കാലങ്ങളായി റോഡിന്റെ ഇരുവശങ്ങളിലും സ്ഥലവാസികള് അനധികൃതമായി കൈവശം വച്ചിരിക്കുന്ന പുറംമ്പോക്ക് അളന്ന് തിട്ടപ്പെടുത്തുന്നതിനുവേണ്ടിട്ടാണ് ടോട്ടല് സ്റ്റേഷന് സര്വ്വേ ഉള്പ്പെടെയുള്ള പ്രവര്ത്തികള് നടക്കുന്നത്.
പുറമ്പോക്ക് ഭൂമികള് ഏറ്റെടുക്കുന്നതോടെ റോഡിന്റെ വികസനത്തിന് ആവശ്യമായ നടപടികള് ആരംഭിക്കാന് കഴിയുമെന്നും ഒരു മാസം കൊണ്ട് സര്വ്വേ നടപടികള് പൂര്ത്തീകരിക്കുവാന് സാധിക്കുമെന്നും എംഎല്എ പറഞ്ഞു. വിനോദ -തീര്ത്ഥാടന സഞ്ചാരകേന്ദ്രങ്ങളായ കാലടിയെയും മലയാറ്റൂരിനെയും ബന്ധിപ്പിക്കുന്ന ഇടുങ്ങിയതും തിരക്കേറിയതുമായ കാലടി മലയാറ്റൂര് റോഡിനെ കൂടുതല് സഞ്ചാരയോഗ്യമാക്കുന്നതിന് അഡ്വ. ജോസ് തെറ്റയില് എംഎല്എയുടെ നേതൃത്വത്തില് നടന്ന പ്രവര്ത്തനങ്ങളുടെ ഭാഗമായിട്ടാണ് റോഡിന്റെ പ്രാരംഭപ്രവര്ത്തനങ്ങള്ക്കായി തുക അനുവദിച്ചിട്ടുള്ളത്.
