അങ്കാര: കഴിഞ്ഞ ദിവസം രാത്രിയില് തുര്ക്കിയിലുണ്ടായ ഭൂചലനത്തില് 3 പേര് കൊല്ലപ്പെടുകയും ഒരു ഡസനിലേറെ പേര് കഴിഞ്ഞ ഭൂകമ്പത്തില് തകര്ന്ന കെട്ടിടാവശിഷ്ടങ്ങള്ക്കിടയില്പ്പെടുകയും ചെയ്തു. കഴിഞ്ഞതവണ 600 പേരാണ് ഭൂകമ്പത്തില് കൊല്ലപ്പെട്ടത്. ഭൂകമ്പത്തില് പ്രവിശ്യാ തലസ്ഥാനത്ത് 20 കെട്ടിടങ്ങള് നിലംപൊത്തിയതായി റിപ്പോര്ട്ടുകളുണ്ട്. റിക്ടര് സ്കെയിലില് 5.7 രേഖപ്പെടുത്തിയ ഭൂകമ്പത്തില് പരിഭ്രാന്തരായ ആളുകള് പുറത്തേക്കോടി. ഇതിനിടെ കഴിഞ്ഞ തവണ തകര്ന്ന കെട്ടിടാവശിഷ്ടങ്ങളില് അഭയം തേടിയ പലരും അതില്കുടുങ്ങി. അവശിഷ്ടങ്ങളില് നിന്ന് സഹായത്തിനായുള്ള നിലവിളികള് ഉയരുന്നതിനിടെ പത്തുപേരെയെങ്കിലും രക്ഷപ്പെടുത്താന് കഴിഞ്ഞതായി തുര്ക്കി പത്രങ്ങള് റിപ്പോര്ട്ട് ചെയ്തു. രക്ഷാപ്രവര്ത്തകര് ശക്തിയേറിയ വിളക്കുകളുമായി രാത്രിയിലും തെരച്ചില് തുടരുകയാണ്. മൂന്ന് മൃതദേഹങ്ങള് കണ്ടെത്തിയതായും തകര്ന്ന ഒരു ഹോട്ടല് കെട്ടിടത്തിന്റെ അവശിഷ്ടങ്ങള്ക്കിടയില് 50 പേരെങ്കിലും കുടുങ്ങിക്കിടക്കുന്നതായി പ്രതീക്ഷിക്കുന്നുവെന്ന് സര്ക്കാര് ഉടമസ്ഥതയിലുള്ള ടെലിവിഷന് അറിയിച്ചു. ഭൂകമ്പത്തില് ഒരു ഹോട്ടലും സ്കൂളും ഏതാനും മണ്കുടിലുകളും തകര്ന്നതായും തലസ്ഥാനമായ അങ്കാരയില് നിന്നും മറ്റു സ്ഥലങ്ങളില് നിന്നും രക്ഷാപ്രവര്ത്തകരെ ആ സ്ഥലത്തേക്ക് അയച്ചതായും ഉപപ്രധാനമന്ത്രി ബെസിര് അറ്റ്ലാക് അറിയിച്ചു.
തുര്ക്കിയില് വീണ്ടും ഭൂചലനം
ബന്ധപ്പെട്ട വാര്ത്തകള്
പുതിയ വാര്ത്തകള്
ജന്മഭൂമി ഓണ്ലൈന്© Mathruka Pracharanalayam Limited.
Tech-enabled by Ananthapuri Technologies.