മുംബൈ: രാജ്യത്തിന് സമര്‍പ്പിച്ച് നൂറ് ദിവസം പിന്നിടുമ്പോള്‍ ഭാരതത്തിലെ ഏറ്റവും നീളംകൂടിയ കടല്‍പ്പാലം അടല്‍സേതുവില്‍ നിന്ന് വരുമാനമായി ലഭിച്ചത് 38 കോടി രൂപ. ഈ ദിവസത്തിനുള്ളില്‍ ഇതുവഴി കടന്നു പോയത് 21.9 ലക്ഷം വാഹനങ്ങള്‍. ഏപ്രില്‍ 23 വരെയുള്ള കണക്കാണിത്.
മുംബൈയെയും നവി മുംബൈയെയും നേരിട്ടു ബന്ധിപ്പിക്കുന്ന 21.8 കിലോമീറ്ററുള്ള കടല്‍പ്പാലത്തിലൂടെ ഒരു ദിവസം ശരാശരി 22,000 വാഹനങ്ങള്‍ പോകുന്നുവെന്നാണ് കണക്ക്. ഇതുവരെ കടന്നുപോയ വാഹനങ്ങളില്‍ 21.1 ലക്ഷവും കാറുകളാണ്. 16,569 ബസുകളും 43,876 മള്‍ട്ടി ആക്സില്‍ ട്രക്കുകളും ടോളിലൂടെ പോയിട്ടുണ്ട്.
ഒരു വശത്തേക്ക് 250 രൂപയാണ് കാറുകളുടെ ടോള്‍ നിരക്ക്. രണ്ടു വശത്തേക്കുമായി 375 രൂപ. ഒരു മാസത്തേക്ക് 12,500 രൂപയും. വാര്‍ഷിക നിരക്ക് 1.5 ലക്ഷം രൂപ. ആദ്യത്തെ ഒരുമാസത്തിനുള്ളില്‍ 8.13 ലക്ഷം വാഹനങ്ങളില്‍ നിന്നായി 13.95 കോടി രൂപ ടോളായി ലഭിച്ചുവെന്നും കണക്കുകള്‍ വ്യക്തമാക്കുന്നു. ജനുവരി 13 നാണ് അടല്‍സേതു ഗതാഗതത്തിനായി തുറന്നത്. ഒരു ദിവസം ശരാശരി 70,000 വാഹനങ്ങള്‍ പാലത്തിലൂടെ കടന്നുപോകുമെന്നായിരുന്നു പ്രതീക്ഷ.
ഉയര്‍ന്ന ടോള്‍നിരക്ക് വാഹനങ്ങള്‍ കുറയാന്‍ കാരണമാകുന്നുവെന്നാണ് വിലയിരുത്തല്‍. രാജ്യത്തെ എന്‍ജിനിയറിങ് മികവ് ലോകത്തിന് മുന്നില്‍ തുറന്നുകാണിച്ച അഭിമാന പദ്ധതിയായാണ് അടല്‍സേതുവിനെ വിശേഷിപ്പിക്കുന്നത്. താനെ കടലിടുക്കിന് കുറുകേ മുംബൈയേയും നവിമുംബൈയേയും ബന്ധിപ്പിച്ചാണ് പാലം നിര്‍മിച്ചത്. പാലം യാഥാര്‍ത്ഥ്യമായതോടെ നവി മുംബൈയില്‍ നിന്ന് മുംബൈയിലേക്ക് എത്താനു
ള്ള സമയം ഒന്നര മണിക്കൂറില്‍നിന്ന് 20 മിനിറ്റായി ചുരുങ്ങി.
17,840 കോടി രൂപയായിരുന്നു നിര്‍മാണ ചെലവ്. ലോകത്തെ തന്നെ ഏറ്റവും നീളമേറിയ പന്ത്രണ്ടാമത്തെ പാലമെന്ന റിക്കാര്‍ഡ് അടല്‍സേതുവിന്റെ പേരിലാണ്. പാലത്തിന്റെ 16.5 കിലോമീറ്റര്‍ കടലിലും 5.8 കിലോമീറ്റര്‍ കരയിലുമായാണ് സ്ഥിതിചെയ്യുന്നത്. 27 മീറ്ററാണ് പാലത്തിന്റെ വീതി. ഭാരതത്തില്‍ ആദ്യമായി ഓര്‍ത്തോട്രോപിക് ഡെക്കുകള്‍ ഉപയോഗിച്ച് നിര്‍മിച്ച പാലമാണിത്. 70 ഓര്‍ത്തോട്രോപിക് സ്റ്റീല്‍ ഡെഡ്ജ് ഗര്‍ഡറുകളാണ് പാലത്തിനുള്ളത്.
പ്രതികരിക്കാൻ ഇവിടെ എഴുതുക: