കോട്ടയം: കഞ്ഞിക്കുഴിയിലും, മുണ്ടക്കയത്തും കല്യാണ സദ്യ ഓര്‍ഡര്‍ എടുത്ത ശേഷം നല്‍കാതിരുന്ന സംഭവം ഞെട്ടിപ്പിക്കുന്നതാണെന്ന് കേറ്ററിംഗ് സ്ഥാപന ഉടമകള്‍. ഇപ്പോള്‍ തട്ടിപ്പ് നടത്തിയ കാഞ്ഞിരപ്പള്ളിയിലെ ഉദയം കേറ്ററിംഗ് എന്ന സ്ഥാപനത്തിന് എതിരെ നേരത്തെ പരാതി ഉയര്‍ന്നിരുന്നതാണ്. ഇതു സംബന്ധിച്ച് ഓള്‍ കേരള കേറ്ററേഴ്സ് അസോസിയേഷന്‍ മുന്നറിയിപ്പും നല്‍കിയിരുന്നുവെന്ന് ഭാരവാഹികള്‍ ചൂണ്ടിക്കാട്ടി.
അംഗീകാരമില്ലാത്ത ചില ഓണ്‍ലൈന്‍ സംഘങ്ങളാണ് വിവാഹം പോലുള്ള മുഹൂര്‍ത്തങ്ങളുടെ ശോഭ കെടുത്തുന്ന രീതിയില്‍ പ്രവര്‍ത്തിക്കുന്നത്. മാന്യമായ രീതിയില്‍ സ്ഥാപനം നടത്തുന്ന സാധാരണക്കാരായ കേറ്ററിംഗ് ഉടമകളെ പ്രതിസന്ധിയിലാക്കുന്നതാണ് ഇത്തരം തട്ടിപ്പുകള്‍.
ഓണ്‍ലൈനില്‍ പരസ്യം നല്‍കി ഇവന്റ് മാനേജ്മെന്റ് എന്ന പേരില്‍ ചിലര്‍ നടത്തുന്ന തട്ടിപ്പുകള്‍ക്കെതിരെ ബുക്ക് ചെയ്യുന്നവരാണ് ജാഗ്രത പുലര്‍ത്തേണ്ടത്. മതിയായ സംവിധാനങ്ങളോടെ പ്രവര്‍ത്തിക്കുന്നവരാണോ അവരെന്ന് ഉറപ്പ് വരുത്തണമെന്ന് ഭാരവാഹികള്‍ ആവശ്യപ്പെട്ടു.
