വാരണാസി ; റെക്കോർഡുകൾ ഭേദിച്ച് കുതിപ്പ് തുടരുന്ന ‘ ഹനുമാൻ അൻഷ് ‘ ചിത്രത്തിലെ അഭിനേതാക്കൾ മഹാദേവന്റെ അനുഗ്രഹം തേടി കാശി വിശ്വനാഥ ക്ഷേത്രത്തിലെത്തി. നടി അഞ്ജലി അറോറയും നടൻ ശോഭിനവ് സത്യയും മുഴുവൻ ടീമിനൊപ്പമാണ് ക്ഷേത്രത്തിലെത്തിയത്. വൻ വിജയം നൽകിയ മഹാദേവന് നന്ദി അർപ്പിച്ച് പ്രത്യേക പൂജകളും സംഘം നടത്തി.
അഞ്ജലി അറോറയും ശോഭിനവ് സത്യയും ക്ഷേത്രത്തിൽ എത്തിയ വിവരം അറിഞ്ഞതോടെ ജനക്കൂട്ടം ആവേശഭരിതരായി. ഭക്തരും നാട്ടുകാരും “ഹർ ഹർ മഹാദേവ്!” മന്ത്രങ്ങൾ ചൊല്ലിയാണ് താരങ്ങളെ സ്വീകരിച്ചത്. കുടുംബത്തിന്റെ ക്ഷേമത്തിനും വരാനിരിക്കുന്ന ചിത്രത്തിന്റെ വിജയത്തിനും വേണ്ടിയാണ് പ്രാർത്ഥിച്ചതെന്ന് അഞ്ജലി അറോറ പറഞ്ഞു.
അതേസമയം സിനിമയ്‌ക്ക് ഉത്തർപ്രദേശിൽ നികുതി ഇളവ് നൽകണമെന്ന് ആവശ്യപ്പെട്ട് മേയർ ഹരികാന്ത് അലുവാലിയ മുഖ്യമന്ത്രിക്ക് കത്തയച്ചു. “ഹനുമാൻ അൻഷ്” എന്ന സിനിമയുടെ ചിത്രീകരണം ഉത്തർപ്രദേശിലാണ് നടന്നത്. ചിത്രകൂടത്തിലെ മതപരവും പ്രകൃതിദത്തവുമായ സ്ഥലങ്ങളിലാണ് ഇതിന്റെ ഭൂരിഭാഗവും ചിത്രീകരിച്ചത്. ശിവരാംപൂർ, ആരോഗ്യധാം, പഞ്ചാബി ബാബ ആശ്രമം, പർസൗഞ്ജ ഗ്രാമം എന്നിവിടങ്ങളിലും ചിത്രീകരണം നടന്നു.
