ന്യൂദല്‍ഹി: ഓരോ രാജ്യത്തിനും നയതന്ത്ര സ്വാതന്ത്ര്യം ഉണ്ട് എന്ന കാര്യം ലോകത്തിന് കാണിച്ചുകൊടുക്കുകയായിരുന്നു മോദി ഈ ബ്രിക്സ് ഉച്ചകോടിയിലൂടെ. യുഎസിന് എതിരായ രാജ്യങ്ങളുടെ നേതാക്കള്‍ ആണ് ന്യൂദല്‍ഹിയില്‍ പറന്നിറങ്ങിയവരില്‍ ഭൂരിഭാഗവും. റഷ്യ പ്രസിഡന്റ് പുടിന്‍, ചൈനീസ് പ്രസിഡന്റ് ഷീ ജിന്‍ പിങ്ങ്, ഇറാന്‍ പ്രസിഡന്റ് പെസഷ്കിയാന്‍ …അങ്ങിനെ പട്ടിക നീളുന്നു. അതില്‍ ഏറ്റവുമധികം മാധ്യമശ്രദ്ധ നേടിയത് ഇറാന്‍ പ്രസിഡന്റ് പെസഷ്കിയന്റെ കൈകോര്‍ത്തുപിടിച്ച് മോദി നടക്കുന്നതിന്റെ ആ ഫോട്ടോയാണ്. മോദിയുടെ സ്നേഹത്തോടെയുള്ള ഉറച്ച ആ കൈകോര്‍ക്കലില്‍ ഒരു ആഴത്തിലുള്ള സൗഹൃദത്തിന്റെ ഊഷ്മളത പെസഷ്കിയാന്‍ അനുഭവിക്കുന്നുണ്ടെന്നത് അദ്ദേഹത്തിന്റെ മുഖത്തെ ഇളം പുഞ്ചിരിയില്‍ നിന്നും വായിച്ചെടുക്കാനാവും. അമേരിക്ക ഇറാനില്‍ ഏറ്റവും മാരകമായ ബോംബാക്രമണം നടത്തുമ്പോള്‍ ഇറാന്റെ പ്രസിഡന്‍റുമായി കൈകോര്‍ത്തുപിടിച്ച് നടക്കാന്‍ മോദി കാണിച്ച ധൈര്യം നയതന്ത്ര വിദഗ്ധര്‍ പല രീതികളിലാണ് വിലയിരുത്തുക.
ഇന്ത്യയുടെ നയതന്ത്ര സ്വാതന്ത്ര്യം യുഎസിന് പോലും പണയം വെയ്‌ക്കില്ല എന്നതിന്റെ വിളംബരമാണ് മോദി നടത്തിയത്. ഏത് രാജ്യവുമായി നയതന്ത്ര തലത്തില്‍ ചര്‍ച്ചകള്‍ നടത്താന്‍ ഇന്ത്യയ്‌ക്ക് സ്വാതന്ത്ര്യമുണ്ടെന്നും ഇന്ത്യയുടെ ഈ സ്വാതന്ത്ര്യം ആര്‍ക്കും പണയം വെച്ചിട്ടില്ലെന്ന വിളംബരമായിരുന്നു ഇത്. മാത്രമല്ല, ബ്രിക്സ് സമ്മേളനത്തില്‍ പങ്കെടുക്കാന്‍ പെസഷ്കിയാന്‍ ഇറാനില്‍ നിന്നും പുറപ്പെട്ടത് അമേരിക്കയെ വിമര്‍ശിച്ചുകൊണ്ടാണ് എന്നതാണ് ശ്രദ്ധേയമായ മറ്റൊരു വസ്തുത. ബ്രിക്സിന്റെ ലക്ഷ്യം തന്നെ ഏകപക്ഷീയതയെ നേരിടുക എന്നതാണെന്ന് ടെഹ്റാനില്‍ നിന്നും ന്യൂദല്‍ഹിയിലേക്ക് പറക്കുംമുന്‍പ് മാധ്യമപ്രവര്‍ത്തകരോട് സംസാരിക്കവേ പെസഷ്കിയാന്‍ പറഞ്ഞു. “ലോകത്തെ ഏകപക്ഷീയതയും ഏകാധിപത്യവും കുറയ്‌ക്കുന്നതിന് പുതിയ സമീപനങ്ങള്‍ ആവശ്യമാണ്. ഇത് തന്നെയാണ് ബ്രിക്സിന്റെ ചട്ടക്കൂട്”- പെസഷ്കിയാന്റെ വാക്കുകള്‍ അമേരിക്കയ്‌ക്ക് നേരെയുള്ള വിമര്‍ശനമാണെന്നതില്‍ സംശയമില്ല. അമേരിക്കയുടെ ഏകാധിപത്യവും ഏകപക്ഷീയതയും കുറയ്‌ക്കുന്നതിനുള്ള നീക്കത്തില്‍ ബ്രിക്സ് താങ്ങാവുമെന്ന പ്രതീക്ഷയയായിരുന്നു ഇന്ത്യയിലേക്ക് പുറപ്പെടുമ്പോള്‍ ഇറാന്‍ പ്രസിഡന്‍റിനുണ്ടായിരുന്നത്. യുദ്ധത്തിന്റെ നടുവില്‍ നിന്നും ഇന്ത്യയിലേക്ക് പറക്കാന്‍ പെസഷ്കിയാന്‍ കാണിച്ച മനസ്സ് ഇന്ത്യയോടും മോദിയോടും ബ്രിക്സിനോടുമുള്ള അടുപ്പം തന്നെയാണ്.
ഇന്ത്യയുടെ വിദേശനയവും ദേശീയ നയവും യുഎസിന് അടിയറവെച്ചിരിക്കുകയാണെന്ന കോണ്‍ഗ്രസ് നേതാവ് രാഹുല്‍ ഗാന്ധിയുടെ വിമര്‍ശനത്തിന് ശക്തമായ മറുപടിയാണ് ബ്രിക്സിലൂടെ മോദി നല്‍കിയത്. ഇന്ത്യയുടെ നയങ്ങളും നയതന്ത്ര സ്വാതന്ത്ര്യവും പണയം വെച്ചിട്ടില്ലെന്നതിന്റെ വിളംബരമാണ് ദല്‍ഹിയില്‍ ബ്രിക്സ് ഉച്ചകോടിയില്‍ കണ്ടത്. അതിന്റെ ഏറ്റവും വലിയ ഉദാഹരണമായിരുന്നു കൈകോര്‍ത്ത് പിടിച്ച് ഇറാന്‍ പ്രസിഡന്റ് പെസഷിയാനൊപ്പം മോദി ഉറച്ച ചുവടുവെയ്‌പുകളോടെ നടന്നത്.
