തിരുവനന്തപുരം: സംവരണത്തെക്കുറിച്ച് ഗൗരവമായി ആലോചിക്കുമെന്ന് പറയുന്ന മുഖ്യമന്ത്രി സുപ്രീംകോടതിയെക്കാള് അപ്പീല് അധികാരമുള്ള ആളായി മാറുന്നുവെന്ന് ഹിന്ദു ഐക്യവേദി മുഖ്യ രക്ഷാധികാരി കെ.പി. ശശികല ടീച്ചര്. മുഖ്യമന്ത്രി ഭരണഘടനയെ അട്ടിമറിക്കുകയാണ്. വോട്ട് ബാങ്കാണ് ലക്ഷ്യം. ജെ.ബി. കോശി കമ്മിഷന് റിപ്പോര്ട്ട് നടപ്പിലാക്കുമെന്ന് പറയുന്ന മുഖ്യമന്ത്രി വെറുതെ വെയിലുകൊള്ളേണ്ടെന്നും വേലിയില് കിടക്കുന്ന പാമ്പിനെ എടുത്ത് വേണ്ടാത്തിടത്ത് വെക്കരുതെന്നും ശശികല ടീച്ചര് പറഞ്ഞു.
സാമൂഹ്യനീതിയും സമത്വവും അടക്കമുള്ള ഹിന്ദു അവകാശങ്ങള് സംരക്ഷിക്കാന് ഹിന്ദു ഐക്യവേദിയുടെ നേതൃത്വത്തില് സെക്രട്ടേറിയറ്റിന് മുന്നില് സംഘടിപ്പിച്ച ധര്ണയില് മുഖ്യപ്രഭാഷണം നടത്തുകയായിരുന്നു അവര്.
പട്ടികജാതി സംവരണം സനാതന ധര്മത്തിന്റെ അതിരുകള്ക്കുള്ളില് മാത്രമാണെന്ന് ഭാരത ഭരണഘടനയില് അര്ത്ഥശങ്കയ്ക്കിടയില്ലാത്തവിധം വ്യക്തമാക്കിയിട്ടുള്ളതാണ്. ഹൈന്ദവ സംഘടനകള് മുഖ്യമന്ത്രിയെ കണ്ട് നിവേദനം നല്കി മാസങ്ങള് കഴിഞ്ഞിട്ടും യാതൊരു നടപടിയും ഉണ്ടായില്ല. എന്നാല് പാലോളി മുഹമ്മദ്കുട്ടി കമ്മിഷന്റെയും സച്ചാര് കമ്മിഷന്റെയും നിര്ദേശങ്ങള് ഒന്നൊന്നായി നടപ്പിലാവുകയാണ്. ക്രൈസ്തവ വിഷയങ്ങള് പഠിക്കാന് നിയോഗിച്ച ജെ.ബി. കോശി കമ്മിഷന് റിപ്പോര്ട്ട് അംഗീകരിക്കാവുന്ന മാനസികാവസ്ഥയിലാണ് സര്ക്കാരെന്നും അവര് വിമര്ശിച്ചു.
പന്തിരുകുല ആചാര്യന് ശിവാനന്ദ ശര്മ്മ ധര്ണ ഉദ്ഘാടനം ചെയ്തു. ഹൈന്ദവരുടെ ആവശ്യങ്ങള് അംഗീകരിക്കാതെ അവഗണിക്കുന്ന വോട്ട് ബാങ്ക് രാഷ്ട്രീയം ജനാധിപത്യത്തെ കൈ അടക്കുകയാണെന്ന് അദ്ദേഹം പറഞ്ഞു. പട്ടികജാതി പട്ടികവര്ഗക്കാരുടെയും മറ്റ് ഹൈന്ദവ സമൂഹങ്ങളുടെയും വിഷയം മുഴുവന് ഹൈന്ദവ സമൂഹത്തിന്റെയും പ്രശ്നമായി ഏറ്റെടുത്ത് ഒറ്റക്കെട്ടായി മുന്നേറാന് അദ്ദേഹം ആഹ്വാനം ചെയ്തു.
ഹിന്ദു ഐക്യവേദി വര്ക്കിങ് പ്രസിഡന്റ് പ്രൊഫ. പി.കെ. ഗോപിനാഥന് അധ്യക്ഷത വഹിച്ചു. സംസ്ഥാന ജനറല് സെക്രട്ടറി മഞ്ഞപ്പാറ സുരേഷ്, സംസ്ഥാന സെക്രട്ടറി കെ. പ്രഭാകരന്, എകെപിഎംഎസ് സംസ്ഥാന പ്രസിഡന്റ് എം.കെ. വാസുദേവന്, സാമൂഹ്യനീതി കര്മസമിതി ചെയര്മാന് കെ.വി. ശിവന്, കേരള ഗണകമഹാസഭ ജനറല് സെക്രട്ടറി പി.ബി. കരുണാദാസ്, കളരിപ്പണിക്കര് ഗണക കണികസഭ സംസ്ഥാന പ്രസിഡന്റ് ഡോ. പാച്ചല്ലൂര് അശോകന്, ഭാരതീയ മത്സ്യപ്രവര്ത്തക സംഘം പ്രസിഡന്റ് ജെ. ശിശുപാലന്, പണ്ഡിറ്റ് കറുപ്പന് വിചാരസഭ മുന് പ്രസിഡന്റ് കെ.കെ. വാമലോചനന്, എസ്എന്ഡിപി ഫെഡറേഷന് ജനറല് സെക്രട്ടറി ജി. രവീന്ദ്രന്, വിശ്വകര്മ ഐക്യവേദി ചെയര്മാന് ഡോ. ബി. രാധാകൃഷ്ണന്, വിഎസ്വിഎസ് സംസ്ഥാന വൈസ് പ്രസിഡന്റ് രാമകൃഷ്ണന് തുടങ്ങിയവര് സംസാരിച്ചു.
