തൃശൂര്: കയ്പ്പമംഗലത്തുണ്ടായ വാഹനാപകടത്തിന്റെ പശ്ചാത്തലത്തില് ജില്ലയിലെ ദേശീയപാതകളില് അടിയന്തരമായി സംയുക്ത പരിശോധന നടത്താന് ജില്ലാ കളക്ടര് ശിഖ സുരേന്ദ്രന് നിര്ദ്ദേശം നല്കി. എന്.എച്ച്.എ.ഐ പ്രോജക്ട് ഡയറക്ടര്, പൊലീസ്, മോട്ടോര് വാഹന വകുപ്പ്, തദ്ദേശ സ്വയംഭരണ സ്ഥാപനങ്ങളിലെ പ്രതിനിധികള് എന്നിവരടങ്ങുന്ന പ്രത്യേക സംഘമാണ് പരിശോധന നടത്തുക. പരിശോധ നടത്തി ബുധനാഴ്ച വൈകിട്ടോടെ റിപ്പോര്ട്ട് സമര്പ്പിക്കാന് കളക്ടര് നിര്ദേശം നല്കി.
ദേശീയപാതകളിലെ റോഡ് പരിപാലനം, ഫുട്പാതുകള് ശരിയായ നിരപ്പിലാണോ ഉള്ളത്, റോഡിലെ കുഴികള് ഉണ്ടോ, വെള്ളക്കെട്ടുള്ള പ്രദേശങ്ങള്, സര്വീസ് റോഡുകളില് കൃത്യമായ വെളിച്ചവും ലൈറ്റിംഗും ഉണ്ടോ, പ്രതിഫലിക്കുന്ന സൂചനാബോര്ഡുകള് ഉണ്ടോ, നിര്മാണ സാമഗ്രികള് അലക്ഷ്യമായി കൂട്ടിയിട്ടിരിക്കുന്നുണ്ടോ, അനധികൃത പാര്ക്കിംഗ്, കൃത്യമായ ബാരിക്കേഡിംഗ്, ആവശ്യത്തിന് ട്രാഫിക് വാര്ഡന്മാരുടെ സേവനം എന്നിവ സംഘം പരിശോധിക്കും. ഇതിനുപുറമേ നിര്മാണങ്ങളുടെ സ്ട്രക്ചറല് സ്റ്റെബിലിറ്റി, സ്കൂള് വിദ്യാര്ത്ഥികള്ക്ക് റോഡ് മുറിച്ചു കടക്കാനുള്ള സുരക്ഷാ സംവിധാനങ്ങള്, കാല്നടയാത്രക്കാര്ക്കുള്ള സൗകര്യങ്ങള് എന്നിവയും വിലയിരുത്തും.മോട്ടോര് വാഹന വകുപ്പിന്റെ (ആര്.ടി.ഒ) നേതൃത്വത്തില് പ്രത്യേക പരിശോധനയും ഇതിനൊപ്പം നടക്കും.
കൂടാതെ, റോഡ് സുരക്ഷാ പരിശോധനകള് നടത്തുവാന് എല്ലാ തദ്ദേശ സ്വയഭരണ സ്ഥാപന സെക്രട്ടറിമാര്ക്കും നിര്ദ്ദേശം നല്കിയതായി എല്.എസ്.ജി.ഡി അറിയിച്ചു.
അനധികൃത പാര്ക്കിംഗിനെതിരെ പോലീസും ആര്.ടി.ഒയും സ്പെഷ്യല് ഡ്രൈവ് ശക്തമാക്കണമെന്നും ആവശ്യമെങ്കില് എഫ്.ഐ.ആര് രജിസ്റ്റര് ചെയ്ത് നടപടിയെടുക്കണമെന്നും കളക്ടര് നിര്ദ്ദേശം നല്കി.
കളക്ടറേറ്റ് വീഡിയോ കോണ്ഫെറന്സ് ഹാളില് നടന്ന യോഗത്തില് റൂറല് പോലീസ് എസ്.പി മുഹമ്മദ് നദീം, ഡിസാസ്റ്റര് മാനേജ്മെന്റ് ഡെപ്യൂട്ടി കളക്ടര് കെ. എസ്. നസിയ, ഇരിങ്ങാലക്കുട ആര്.ഡി.ഒ പി. ഷിബു, അസിസ്റ്റന്റ് കമ്മീഷണര് വിമല് വി, ജില്ലാ ഇന്ഫര്മേഷന് ഓഫീസര് പ്രിയ കെ. ഉണ്ണികൃഷ്ണന് തുടങ്ങിയവര് പങ്കെടുത്തു.
