കോട്ടയം: സാമൂഹ്യമാധ്യമങ്ങളുടെ മായികലോകത്ത് അകപ്പെട്ട് യഥാർഥ ജീവിതവും മനുഷ്യബന്ധങ്ങളും നഷ്ടപ്പെടുത്തരുതെന്ന് ബാലഗോകുലം സംസ്ഥാന നിർവാഹക സമിതി അംഗം പി. ശ്രീകുമാർ. ലൈക്കുകളും കമന്റുകളും ജീവിതത്തിന്റെ അളവുകോലാകരുതെന്നും മറ്റുള്ളവരെ കാണിക്കാനായി മാത്രം ജീവിതം ക്രമീകരിക്കുന്ന പ്രവണത ഒഴിവാക്കണമെന്നും അദ്ദേഹം പറഞ്ഞു.
ബാലഗോകുലം സംഘടിപ്പിച്ച സാംസ്കാരിക സമ്മേളനത്തിൽ സംസാരിക്കുകയായിരുന്നു അദ്ദേഹം. നടി ശ്രുതി ബാല സമ്മേളനം ഉദ്ഘാടനം ചെയ്തു.
മൊബൈൽ ഫോൺ ജീവിതത്തിന്റെ നിയന്ത്രണം ഏറ്റെടുക്കുന്ന സാഹചര്യം ഒഴിവാക്കണം. “നമ്മൾ ഫോൺ ഉപയോഗിക്കുകയാണോ, അതോ ഫോൺ നമ്മളെ ഉപയോഗിക്കുകയാണോ?” എന്ന ചോദ്യം ഓരോരുത്തരും സ്വയം ചോദിക്കണം. സാങ്കേതികവിദ്യ ജീവിതത്തെ സുഗമമാക്കാനുള്ള ഉപകരണമാകണമെന്നും അദ്ദേഹം പറഞ്ഞു.
സാമൂഹ്യമാധ്യമങ്ങൾ അറിവും വാർത്തകളും വേഗത്തിൽ ലഭ്യമാക്കുകയും ലോകത്തെ വിരൽത്തുമ്പിലെത്തിക്കുകയും ചെയ്തിട്ടുണ്ട്. എന്നാൽ സ്ക്രീനിൽ കാണുന്ന ഓരോ പുഞ്ചിരിയും യഥാർഥ സന്തോഷത്തിന്റേതല്ല. മറ്റുള്ളവരുടെ ജീവിതത്തിലെ തിരഞ്ഞെടുത്ത നിമിഷങ്ങൾ മാത്രം കാണുമ്പോൾ അതാണ് അവരുടെ പൂർണ ജീവിതമെന്ന തെറ്റിദ്ധാരണ ഉണ്ടാകുമെന്നും അദ്ദേഹം ചൂണ്ടിക്കാട്ടി.
സാമൂഹ്യമാധ്യമങ്ങളെ ഉപേക്ഷിക്കണമെന്നല്ല, അവയുടെ സാധ്യതകൾ പ്രയോജനപ്പെടുത്തുന്നതിനൊപ്പം അതിന്റെ മായ തിരിച്ചറിയണമെന്നാണ് സന്ദേശം. കുടുംബം, സുഹൃത്തുക്കൾ, ബന്ധങ്ങൾ, പ്രകൃതി, മനുഷ്യരുടെ സ്നേഹം എന്നിവ ഉൾപ്പെടുന്ന യഥാർഥ ലോകത്തിന് ഒരു ലൈക്കിനും പകരമാകില്ല.
“മായ വിട്ട് മാനവനായ്, സ്ക്രീൻ വിട്ട് ജീവിതത്തിലേക്ക് മടങ്ങാം. അവസാനം നമ്മെ ഓർക്കുന്നത് എത്ര ലൈക്കുകൾ നേടിയെന്നല്ല; എത്ര മനുഷ്യരുടെ ഹൃദയത്തിൽ നമുക്ക് ഇടം നേടാനായി എന്നതാണ്,” പി. ശ്രീകുമാർ പറഞ്ഞു.
