ന്യൂദല്‍ഹി: ട്രംപ് ഭയക്കുന്ന ഡീഡോളറൈസേഷന്‍ പ്രക്രിയയ്‌ക്ക് ആക്കം കൂട്ടാന്‍ ഇന്ത്യ. അന്താരാഷ്‌ട്ര വ്യാപാരത്തില്‍ അമേരിക്കന്‍ ഡോളറിനെ ആശ്രയിക്കാതെ ഇന്ത്യയില്‍ സെപ്തംബര്‍ 12,13 തീയതികളില്‍ ദല്‍ഹിയില്‍ നടക്കുന്ന ബ്രിക്സ് ഉച്ചകോടിയില്‍ സ്വന്തം പേയ്മെന്റ് ശൃംഖല ശക്തിപ്പെടുത്താനൊരുങ്ങി ഇന്ത്യ. ഇത് സംബന്ധിച്ച ഒരു സമഗ്ര നിര്‍ദേശം ദല്‍ഹിയില്‍ നടക്കുന്ന ബ്രിക്സ് ഉച്ചകോടിയില്‍ ഇന്ത്യ അവതരിപ്പിക്കും.
ദല്‍ഹിയില്‍ നടക്കുന്ന ബ്രിക്സ് രാജ്യങ്ങളുടെ കൂട്ടായ്‌മയുടെ അധ്യക്ഷ പദവി വഹിക്കുന്ന ഇന്ത്യ, അംഗരാജ്യങ്ങളുടെ തദ്ദേശീയ കറന്‍സികളില്‍ നേരിട്ട് ഇടപാടുകള്‍ നടത്താന്‍ സഹായിക്കുന്ന സാങ്കേതിക പേയ്മെന്റ് സംവിധാനം ഔദ്യോഗികമായി നിര്‍ദ്ദേശിക്കും. ഓരോ രാജ്യങ്ങള്‍ക്കും അവരവരുടെ ബിസിനസ് മേഖലയ്‌ക്ക് കൂടുതല്‍ സാമ്പത്തിക സുരക്ഷിതത്വവും ബദല്‍ മാര്‍ഗ്ഗങ്ങളും ഉറപ്പാക്കുക എന്ന ലക്ഷ്യത്തോടെയാണ് ഇന്ത്യ ഈ സമഗ്ര നിര്‍ദ്ദേശം ഉച്ചകോടിയുടെ അജണ്ടയില്‍ ഉള്‍പ്പെടുത്തുന്നത്.
ആഗോള വിപണിയിലെ ഡോളര്‍ ആധിപത്യം കുറയ്‌ക്കുക, ഡോളര്‍ പ്രതിസന്ധികളെ മറികടക്കുക, രാജ്യാന്തര പണമിടപാട് ഉപരോധങ്ങള്‍ ശക്തിപ്പെടുത്തുക, വിദേശ ബാങ്കിംഗ് ചാനലുകളിലെ സാങ്കേതിക തടസ്സങ്ങള്‍ ലഘൂകരിക്കുക എന്നിവയാണ് ഈ നിര്‍ദേശങ്ങളില്‍ ഉള്‍പ്പെടുത്തുക.
ബ്രിക്സ് രാജ്യങ്ങള്‍ക്ക് ഒരു പൊതുവായ കറന്‍സി എന്ന നിര്‍ദേശത്തിന് ഇന്ത്യ എതിരാണ്. പകരം വ്യാപാര ഇടപാടുകളിലെ ചെലവ് കുറയ്‌ക്കാനും സാധ്യതകള്‍ വര്‍ദ്ധിപ്പിക്കാനുമാണ് സ്വന്തം കറന്‍സികളിലുള്ള ഇടപാടുകള്‍ പ്രോത്സാഹിപ്പിക്കുന്നതെന്നും ഔദ്യോഗിക കേന്ദ്രങ്ങള്‍ വ്യക്തമാക്കിയിട്ടുണ്ട്.
