ഓപ്പറേഷൻ സിന്ദൂറിന്റെ നായകൻ, മികച്ച ടെസ്റ്റ് പൈലറ്റ് ; രാമക്ഷേത്ര ട്രസ്റ്റിന്റെ ആദ്യ സിഇഒ ജിതേന്ദ്ര മിശ്ര

ലക്നൗ : ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിന്റെ ആദ്യ ചീഫ് എക്സിക്യൂട്ടീവ് ഓഫീസർ (സിഇഒ) ആയി വിരമിച്ച എയർ മാർഷൽ ജിതേന്ദ്ര മിശ്ര ചുമതലയേറ്റു. രാമക്ഷേത്രത്തിന്റെ ഭരണപരവും സാമ്പത്തികവും നിയമപരവുമായ മാനേജ്‌മെന്റിന്റെ ഉത്തരവാദിത്തം ഇനി അദ്ദേഹത്തിനായിരിക്കും. വഴിപാട് മോഷണവുമായി ബന്ധപ്പെട്ട വിവാദങ്ങളെത്തുടർന്ന് ട്രസ്റ്റിനെ പ്രൊഫഷണലും സുതാര്യവുമാക്കുന്നതിനുള്ള പ്രധാന ചുവടുവയ്‌പ്പായിട്ടാണ് ഈ തീരുമാനത്തെ കാണുന്നത്.

2025 ജനുവരി 1 മുതൽ 2026 ഏപ്രിൽ 30 വരെ വ്യോമസേനയുടെ ഏറ്റവും പ്രധാനപ്പെട്ട വെസ്റ്റേൺ എയർ കമാൻഡിന്റെ എയർ ഓഫീസർ കമാൻഡിംഗ്-ഇൻ-ചീഫ് (എഒസി-ഇൻ-സി) ആയിരുന്നു മിശ്ര . ഉത്തർപ്രദേശിലെ ദിയോറിയ ജില്ലയിലെ ഭോപത്പുര ഗ്രാമത്തിലാണ് അദ്ദേഹം ജനിച്ചത്. 3000 മണിക്കൂറിലധികം ഫൈറ്റർ പൈലറ്റ് പരിചയമുള്ള അദ്ദേഹം ഒരു ഫൈറ്റർ കോംബാറ്റ് ലീഡറും ആയിരുന്നു.

ജിതേന്ദ്ര മിശ്ര 2025-ൽ ഓപ്പറേഷൻ സിന്ദൂരിന്റെ സമയത്ത് ആദംപൂരിൽ സേവനമനുഷ്ഠിച്ചിരുന്നു. ഓപ്പറേഷൻ സിന്ദൂരിന്റെ കഥ ജിതേന്ദ്ര മിശ്ര അടുത്തിടെ വിവരിച്ചിരുന്നു. മിശ്രയുടെ മേൽനോട്ടത്തിൽ ഉള്ള എയർബേസുകളിൽ നിന്നാണ് ഇന്ത്യൻ ഫൈറ്റർ വിമാനങ്ങളും ഡ്രോണുകളും മിസൈലുകളും പാകിസ്താനെ തകർത്ത് തരിപ്പണം ആക്കിയത്.അസോൾട്ട് നയിക്കാൻ ആയി പറന്നുയർന്ന സ്ക്വാഡ്രനിൽ വനിതകൾ വേണമെന്ന് അദ്ദേഹത്തിന്റെ നിർബന്ധം ആയിരുന്നു . ഓപ്പറേഷൻ സിന്ദൂർ അവസാനിച്ച് മൂന്ന് ദിവസത്തിന് ശേഷം പ്രധാനമന്ത്രി നരേന്ദ്ര മോദി ആദംപൂർ സന്ദർശിച്ചു. ഈ കൂടിക്കാഴ്ചയെ കുറിച്ചും മിശ്ര എ.എൻ.ഐ.യുമായുള്ള പോഡ്‌കാസ്റ്റിൽ, പറഞ്ഞിരുന്നു.

“മെയ് 13 ന് പ്രധാനമന്ത്രി മോദി ആദംപൂർ വ്യോമസേനാ താവളം സന്ദർശിക്കാൻ തീരുമാനിച്ചു. അവിടെ പോരാടി വിജയിച്ച സൈനികരെ കാണാൻ അദ്ദേഹം ആഗ്രഹിച്ചു. ഞാൻ എയർ ഓഫീസർ കമാൻഡിംഗ്-ഇൻ-ചീഫ് ആയിരുന്നതിനാൽ, ഞാൻ അദ്ദേഹത്തെ സ്വീകരിച്ചു.പ്രധാനമന്ത്രി മോദി ആദംപൂർ വ്യോമസേനാ സ്റ്റേഷനിൽ എത്തിയപ്പോൾ, “സർ, നിങ്ങളുടെ കാറിൽ ഞാൻ നിങ്ങളോടൊപ്പം യാത്ര ചെയ്യട്ടെ?” എന്ന് അദ്ദേഹം ചോദിച്ചു.

ഒരു മൈക്രോ സെക്കൻഡ് പോലും കാത്തിരിക്കാതെ പറഞ്ഞു, ‘ അതെ, തീർച്ചയായും, നമുക്ക് പോകാം’ എന്ന്. അടുത്ത ഒന്നര മണിക്കൂർ, രാജ്യം കണ്ട ഏറ്റവും മികച്ച നേതാവിന്റെ കൂടെയായിരുന്നു ഞാൻ. പ്രധാനമന്ത്രി നരേന്ദ്ര മോദി. വ്യോമസേനാ സ്റ്റേഷനിൽ ഒന്നര മണിക്കൂർ അദ്ദേഹവുമായി സംസാരിക്കാനും കേൾക്കാനും കഴിഞ്ഞതിൽ ഞാൻ ശരിക്കും ഭാഗ്യവാനാണ്, അത് ഒരു ജീവിതകാല ഓർമ്മയാണ്.

അദ്ദേഹത്തിന് എല്ലാം അറിയാമായിരുന്നു. ആയുധ സംവിധാനങ്ങളുടെ പേരുകൾ അദ്ദേഹത്തിന് അറിയാമായിരുന്നു. ഇന്ത്യയിൽ ഏതൊക്കെ ആയുധങ്ങളാണ് നിർമ്മിക്കുന്നതെന്നും ഞങ്ങൾ എന്താണ് ചെയ്തതെന്നും അദ്ദേഹത്തിന് അറിയാമായിരുന്നു. ഞാൻ അത്ഭുതപ്പെട്ടു. അദ്ദേഹത്തെ അറിയിക്കണമെന്ന് ഞാൻ കരുതി, പക്ഷേ എന്നെ അത്ഭുതപ്പെടുത്തിക്കൊണ്ട്, ഞാൻ അദ്ദേഹത്തോട് ഒന്നും പറയേണ്ടി വന്നില്ല. അദ്ദേഹത്തിന് എല്ലാം അറിയാമായിരുന്നു.”” എന്നാണ് ആ സംഭവത്തെക്കുറിച്ച് ജിതേന്ദ്ര മിശ്ര പറഞ്ഞത്.