തെന്മല: ഓണാവധി ആഘോഷമാക്കാന് സഞ്ചാരികള് കൂട്ടത്തോടെ എത്തിയതോടെ കൊല്ലത്തെ വിനോദസഞ്ചാരമേഖലയില് ഉണര്വ്. ജില്ലയിലെ പ്രധാന വിനോദസഞ്ചാര കേന്ദ്രങ്ങളായ തെന്മല, പാലരുവി, ശെന്തുരുണി, അച്ചന്കോവില്, കുംഭാവുരുട്ടി, മണലാര് തുടങ്ങിയ ഇടങ്ങളിലെല്ലാം ഓണത്തിരക്ക് പ്രകടമായിരുന്നു.
കിഴക്കന് മേഖലയിലെ വിനോദ സഞ്ചാരകേന്ദ്രങ്ങളിലേക്ക് നിരവധിപേരാണ് ഇത്തവണ അവധി ആഘോഷിക്കാന് എത്തിയത്. തെന്മല ഇക്കോടൂറിസം, ശെന്തുരുണി, ആര്യങ്കാവ് പാലരുവി, അച്ചന്കോവില് കുംഭാവുരുട്ടി, മണലാര് വെള്ളച്ചാട്ടം തുടങ്ങിയ കേന്ദ്രങ്ങളിലാണ് ഓണത്തിരക്ക് ശക്തമായത്. പാലരുവി വെള്ളച്ചാട്ടത്തില് കഴിഞ്ഞദിവസം മാത്രം രണ്ടുലക്ഷത്തിലേറെ രൂപയുടെ വരുമാനം ലഭിച്ചു.
തെന്മല ഇക്കോടൂറിസം കേന്ദ്രത്തിലെ ചിത്രശലഭ പാര്ക്ക്, അഡ്വഞ്ചര് സോണ്, ബോട്ടിങ് എന്നിവിടങ്ങളിലും വലിയ തിരക്കാണ് അനുഭവപ്പെട്ടത്. കല്ലട അണക്കെട്ടിന്റെ മനോഹര കാഴ്ചകള് ആസ്വദിക്കാനും നൂറുകണക്കിന് സഞ്ചാരികളെത്തി. ശെന്തുരുണിയിലെ കളംകുന്ന് കുട്ടവഞ്ചി സവാരിക്കും റോസ്മല വ്യൂ പോയിന്റിലും നിരവധി സഞ്ചാരികളാണ് എത്തിയത്. രണ്ടുകിലോമീറ്ററോളം വനത്തിലൂടെ സഞ്ചരിച്ച് കല്ലട അണക്കെട്ടിന്റെ വൃഷ്ടിപ്രദേശത്തെ കാഴ്ചകള് ആസ്വദിക്കാനാകുന്ന കളംകുന്ന് സവാരിയിലും സഞ്ചാരികള് എത്തി.
വെയില് കുറഞ്ഞ സമയത്തെ വനയാത്രയും പ്രകൃതിക്കാഴ്ചകളും സഞ്ചാരികള്ക്ക് വേറിട്ട അനുഭവമാകുന്നു. ഫോട്ടോയും വീഡിയോയും പകര്ത്താനും പ്രകൃതിഭംഗി ആസ്വദിക്കാനുമായി ദൂരസ്ഥലങ്ങളില്നിന്നുപോലും സഞ്ചാരികള് കിഴക്കന്മേഖലയിലേക്ക് എത്തുന്നുണ്ട്. അച്ചന്കോവില് കുംഭാവുരുട്ടി, മണലാര് വെള്ളച്ചാട്ടങ്ങളിലും കേരളത്തില്നിന്നും തമിഴ്നാട്ടില്നിന്നുമായി നൂറുകണക്കിന് പേരാണ് എത്തിയത്. തമിഴ്നാട്ടിലെ തെങ്കാശി, സുന്ദരപാണ്ഡ്യപുരത്തെ സൂര്യകാന്തിപ്പാടവും സഞ്ചാരികളെ കിഴക്കന്മേഖലയിലേക്ക് ആകര്ഷിക്കുന്നുണ്ട്.
