തിരുവനന്തപുരം: ഓണം ടൂറിസം വാരാഘോഷത്തിന്റെ ഭാഗമായി ശംഖുമുഖത്ത് അരങ്ങേറിയ ഡിഫറന്റ് ആര്ട് സെന്ററിന്റെ കലാസന്ധ്യ കാണികള്ക്ക് അവിസ്മരണീയ അനുഭവമായി. അന്പതിലധികം ഭിന്നശേഷി കലാകാരന്മാര് അണിനിരന്ന പരിപാടി കാണികളെ വിസ്മയിപ്പിച്ചു.
പരിപാടിയുടെ മുഖ്യ ആകര്ഷണമായ വരാഹരൂപം അവതരണം കാണികളുടെ നിറഞ്ഞ കൈയടി നേടി. വേഷവിധാന സവിശേഷതയും ചടുലമായ ചുവടുകളും പശ്ചാത്തലത്തില് മുഴങ്ങിയ താളവാദ്യങ്ങളും ചേര്ന്ന് അവതരണത്തെ കൂടുതല് ഉജ്ജ്വലമാക്കി. കരോക്കെ ഉപയോഗിക്കാതെ വരാഹരൂപം എന്ന ഗാനം പശ്ചാത്തല സംഗീതത്തിന്റെ അകമ്പടിയോടെയാണ് കുട്ടികള് അവതരിപ്പിച്ചത്. മുഖത്തെ ഭാവപ്രകടനവും കൃത്യമായ താളബോധവും പ്രൊഫഷണല് കലാകാരന്മാരെ വെല്ലുന്നതായിരുന്നു എന്ന് കാണികള് അഭിപ്രായപ്പെട്ടു. വരാഹരൂപത്തിന് പുറമെ മാജിക്, ഉപകരണസംഗീതം, ഫ്യൂഷന് മ്യൂസിക്, സംഘനൃത്തം, സിനിമാറ്റിക് ഡാന്സ്, നാടന്പാട്ട് , ചെണ്ടമേളം തുടങ്ങി വിവിധ കലാപരിപാടികളും കലാസന്ധ്യയെ ധന്യമാക്കി. ഓരോ പരിപാടിയും കാണികള് കരഘോഷത്തോടെയാണ് സ്വീകരിച്ചത്. പരിമിതികളെ കലയുടെ കരുത്തുകൊണ്ട് മറികടക്കുന്ന ഡിഫറന്റ് ആര്ട് സെന്ററിലെ കുട്ടികളുടെ പ്രകടനം ഓണാഘോഷത്തിന് വ്യത്യസ്തമായ മാനം നല്കിയെന്ന് ടൂറിസം വകുപ്പ് അധികൃതര് പറഞ്ഞു. ഉത്രാട ദിനത്തില് അരങ്ങേറിയ കലാസന്ധ്യ ആസ്വദിക്കാന് നിരവധി സഞ്ചാരികളും നാട്ടുകാരും എത്തിയിരുന്നു.
