കോട്ടയ്ക്കല് ക്വാറിയിലെ പാറക്കെട്ടുകള് ലോറിക്കു മുകളില് അടര്ന്നുവീണ് ക്യാബിന് തകര്ന്ന നിലയില്
വെള്ളറട: ക്വാറിയിലെ പാറക്കെട്ടുകള് ലോറിക്ക് മുകളില് അടര്ന്നുവീണ് ഡ്രൈവര്ക്ക് ഗുരുതര പരിക്കേറ്റു. മാരായമുട്ടം കോട്ടയ്ക്കല് ഭാഗത്തുള്ള ക്വാറിയില് ശനിയാഴ്ച രാവിലെയാണ് സംഭവം.
ക്വാറിയില് നിര്ത്തിയിട്ടിരുന്ന ലോറിക്ക് മുകളില് മണ്ണുംപാറക്കല്ലുകളും ഇടിഞ്ഞുവീഴുകയായിരുന്നു. ലോറി ഡ്രൈവറായ തൃപ്പലവൂര് സ്വദേശി അമ്പിളി എന്ന് വിളിക്കുന്ന അനില്കുമാറിന് അപകടത്തില് ഗുരുതരമായി പരിക്കേറ്റു. നെയ്യാറ്റിന്കര ജനറല് ആശുപത്രിയിലെത്തിച്ച അദ്ദേഹത്തെ തിരുവനന്തപുരം മെഡിക്കല് കോളജ് ആശുപത്രിയിലേക്ക് മാറ്റി. രാവിലെ ഏകദേശം ഏഴ് മണിയോടെയാണ് കോട്ടയ്ക്കലിലെ ഷാ ട്രേഡേഴ്സിന്റെ ക്വാറിയില് അപകടം നടന്നത്. പാറ പൊട്ടിച്ചു നിര്ത്തിയിരുന്ന ക്വാറിയുടെ മുകള്ഭാഗത്തുനിന്നും മണ്ണും വലിയ പാറക്കല്ലുകളും പെട്ടെന്ന് താഴേക്ക് ഇടിഞ്ഞുവീഴുകയായിരുന്നു. പാറക്കല്ലുകള് പതിച്ച് താഴെ നിര്ത്തിയിട്ടിരുന്ന ലോറിയുടെ കാബിന് പൂര്ണ്ണമായും തകര്ന്നു. നിര്മ്മാണ പ്രവര്ത്തനങ്ങള് ആരംഭിക്കുന്നതിനു മുമ്പേ നിര്ത്തിയിട്ടിരുന്ന ലോറിക്ക് മുകളിലേക്ക് മണ്ണും പാറക്കെട്ടുകളും അടര്ന്നു വീഴുകയായിരുന്നു. തകര്ന്ന കാബിനില് കുടുങ്ങിയ ഡ്രൈവറെ മറ്റ് തൊഴിലാളികളും ഡ്രൈവര്മാരും ചേര്ന്നാണ് പുറത്തെടുത്ത് ആശുപത്രിയി ലെത്തിച്ചത്. വലിയ അപകടമാണ് നടന്നതെങ്കിലും ഗുരുതരമായി പരിക്കേറ്റ് ചികിത്സയിലുള്ള അനില്കുമാര് അത്ഭുതകരമായി രക്ഷപെടുകയായിരുന്നു.
ഷറഫുദ്ദീന് എന്നയാളുടെ ഉടമസ്ഥതയിലുള്ള ക്വാറിയിലായിരുന്നു അപകടം. കല്ലെടുക്കാന് എത്തിയതായിരുന്നു ലോറി. അശാസ്ത്രീയ രീതിയിലുള്ള ഖനനമാണ് അപകടകാരണം എന്നാണ് നാട്ടുകാര്ചൂണ്ടിക്കാട്ടുന്നത്. 2017 ല് സമാനമായ രീതിയില് തൊട്ടടുത്ത ക്വാറിയില് പാറവീണ് തമിഴ്നാട് സ്വദേശി ഉള്പ്പെടെ 2 പേര് മരിക്കുകയും 4 പേര്ക്ക് ഗുരുതരമായി പരിക്കേറ്റിരുന്നു.
അനധികൃത ഖനനം നടക്കുന്ന ക്വാറിക്കെതിരെ പ്രതിഷേധവുമായി നാട്ടുകാരും രംഗത്തെത്തി. ഇവിടെ നടക്കുന്ന അനധികൃത ഖനനത്തിനെതിരെ നേരത്തെയും പരാതി ഉയര്ന്നിരുന്നു. മുമ്പ് ഇവിടെ ഇതര സംസ്ഥാന തൊഴിലാളി ആത്മഹത്യ ചെയ്ത സംഭവവുമുണ്ട്. അപകട സാധ്യതയുണ്ടായിരുന്നിട്ടും അനധികൃതമായി ഖനനം തുടരുകയാണെന്നും ജലസ്രോതസ്സുകള് മണ്ണിട്ട് മൂടിയശേഷമാണ് ക്വാറിയുടെ പ്രവര്ത്തനം. ക്വാറിക്ക് പോലീസും റവന്യൂ പഞ്ചായത്ത് അധികൃതരും പിന്തുണ ചെയ്യുന്നതായി പ്രദേശവാസികള് ആരോപിക്കുന്നു. അപകടം നടന്ന പശ്ചാത്തലത്തില് മതിയായ സുരക്ഷാസംവിധാനങ്ങളില്ലാതെ ക്വാറി തുറന്നു പ്രവര്ത്തിപ്പിക്കരുതെന്നാണ് നാട്ടുകാര് ആവശ്യപ്പെടുന്നത്. അപകടത്തെ തുടര്ന്ന് മാരായമുട്ടം പോലീസ് സ്ഥലത്തെത്തി തുടര് നടപടികള് സ്വീകരിച്ചു. അനധികൃത ഖനന പ്രവര്ത്തനങ്ങള്ക്കെതിരെ ഉന്നതാധികാരികള്ക്ക് പരാതി നല്കാനാണ് നാട്ടുകാരുടെ തീരുമാനം.
