തിരുവനന്തപുരം: മംഗലപുരത്ത് ഓണാഘോഷത്തിന് നേരെ ആക്രമണം. അവിട്ട ദിനത്തില്‍ ഉണ്ടായ ആക്രമണത്തില്‍ നാലു പേര്‍ക്ക് വെട്ടേറ്റു. മംഗലപുരം കൈലാത്തുകോണം ഗവ.എല്‍പി എസിനു മുന്നില്‍ വ്യാഴാഴ്ച രാത്രി 12 മണിയോടെയാണ് ഗുണ്ടകള്‍ അതിക്രമം അഴിച്ചു വിട്ടത്.
പ്രദേശത്തെ ഒരു ക്ലബിന്റെ നേതൃത്വത്തില്‍ ഓണാഘോഷവുമായി ബന്ധപ്പെട്ട് പരിപാടികള്‍ നടക്കുന്നതിനെ തടസപ്പെടുത്തുന്നവിധം ലഹരിയുപയോഗിച്ചെത്തിയ സംഘം കൂകി വിളിക്കാനും നൃത്തം ചെയ്യാനും ആരംഭിച്ചു. തുടര്‍ന്ന് സംഘാടകരെത്തി ഈ സംഘത്തെ തടയുകയും പറഞ്ഞയയ്‌ക്കുകയും ചെയ്തു. എന്നാല്‍ കാറിലും ബൈക്കിലുമായി തിരിച്ചെത്തിയ സംഘം സംഘാടക സമിതിയിലെ നാലു പേരെ വെട്ടി പരിക്കേല്‍പ്പിക്കയായിരുന്നു.
സ്ഥലത്തു പാര്‍ക്കു ചെയ്തിരുന്നു ഏഴോളം ബൈക്കുകളും രണ്ടു കാറും അക്രമികള്‍ അടിച്ചു തകര്‍ത്തു. വെട്ടുകത്തി, വടിവാള്‍,പൈപ്പ് എന്നിവയുപയോഗിച്ചാണ് ആക്രമണം. ദീപു, ഉണ്ണി, അനൂപ്, ജിഷ്ണു എന്നിവര്‍ക്കാണ് പരിക്കേറ്റത്. വെട്ടുകത്തി കൊണ്ട് തലയ്‌ക്ക് വെട്ടേറ്റ ഉണ്ണിയുടെ തലയോട്ടി തകര്‍ന്നു. ഇയാള്‍ മെഡിക്കല്‍ കോളജില്‍ തീവ്ര പരിചരണ വിഭാഗത്തിലാണ്. തുടര്‍ന്ന് സ്ഥലത്ത് ഭീകരാന്തരീക്ഷം സൃഷ്ടിച്ച സംഘം നാട്ടുകാര്‍ക്കെതിരെ തിരിഞ്ഞു. ഭയന്നോടിയ സ്ത്രീകളും കുട്ടികള്‍ക്കും നിലത്തുവീണ് പരിക്കേറ്റു.
സംഭവത്തില്‍ മൂന്ന് പേര്‍ മംഗലപുരം പോലീസിന്റെ പിടിയിലായി. കുറക്കട അമ്പാടി നിവാസില്‍ ശ്രീജിത്ത്(19), ആലപ്പുറം കുന്ന് ചരുവിള പുത്തന്‍ വീട്ടില്‍ രാഹുല്‍(25), കൈലാത്തുകോണം വിഎസ് നിവാസില്‍ മിഥുന്‍(19) എന്നിവരാണ് പിടിയിലായത്. ഫോറന്‍സിക് സംഘം സ്ഥലത്തെത്തി പരിശോധന നടത്തി. പിടിയിലായ പ്രതികള്‍ ലഹരി സംഘത്തില്‍ പെട്ടവരാണെന്ന് പോലീസ് പറഞ്ഞു.
ആക്രമണത്തില്‍ പങ്കെടുത്ത 15 ഓളം പേരെ ഇനിയും പിടികൂടാനുണ്ട്. ഇവരെ പറ്റി വ്യക്തമായ സൂചന ലഭിച്ചതായി മംഗലപുരം പോലീസ് പറഞ്ഞു.
