തിരുവനന്തപുരം: അര്ജന്റൈന് ഫുട്ബോള് താരം മെസിയെ കേരളത്തില് കൊണ്ടുവരുന്നതിന്റെ പേരിലുള്ള സാമ്പത്തിക ഇടപാടുകളില് എന്ഫോഴ്സ്മെന്റ് ഡയറക്ടറേറ്റ് വിദേശനാണ്യ വിനിമയ ചട്ടപ്രകാരം കേസെടുത്തു. സ്പോണ്സര്മാര് വിദേശത്തേക്ക് 126 കോടി രൂപ അയച്ചെന്ന് വെളിപ്പെടുത്തിയതിന്റെ അടിസ്ഥാനത്തിലാണ് കേസ്.
മെസി വിഷയത്തില് കള്ളപ്പണ ഇടപാട് നടന്നെന്ന പരാതിയില് ഇ ഡി സ്പോണ്സറെ പരിശോധിച്ചിരുന്നു. എന്നാല് അന്ന് മറ്റ് അന്വേഷണ ഏജന്സികള് എഫ്െഎആര് ഇട്ടിരുന്നില്ല. അതിനാലാണ് അന്ന് കേസെടുക്കാതിരുന്നത്. സ്പോണ്സര് റിപ്പോര്ട്ടര് ബ്രോഡ്കാസ്റ്റിങ് കമ്പനി വിദേശത്തേക്ക് 126 കോടി രൂപ അയച്ചെന്ന വെളിപ്പെടുത്തലിന്റെ അടിസ്ഥാനത്തിലാണ് ഇപ്പോഴത്തെ ഇ ഡി കേസ്. പണം അയച്ചതിന്റെ രേഖകള്, സ്പോണ്സര് വെളിപ്പെടുത്തിയ എഗ്രിമെന്റ് വിവരങ്ങള് എന്നിവയൊക്കെ ഇ ഡി ശേഖരിച്ചിരുന്നു. എത്ര പണമാണ് വിദേശത്തേക്ക് അയച്ചത്, ഇത്രയേറെ പണത്തിന്റെ ഉറവിടം എവിടെ നിന്നാണ്, എങ്ങനെയാണ് ഈ തുക വിദേശത്തേക്ക് കടത്തിയത് എന്നിങ്ങനെയുള്ള അന്വേഷണമാകും ഇ ഡി നടത്തുക.
അര്ജന്റീന ഫുട്ബോള് അസോസിയേഷന് കൈമാറാന് സ്പോണ്സര് വിദേശത്തേക്ക് പണം അയച്ചതിന്റെയും അത് അര്ജന്റീന അസോസിയേഷന് കൈപ്പറ്റിയതിന്റെയും രേഖകള് സര്ക്കാരിനു സമര്പ്പിച്ചിട്ടില്ലെന്ന് കായിക വകുപ്പ് അന്വേഷണത്തില് കണ്ടെത്തി. സ്പോണ്സര് അമേരിക്കന് കമ്പനി മുഖേന പണം കൈമാറിയെന്നായിരുന്നു അവകാശപ്പെട്ടത്. വിദേശത്തേക്ക് നടന്ന പണമിടപാടില് വിദേശനാണ്യ വിനിമയ ചട്ടലംഘനമുണ്ടായെന്നാണ് ഇ ഡി വിലയിരുത്തല്.
സ്പോണ്സര്മാരില് നിന്ന് വിദേശ വിനിമയ ഇടപാടിന് ജിഎസ്ടി പിരിച്ചെടുക്കുന്നതില് വീഴ്ച വരുത്തിയതിന് വിജിലന്സ് അന്വേഷണത്തിന് സര്ക്കാര് ഉടന് ഉത്തരവിറക്കുമെന്നും അറിയുന്നു. ജിഎസ്ടിയായി 26 കോടി രൂപ പിരിച്ചെടുക്കുന്നതിലെ ഉദ്യോഗസ്ഥ വീഴ്ചയാണ് വിജിലന്സ് അന്വേഷിക്കുക. വീഴ്ച വരുത്തിയവര്ക്ക് ജിഎസ്ടി കമ്മിഷണര് നോട്ടീസ് നല്കി.
