തിരുവനന്തപുരം: പൊലീസ് സ്റ്റേഷനിലെ ഓണാഘോഷത്തിന് മദ്യപിച്ചെത്തിയ പൊലീസുകാര്‍ എസ്പിയുടെ മിന്നല്‍ പരിശോധനയില്‍ കുടുങ്ങി.അരുവിക്കര പൊലീസ് സ്റ്റേഷനിലാണ് സംഭവം.മൂന്നു പൊലീസുകാരെ സസ്‌പെന്‍ഡു ചെയ്തു.സിവില്‍ പൊലീസ് ഓഫീസര്‍മാരായ അച്ചു ശങ്കര്‍, പ്രശാന്ത്, അനില്‍കുമാര്‍ എന്നിവര്‍ക്കെതിരെയാണ് നടപടി.
മേലുദ്യോഗസ്ഥനെ കണ്ട പൊലീസുകാര്‍ സല്യൂട്ട് ചെയ്യാന്‍ പോലും മറന്നു. ഇത് ചോദ്യം ചെയ്യുന്നതിനിടെ ഒരാള്‍ സ്റ്റേഷനില്‍നിന്ന് ഓടിരക്ഷപ്പെടാനും ശ്രമിച്ചു. ഞായറാഴ്ച ആയിരുന്നു പൊലീസ് സ്റ്റേഷനിലെ ഓണാഘോഷം.ഇതിനിടെയാണ് റൂറല്‍ ജില്ലാ പൊലീസ് മേധാവി പ്രശാന്തന്‍ കാണിയുടെ നേതൃത്വത്തില്‍ സ്റ്റേഷനില്‍ മിന്നല്‍ പരിശോധന നടത്തിയത്.
മദ്യപിച്ചിട്ടുണ്ടോയെന്ന് എസ്പി ചോദിച്ചപ്പോള്‍ ഇല്ലെന്നാണ് പൊലീസുകാര്‍ പറഞ്ഞത്.മദ്യപിച്ച് ജോലിയില്‍ വീഴ്ച വരുത്തിയെന്ന കണ്ടെത്തലിന്റെ അടിസ്ഥാനത്തിലാണ് അച്ചടക്ക നടപടി എടുത്തത്. സംഭവത്തില്‍ വകുപ്പ് തല അന്വേഷണം ആരംഭിച്ചു.
