തിരുവനന്തപുരം: നിയമന കാലാവധി കഴിയാന് അഞ്ചുമാസം മാത്രം അവശേഷിക്കെ കെഎഎസ് രണ്ടാം പരീക്ഷയുടെ റാങ്ക് ലിസ്റ്റ് വന്ന് നിരവധി മാസങ്ങള് കഴിഞ്ഞിട്ടും നിയമനം നടക്കാത്തതിനാല് ഉദ്യോഗാര്ത്ഥികള് ആശങ്കയില്. നിയമനം അട്ടിമറിക്കാന് അണ്ടര് സെക്രട്ടറി തലത്തിലും ഐഎഎസ് കേഡറിലും നിന്ന് ശക്തമായ സമ്മര്ദം ഉയരുന്നതിനാല് നിയമിക്കേണ്ട തസ്തികകളുടെ വിവരങ്ങള് പിഎസ്സിക്ക് കൈമാറാതെ ചീഫ് സെക്രട്ടറി. സാങ്കേതിക കാരണങ്ങളെന്ന് പറഞ്ഞ് ചീഫ് സെക്രട്ടറി ഒഴിഞ്ഞുമാറിയതോടെ നിയമനശുപാര്ശ നല്കാന് പിഎസ്സിയും തയ്യാറാകുന്നില്ല. 2027 ജനുവരി 30ന് കാലാവധി കഴിയുമെന്നതിനാല് ലിസ്റ്റ് റദ്ദാകുമോ എന്ന ആശങ്കയിലാണ് ഉദ്യോഗാര്ത്ഥികള്.
ഡെപ്യൂട്ടേഷന് റിസര്വ് അടിസ്ഥാനമാക്കി കണ്ടെത്തിയ 46 തസ്തികകളില് നിന്ന് നിയമനം നല്കേണ്ട കൃത്യമായ 31 തസ്തികകള് ഏതെല്ലാമെന്ന് അന്തിമമായി നിശ്ചയിക്കുന്ന കാര്യത്തിലാണ് ചീഫ് സെക്രട്ടറിയുടെ നേതൃത്വത്തിലുള്ള സമിതി അമാന്തം കാട്ടുന്നത്. ഈ തസ്തികകളുടെ വിവരങ്ങള് പിഎസ്സിക്ക് കൈമാറിയാല് മാത്രമേ നിയമന ശുപാര്ശ നല്കാനാകൂ. സെക്രട്ടേറിയറ്റ് ജീവനക്കാരുടെ പ്രൊമോഷന് സാധ്യതകളെ കെഎഎസ് ബാധിക്കുമെന്ന ആശങ്കയുള്ളതിനാല് സെക്രട്ടേറിയറ്റിലെ വലിയൊരു വിഭാഗം ഉദ്യോഗസ്ഥര് കെഎഎസ് കേഡറിന് എതിരാണ്. സെക്രട്ടേറിയറ്റില് നിന്ന് ഡെപ്യൂട്ടേഷനില് പോകുന്ന അണ്ടര് സെക്രട്ടറിമാരുടെ തസ്തികകള് ഡെപ്യൂട്ടേഷന് റിസര്വ് ഇനത്തില് നഷ്ടമാകുമെന്നും അണ്ടര്സെക്രട്ടറി മുതല് മുകളിലേക്കുള്ള ഉദ്യോഗസ്ഥരുടെ പ്രമോഷന് തടസപ്പെടുമോ എന്നുമുള്ള ഭയമാണ് സെക്രട്ടേറിയറ്റിലെ ഉദ്യോഗസ്ഥരുടെ ആശങ്കയ്ക്കു കാരണം. ഇതുമൂലം സെക്രട്ടേറിയറ്റിലെ ചില ഉദ്യോഗസ്ഥ സംഘടനകളുടെ ഭാഗത്തുനിന്നുള്ള വിയോജിപ്പാണ് മുന് ചീഫ് സെക്രട്ടറി ജയതിലക് ഫയല് വച്ചുതാമസിപ്പിച്ചതിന് കാരണമെന്നാണ് സൂചന. ചീഫ് സെക്രട്ടറിയുടെ നേതൃത്വത്തിലുള്ള സമിതിയുടെ തീരുമാനം വൈകിപ്പിക്കുകയായിരുന്നു. ഒപ്പം ഐഎഎസ് ലോബിയും കെഎഎസിനെ എതിര്ക്കുകയാണ്.
ജൂനിയര് ഐഎഎസ് ഉദ്യോഗസ്ഥരുടെ അടിസ്ഥാന ശമ്പളത്തെക്കാള് മുകളിലാണ് കെഎഎസ് കേഡറിന്റെ ശമ്പള സ്കെയില് എന്നതും എതിര്പ്പിന് കാരണമായിട്ടുണ്ട്. നിയമനം അട്ടിമറിക്കാന് പൊതുഭരണവകുപ്പിലെ ഉദ്യോഗസ്ഥര് ഉള്പ്പെടെ ഗൂഢാലോചന നടത്തുന്നുവെന്നാണ് റാങ്ക്ലിസ്റ്റിലുള്ളവരുടെ പരാതി. എന്നാല് നിയമസഭാ തെരഞ്ഞെടുപ്പും പുതിയ സര്ക്കാരിന്റെ രൂപീകരണവുമായി ബന്ധപ്പെട്ട നടപടിക്രമങ്ങളും ഫയല് നീക്കങ്ങളില് കാലതാമസം വരുത്തിയെന്നാണ് ഔദ്യോഗിക വിശദീകരണം.
2025 മാര്ച്ച് 7ന് 31 ഒഴിവുകള് ഉണ്ടെന്നായിരുന്നു പിഎസ്സിയുടെ വിജ്ഞാപനം. ഇതനുസരിച്ച് രണ്ടു ലക്ഷത്തോളം ഉദ്യോഗാര്ഥികളാണ് അപേക്ഷകള് സമര്പ്പിച്ചത്. യുപിഎസ്സി സിവില് സര്വീസ് പരീക്ഷ മാതൃകയില് പ്രിലിമിനറി, മെയിന്സ്, ഇന്റര്വ്യൂ എന്നീ മൂന്ന് ഘട്ടങ്ങളിലായി നടന്ന ശ്രമകരമായ പരീക്ഷയില് ഉന്നതവിജയം കൈവരിച്ച 31 ഉദ്യോഗാര്ഥികളാണ് ഇപ്പോള് ആശങ്കയിലായിരിക്കുന്നത്. കൂടാതെ ആദ്യ കെഎഎസ് പരീക്ഷയില് പൂര്ത്തീകരിക്കാതെ പോയ സംവരണനിയമങ്ങളും അട്ടിമറിക്കപ്പെടുകയാണ്. ഈഴവ വിഭാഗത്തില്പ്പെട്ട ഏഴോളം ഉദ്യോഗാര്ഥികളുടേത് ഉള്പ്പടെ ഉയര്ന്ന തസ്തികകളിലേക്കുള്ള നിരവധി സമുദായങ്ങളുടെ അവസരങ്ങളും നഷ്ടപ്പെടുന്ന അവസ്ഥയിലാണ്.
ജന്മഭൂമി ഓണ്ലൈന്