ന്യൂദല്‍ഹി: വിയ്യൂര്‍ സെന്‍ട്രല്‍ ജയിലില്‍ നിന്ന് അസമിലെ ജയിലിലേക്ക് മാറ്റണമെന്ന് ആവശ്യപ്പെട്ട് നിയമ വിദ്യാര്‍ത്ഥിനി ജിഷ കൊലക്കേസില്‍ വധശിക്ഷയ്ക്ക് വിധിക്കപ്പെട്ട മുഹമ്മദ് അമീറുള്‍ ഇസ്ലാം സമര്‍പ്പിച്ച ഹര്‍ജിയില്‍ സുപ്രീം കോടതി കേരള സര്‍ക്കാരിന് നോട്ടീസ് അയച്ചു.
ഭാര്യയും വൃദ്ധ മാതാപിതാക്കളും അടങ്ങുന്ന തന്റെ കുടുംബം വളരെ ദരിദ്രമാണെന്നും തന്നെ കാണാനായി കേരളത്തിലേക്ക് വരാന്‍ അവര്‍ക്ക് കഴിയുന്നില്ലെന്നും മുഹമ്മദ് അമീറുള്‍ ഇസ്ലാം ഹര്‍ജിയില്‍ ചൂണ്ടിക്കാട്ടി. തുടര്‍ന്നാണ് കോടതി സംസഥാന സര്‍ക്കാരിന്‌റെ പ്രതികരണം തേടിയത്. മുതിര്‍ന്ന അഭിഭാഷക റെബേക്ക ജോണ്‍ അമീറുല്‍ ഇസ്ലാമിനു വേണ്ടി ഹാജരായി.
2016 ഏപ്രില്‍ 28 ന് എറണാകുളം ഗവണ്‍മെന്റ് ലോ കോളേജിലെ ദളിത് നിയമ വിദ്യാര്‍ത്ഥിനി പെരുമ്പാവൂരിലെ വീട്ടില്‍ വെച്ച് ബലാത്സംഗം ചെയ്യപ്പെട്ട് കൊല്ലപ്പെടുകയായിരുന്നു. അസമില്‍ നിന്നുള്ള കുടിയേറ്റ തൊഴിലാളിയായ അമീറുള്‍ ഇസ്ലാമിനെ 2016 ജൂലൈയില്‍ തമിഴ്നാട്ടില്‍ അറസ്റ്റ് ചെയ്തു . 2017 ഡിസംബറില്‍ വിചാരണ കോടതി വധശിക്ഷയ്ക്ക് വിധിച്ചു. കേരള ഹൈക്കോടതി വധശിക്ഷ ശരിവച്ചുവെങ്കിലും 2024 ജൂലൈയില്‍ സുപ്രീം കോടതി സ്റ്റേ ചെയ്തു.
