കൊച്ചി:എംവിഡി ഉദ്യോഗസ്ഥരുടെ സസ്പെന്ഷനില് സംസ്ഥാന സര്ക്കാരിനോട് വിശദീകരണം തേടി ഹൈക്കോടതി.ഓഫ് റോഡ് വാഹനത്തില് നിയമവിരുദ്ധമായി ഘടിപ്പിച്ച ലൈറ്റുകള്ക്ക് പിഴ ചുമത്തിയ ഉദ്യോഗസ്ഥരെ ഗതാഗത വകുപ്പ് സസ്പെന്ഡ് ചെയ്ത ശേഷം പിന്നീട് തിരിച്ചെടുത്തിരുന്നു.
പത്തനംതിട്ടയില് പ്രളയ ദുരിതാശ്വാസ പ്രവര്ത്തനത്തില് പങ്കെടുത്ത വാഹനത്തിന് പിഴ ഇട്ടെന്നതിനായിരുന്നു സസ്പന്ഷന്. അനധികൃത ലൈറ്റുകള്ക്ക് പിഴ ഈടാക്കണമെന്ന് നേരത്തെ ഹൈക്കോടതി ഉത്തരവിട്ടിരുന്നു. ഈ സാഹചര്യത്തില് ഉദ്യോഗസ്ഥരെ സസ്പെന്ഡ് ചെയ്ത കാര്യം വിശദീകരിക്കാനാണ് സര്ക്കാരിനോട് നിര്ദ്ദേശം.സ്വമേധയാ എടുത്ത കേസില് ആണ് കോടതി ഉത്തരവ്. കേസ് വെളളിയാഴ്ച പരിഗണിക്കും. അനധികൃത ലൈറ്റുകള് ഉള്പ്പെടെ അധികമായ ഘടിപ്പിക്കലുകളില് കേന്ദ്രസര്ക്കാരിനോടും കോടതി വിശദീകരണം തേടിയിട്ടുണ്ട്.
പ്രതിഷേധം ശക്തമായതോടെയാണ് അടൂര് എംവിഡി സ്ക്വാഡ് ഉദ്യോഗസ്ഥരായ ലൈജു, ഷമീര് എന്നിവരുടെ സസ്പെന്ഷന് പിന്വലിച്ച് നടപടി സ്ഥലമാറ്റത്തില് ഒതുക്കിയത്. കഴക്കൂട്ടം, മാവേലിക്കര ആര് ടി ഓഫീസുകളിലേക്കാണ് ഇരുവരെയും മാറ്റിയത്.വകുപ്പുതല അന്വേഷണം തുടരും.
ആഗസ്റ്റ് 5-ാം തീയതി അടൂരില് വെച്ചാണ് പത്തനംതിട്ട മെഴുവേലി സ്വദേശിയുടെ ഓഫ് റോഡ് വാഹനത്തിന് അനധികൃത ലൈറ്റുകള് സ്ഥാപിച്ചെന്ന് കാട്ടി എംവിഡി ഉദ്യോഗസ്ഥര് പിഴ ചുമത്തിയത്.
ആറന്മുള എംഎല്എ അബിന് വര്ക്കി ഉള്പ്പെടെ ആവശ്യപ്പെട്ടതിനെ തുടര്ന്നായിരുന്നു അനൗചിത്യ നടപടിയെന്ന കാരണത്തില് ഉദ്യോഗസ്ഥരെ സസ്പെന്ഡ് ചെയ്തത്. എന്നാല് ദിവസങ്ങള്ക്കുള്ളില് ഗതാഗത വകുപ്പ് സസ്പന്ഷന് പിന് വലിക്കേണ്ടി വന്നു. കൊല്ലം ആര്ടിഒയുടെ റിപ്പോര്ട്ട് കണക്കിലെടുത്ത് കൊട്ടാരക്കര ടിപ്പര് അപകടത്തില് സുദിന് ഗോപി, ശരത് എസ് കുമാര് എന്നീ ഉദ്യോഗസ്ഥരെ സസ്പെന്ഡ് ചെയ്തിരുന്നു.ഇതും സ്ഥലംമാറ്റമാക്കി ഇളവ് ചെയ്തു
