ന്യൂദല്‍ഹി: നടിയും സമാജ് വാദി പാര്‍ട്ടി നേതാവുമായ ജയ ബച്ചനുമായി ബന്ധപ്പെട്ട അശ്ലീല ഉള്ളടക്കങ്ങള്‍ നീക്കം ചെയ്യാന്‍ തയ്യാറാകാതിരുന്ന ഇന്റര്‍നെറ്റ് സേവന ദാതാക്കളുടെ (എസ്പികള്‍) രജിസ്‌ട്രേഷന്‍ റദ്ദാക്കുന്നതിനുള്ള നടപടി സ്വീകരിക്കാന്‍ ദല്‍ഹി ഹൈക്കോടതി കേന്ദ്ര ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്‌നോളജി മന്ത്രാലയത്തിനും ടെലികമ്മ്യൂണിക്കേഷന്‍ വകുപ്പിനും നിര്‍ദ്ദേശം നല്‍കി.
2025 നവംബര്‍ 10-ന് ബന്ധപ്പെട്ട പേജുകള്‍ നീക്കാന്‍ കോടതി നിര്‍ദ്ദേശിച്ചിരുന്നെങ്കിലും അതിപ്പോഴും ലഭ്യമാണെന്ന് ജയ ബച്ചന്റെ അഭിഭാഷകന്‍ കോടതിയെ അറിയിച്ചു. ഇന്റര്‍നെറ്റ് സേവന ദാതാക്കള്‍ നിര്‍ദ്ദേശങ്ങള്‍ പാലിച്ചിട്ടില്ല. ഇക്കാര്യത്തില്‍ ഇന്റര്‍നെറ്റ് സേവന ദാതാക്കള്‍ ഉത്തരവ് നടപ്പിലാക്കുന്നില്ലെന്ന് കേന്ദ്ര ഇലക്ട്രോണിക്‌സ് ആന്‍ഡ് ഇന്‍ഫര്‍മേഷന്‍ ടെക്‌നോളജി മന്ത്രാലയവും ടെലികമ്മ്യൂണിക്കേഷന്‍ വകുപ്പും കോടതിയെ അറിയിച്ചു.
ഇക്കാര്യത്തില്‍ ആശങ്ക പ്രകടിപ്പിച്ച കോടതി, ബന്ധപ്പെട്ട ഐഎസ്പികളുടെ രജിസ്‌ട്രേഷന്‍ റദ്ദാക്കാന്‍ കഴിയുമോ എന്ന് പരിശോധിക്കാന്‍ സര്‍ക്കാരിനോട് നിര്‍ദ്ദേശിച്ചു.
