ന്യൂദല്ഹി:മുല്ലപെരിയാര് കേസില് പ്രമുഖ അഭിഭാഷകന് റോയ് എബ്രഹാമിനെ സ്പെഷ്യല് കൗണ്സിലായി നിയമിച്ച് കേരളം. കേരളവുമായി ബന്ധപ്പെട്ട് സുപ്രീംകോടതിയും, വിവിധ ട്രിബ്യുണലുകളും പരിഗണിക്കുന്ന അന്തര് സംസ്ഥാന നദീജല തര്ക്ക കേസുകളിലും റോയ് എബ്രഹാം സംസ്ഥാനത്തിന് വേണ്ടി ഹാജരാകും. സീനിയര് അഭിഭാഷകന് മോഹന് കതാര്ക്കിക്കൊപ്പം റോയ് എബ്രഹാം ഹാജരാകുമെന്നാണ് സംസ്ഥാന സര്ക്കാര് പുറത്തിറക്കിയ ഉത്തരവില് ഉളളത്.
1992 മുതല് സുപ്രീംകോടതിയില് പ്രാക്ടീസ് ചെയ്യുന്ന അഭിഭാഷകനാണ് എറണാകുളം ജില്ലയിലെ കൂത്താട്ടുകുളം സ്വദേശിയായ റോയ് ഏബ്രഹാം. രണ്ടാം പിണറായി വിജയന് സര്ക്കാരിന്റെ കാലത്ത് മുല്ലപെരിയാര് ഉള്പ്പടെയുള്ള അന്തര് സംസ്ഥാന നദീജല തര്ക്ക കേസുകളില് ഹാജരാകാന് അഭിഭാഷകന് ജി പ്രകാശിനെയാണ് നിയമിച്ചത്.സംസ്ഥാനത്തിന്റെ മുന് സ്റ്റാന്ഡിംഗ് കൗണ്സില് കൂടിയായിരുന്നു ജി പ്രകാശ്. ലാവലിന് ഉള്പ്പടെ കേസുകളില് സംസ്ഥാന സര്ക്കാരിന് വേണ്ടി ജി പ്രകാശ് ഹാജരായിരുന്നു.
