തിരുവനന്തപുരം: ഇത്തവണ ഓണം വാരാഘോഷത്തില് സംസ്ഥാനത്താകെ 8000ത്തിലേറെ കലാകാരന്മാര് പങ്കാളികളാകുമെന്ന് മന്ത്രി പി.സി വിഷ്ണുനാഥ് വാര്ത്താസമ്മേളനത്തില് അറിയിച്ചു.
ഉണ്ണി മേനോന്, ഹരിശങ്കര്, അനൂപ് ശങ്കര്, വിനീത് ശ്രീനിവാസന്, ഹരീഷ് ശിവരാമകൃഷ്ണന് (അഗം ബാന്ഡ്), സൂരജ് സന്തോഷ്, നിത്യ മാമന്, മധു ബാലകൃഷ്ണന്, അരവിന്ദ് വേണുഗോപാല്, പന്തളം ബാലന്, നജീം അര്ഷാദ്, മഞ്ജരി, വൈക്കം വിജയലക്ഷ്മി, അഭയ ഹിരണ്മയി, സച്ചിന് വാരിയര്, രശ്മി സതീഷ്, അപര്ണ രാജീവ്, അതുല് നറുകര തുടങ്ങിയ പ്രമുഖ ഗായകരും സംഗീതജ്ഞരും വിവിധ പരിപാടികളില് പങ്കെടുക്കും.
കേരളത്തിന്റെ അഭിമാനങ്ങളായ കൈതപ്രം ദാമോദരന് നമ്പൂതിരി, വയലാര് ശരത്ചന്ദ്ര വര്മ്മ എന്നിവര്ക്കൊപ്പം നിരവധി പ്രമുഖ കലാകാരന്മാരും ഓണാഘോഷത്തിന്റെ ഭാഗമാകും. 30ന് ഓണം ഘോഷയാത്ര അവിസ്മരണീയമായ ദൃശ്യവിരുന്നാകും. മാനവീയം വീഥിയില് നിന്ന് 5 മണിക്ക് ആരംഭിച്ച് ഘോഷയാത്ര കിഴക്കേകോട്ടയില് അവസാനിക്കും. 62 സര്ക്കാര് വകുപ്പുകള് പങ്കെടുക്കും. വിവിധ സംസ്ഥാനങ്ങളില് നിന്നുള്ള ഫോക്ക് കലാരൂപങ്ങള് ഉള്പ്പെടെ നൂറിലേറെ കലാ രൂപങ്ങള് ഘോഷയാത്രയില് അണി നിരക്കും. ഇതോടൊപ്പം ഉദ്ഘാടന സ്ഥലത്ത് കൊച്ചി നേവി ബാന്ഡ് ഉണ്ടാകും.
ഓണാഘോഷത്തിന്റെ ഭാഗമായി തലസ്ഥാന നഗരിക്ക് ഉത്സവാന്തരീക്ഷം പകരുന്ന തരത്തില് കവടിയാര് മുതല് അട്ടക്കുളങ്ങര വരെയും ശാസ്തമംഗലം മുതല് വെള്ളയമ്പലം വരെയും ആകര്ഷകമായ ദീപാലങ്കാരങ്ങള് ഒരുക്കും.
