തിരുവനന്തപുരം: മലയാളത്തിന്റെ പ്രിയതാരം മോഹൻലാലും കേരളത്തിന്റെ ക്രിക്കറ്റ് ഐക്കൺ സഞ്ജു സാംസണും ഒന്നിച്ചെത്തിയ കേരള ക്രിക്കറ്റ് ലീഗ് സീസൺ 3-യുടെ ഔദ്യോഗിക പ്രൊമോ ഫിലിമാണ് ഇപ്പോൾ സമൂഹമാധ്യമങ്ങളുടെ ശ്രദ്ധ നേടുന്നത്.
ടാക്സി ഓടിക്കുന്ന സഞ്ജു സാംസണും ആ വാഹനത്തിലേക്ക് ഡ്രൈവർ ആരെന്നു ശ്രദ്ധിക്കാതെ കയറിയിരിക്കുന്ന മോഹൻലാലും തമ്മിലുള്ള സംഭാഷണമാണ് വീഡിയോയിൽ കാണാനാവുക. ഫോണിൽ നോക്കിയിരിക്കുകയാണ് മോഹൻലാൽ.
ലാലേട്ടനെ കണ്ട സഞ്ജു: “ചേട്ടൻ ക്രിക്കറ്റും കളിക്കുമോ?”
മോഹൻലാൽ : “ഈ സെലിബ്രിറ്റി ക്രിക്കറ്റ് ടീമിന്റെ ക്യാപ്റ്റൻ ആരായിരുന്നെന്നാ?!”
സഞ്ജു : “ഈ സഞ്ജുവിനെയൊക്കെ അറിയോ?”
മോഹൻലാൽ : “അറിയുവോന്നോ.. ഞാൻ പറഞ്ഞിട്ടല്ലേ രാജസ്ഥാൻ ടീമിൽ നിന്ന് അയാളെ ചെന്നൈയിലേക്ക് കൊണ്ടുവന്നത്.”
സഞ്ജു ഒന്ന് തിരിഞ്ഞ് നോക്കുന്നു… സഞ്ജുവിനെ കണ്ട് ലാലേട്ടൻ ഞെട്ടുന്നു.
സഞ്ജു: “അപ്പോ എങ്ങനെയാ പോവല്ലേ ചേട്ടാ?”
മോഹൻലാൽ: “ഹാ വണ്ടി വിട് മോനെ ഗ്രീൻ ഫീൽഡ് സ്റ്റേഡിയത്തിലേക്ക്”
കഴിഞ്ഞ ദിവസം കാറിനകത്ത് ലാലേട്ടനൊപ്പം ഇരിക്കുന്ന ഒരു സെൽഫിയും ശ്രദ്ധ നേടിയിരുന്നു. ‘വളരെ സവിശേഷമായ ഒരു കാര്യം വരുന്നുണ്ട്’ എന്നായിരുന്നു ടീം സാംസൺ പങ്കുവച്ച ചിത്രത്തിന്റെ അടിക്കുറിപ്പ്.
